ដោយ​៖ ដេប៉ូ / ភ្នំពេញ​៖ នៅក្នុង​យុទ្ធនាការ ៩០​ថ្ងៃ នេះ គឺមាន​សារៈសំខាន់​ណាស់ ក្នុងការ​បង្កើន​ភាពជា​ដៃគូ ជាមួយ​សហជីព​មូលដ្ឋាន ក្នុងន័យ​ផ្សព្វផ្សាយ​របប​សន្ដិសុខ​សង្គម ផ្នែក​ប្រាក់​សោធន ឲ្យ​បាន​ទូលំទូលាយ ពី​កាតព្វកិច្ច និង​អត្ថប្រយោជន៍ ដែល​ទទួលបាន​នៅពេល​ដល់​អាយុ​ចូលនិវត្តន៍​។ នេះ​ជាការ​ថ្លែង​បញ្ជាក់​ពី​សំណាក់ លោក អ៉ិ​ត សំហេង រដ្ឋមន្ត្រីក្រសួង​ការងារ និង​បណ្ដុះបណ្ដាល​វិជ្ជាជីវៈ និង​ជា​ប្រធាន​ក្រុមប្រឹក្សាភិបាល ប​.​ស​.​ស​.​។

​ថ្លែង​ក្នុង​កិច្ចប្រជុំ​លើក​ទី​៤ នៃ​យុទ្ធនាការ ៩០​ថ្ងៃ នៃ​ពិធី​ផ្សព្វផ្សាយ​របប​សន្តិសុខ​សង្គម ផ្នែក​ប្រាក់​សោធន សម្រាប់​បុគ្គល​ទាំងឡាយ ដែល​ស្ថិតនៅក្រោម​បទ​ប្បញ្ញត្តិ នៃ​ច្បាប់​ស្តីពី​ការងារ រៀបចំ​ធ្វើឡើង នៅ​សណ្ឋាគារ ហ៊ី​ម៉ា​វ៉ា​រី នា​ព្រឹក​ថ្ងៃទី​១៥ ខែកក្កដា ឆ្នាំ​២០២២ លោក អ៊ិត សំហេង បាន​គូសបញ្ជាក់ថា​: នៅក្នុង​របប​សន្ដិសុខ​សង្គម ផ្នែក​ប្រាក់​សោធន ជា​កាតព្វកិច្ច​នេះ នៅពេលដែល​បងប្អូន ដល់​អាយុ​ចូលនិវត្តន៍ ក៏មាន​របប​សន្ដិសុខ​សង្គម ផ្នែក​ថែទាំ​សុខភាព​ផងដែរ ដូច្នេះ​បន្ទាប់ពី​បងប្អូន​ចូលនិវត្តន៍ គឺ​មិន​បារម្ភ​នៅពេល​មាន​ជំងឺ ត្រូវ​ចំណាយ​ទៅលើ​ការព្យាបាល​ឡើយ ដែល​នេះ​ជាការ​យកចិត្តទុកដាក់​ខ្ពស់បំផុត​របស់​រាជរ​ដ្ឋា​ភិ​បាល​កម្ពុជា ក្រោម​ការដឹកនាំ ប្រកបដោយ​គតិបណ្ឌិត និង​ឈ្លាសវៃ​បំផុត ពី​សំណាក់​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ដោយ​មិន​ប្រកាន់វណ្ណៈ ប្រកាន់​បក្ខពួក ឬ​និន្នាការ​នយោបាយ​របស់​ក្រុម​បក្សប្រឆាំង និង​បក្ស​កាន់អំណាច​ឡើយ​។

​ទាក់ទិន​ទៅនឹង​ជំងឺ​កូ​វីដ​-១៩ កំពុង​លេច​វត្តមាន​ជាថ្មី នៅ​កម្ពុជា លោក រដ្ឋមន្ដ្រីក្រសួង​ការងារ បានធ្វើការ​ក្រើនរំលឹក​ដល់​បងប្អូន​ប្រជាពលរដ្ឋ ជាពិសេស​បងប្អូន​កម្ម​ករ និយោជិត និង​និយោជក ត្រូវ​ចូលរួម​ការពារ​ខ្លួន​តាម​វិធាន​សុខាភិបាល ឲ្យ​បាន​ម៉ត់ចត់ ជាពិសេស​ត្រូវ​ទៅ​ទទួលយក​វ៉ាក់សាំង នៅតាម​ទីតាំង​ដែល​បានរៀបចំ ដើម្បី​ឲ្យ​អត្រា​អ្នក​ចាក់​ដូ​ស​ជំរុញ មាន​ភាពស៊ាំ នៅក្នុង​សហគមន៍ កាន់តែច្រើន ហើយ​ជាពិសេស​ទៀត ត្រូវអនុវត្ត​ឱ្យបាន​ជាប់​ជាប្រចាំ នូវ​ប្រសាសន៍​ណែនាំ​ដ៏​ខ្ពង់ខ្ពស់ របស់​សម្ដេច​តេ​ជោ​នាយករដ្ឋមន្ត្រី នៃ​ព្រះរាជាណាចក្រ​កម្ពុជា​។

​តាមរយៈ​ពិធី​ផ្សព្វផ្សាយ​នេះដែរ លោក​រដ្ឋមន្ត្រី ក៏បាន​បន្ដ​សំណូមពរ​យ៉ាងទទូច ទៅកាន់​តំណាង​និយោជក ដែល​បាន​ចូលរួម​ក្នុង​ពិធី​ផ្សព្វផ្សាយ នាពេលនេះ សូមមេត្តា​យកចិត្តទុកដាក់​ស្ដាប់ និង​សួរ​នូវ​រាល់​ចំងល់​ទាំងឡាយ​ពាក់ព័ន្ធ​ទៅនឹង​របប​សន្ដិសុខ​សង្គម ផ្នែក​ប្រាក់​សោធន​ថ្មី​នេះ ដើម្បី​អាច​ផ្សព្វផ្សាយ​បន្ត អំពី​កាតព្វកិច្ច និង​អត្ថប្រយោជន៍ នៃ​របប​សន្តិសុខ​សង្គម ផ្នែក​ប្រាក់​សោធន​នេះ ឱ្យបាន​ទូលំទូលាយ ប្រកបដោយ​ភាពត្រឹមត្រូវ ច្បាស់លាស់ ធ្វើយ៉ាងណា ឱ្យមាន​ការចូលរួម​អនុវត្ត​កាតព្វកិច្ច ស្របតាម​ច្បាប់ ស្តីពី​របប​សន្តិសុខ​សង្គម ពេញលេញ ប្រកបដោយ​ភាព​ពេញចិត្ត និង​រីករាយ​សាទរ ជៀសវាង​ការទទួល​នូវ​ការ​ញុះញង់ ការទទួល​ព័ត៌មាន​មិន​ពិត ពី​ក្រុម​ជន​អគតិ មួយចំនួន​តូច​៕/V​