ដោយៈ ភ្នំ​សន្ទុក / កំពង់ធំៈ កាលពី​ថ្ងៃទី​១៤ ខែកក្កដា ឆ្នាំ​២០២២ លោក តិ​ប ញ​តា លោក ម៉ែន វណ្ណា​រិ​ទ្ធ ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តកំពង់ធំ លោក ឡង់ គី​សឹង អភិបាល ស្រុក​សន្ទុក និង​មន្ត្រីរាជការ កងកម្លាំង​ចម្រុះ បាន​ចុះ​ប្រតិបត្តិ​ការបង្ក្រាប និង​បាន​ឃាត់ខ្លួន​បុរស​ម្នាក់ ពាក់ព័ន្ធ​នឹង​បទល្មើស​ទន្ទ្រាន​ដី​ស្ថានីយ​ផ្សព្វផ្សាយ និង​ស្តារ​ព្រៃឈើ អូរ​សំពង់​-​ភ្នំ​សេវា ស្ថិតនៅ​ចំណុច​ភ្នំ​សេវា ក្នុងភូមិ​អូរ​ក្រពើ ឃុំ​បឹងល្វា ស្រុក​សន្ទុក ខេត្តកំពង់ធំ អស់​ចំនួន​ជាង ៣០ ហិកតា ។

​លោក នាយ​អធិការ​ខាងជើង​បឹង​ទន្លេសាប បានឱ្យដឹងថា​: បុរស​ដែល​ទន្ទ្រាន​ដី​ស្ថានីយ​ផ្សព្វផ្សាយ និង​ស្តារ​ព្រៃឈើ អូរ​សំពង់​-​ភ្នំ​សេវា ដើម្បី​យក​ដី​ធ្វើ​កម្មសិទ្ធិ​របស់ខ្លួន​នោះ មានឈ្មោះ ម៉ែន ភាន់ អាយុ​៥៧​ឆ្នាំ មាន​ទីលំនៅ នៅក្នុង​ភូមិ​អូរ​ក្រពើ ឃុំ​បឹងល្វា ស្រុក​សន្ទុក ខេត្តកំពង់ធំ​។

​លោក​អធិការ​ខាងជើង​បឹង​ទន្លេសាប បាន​បញ្ជាក់ថា​: បុរស​ឈ្មោះ ម៉ែន ភាន់ នេះ គឺជា​មេខ្លោង ដោយមាន​បក្ខពួក​មួយ​ចំនួន​ទៀត មានដូចជា ឈ្មោះ គន់ គឹម​លី​, ទូច គឹម​សាន​, រស់ វ៉ាន់​, សាន ស្រី ហៅ​ចែ ច្រាប ។

​លោក​បាន​បញ្ជាក់ទៀតថា​: ខណ្ឌ​រដ្ឋបាល​ព្រៃឈើ​កំពង់ធំ ធ្លាប់បាន​ចងក្រង​សំណុំរឿង បញ្ជូនទៅ​តុលាការខេត្ត​កំពង់ធំ ម្តង​រួចមកហើយ កាលពី​ថ្ងៃទី​៣១ ខែសីហា ឆ្នាំ​២០២១ ក៏ប៉ុន្តែ​មកទល់ពេលនេះ ជននេះ (​ម៉ែន ភាន់​) បាន​នាំ​បក្ខពួក មក​ទន្ទ្រាន​ដី​ស្ថានីយ និង​យក​កូន​កៅស៊ូ មក​ដាក់​ក្នុង​ស្ថានីយ ដោយ​បង្កើតជា​ថ្នាល​តម្កល់​កូន​កៅស៊ូ ចំនួន​ជាង ១០.០០០ ដើម ទៅ ១៥.០០០ ដើម​។

​លោកនាយ​អធិការ​ខាងជើង​បឹង​ទន្លេសាប បាន​មាន ប្រសាសន៍ថា​: ការបំផ្លិចបំផ្លាញ​ធនធានធម្មជាតិ ជាពិសេស​ការទន្ទ្រាន​យក​ដី​ស្ថានីយ​ផ្សព្វផ្សាយ និង​ស្តារ​ព្រៃឈើ​អូរ​សំពង់​-​ភ្នំ​សេវា គឺមាន​ទោស​ធ្ងន់​ណាស់ ដែល​មិនអាច​លើកលែង​បានទេ​។

​លោក​បានឱ្យដឹងថា​: បច្ចុប្បន្ន បុរស​នេះ រួមទាំង​វត្ថុតាង​ជាច្រើន បាន​ត្រូវបញ្ជូន​មកកាន់​សាលាដំបូង​ខេត្តកំពង់ធំ ដើម្បី​ចាត់ការ​តាម​នីតិវិធី​ច្បាប់ ។ ចំណែក​បក្ខពួក​ពាក់ព័ន្ធ មន្ត្រី​ជំនាញ កំពុង​ស្រាវជ្រាវ តាម​ប្រមាញ់​ចាប់ខ្លួន យកមក​ផ្តន្ទាទោស តាមច្បាប់ ៕/V​