ដោយ​: ភ្នំ​ខៀវ / បាត់ដំបង​: បុរស​ម្នាក់ បើកបរ​ត្រាក់ទ័រ​ក្រឡាប់​សង្កត់​លើ បណ្តាល​ឲ្យ​ស្លាប់ រំលង​មួយ​យប់ ទើបបាន​គេ​ដឹង បង្កឱ្យមាន​ការភ្ញាក់ផ្អើល​។

​ហេតុការណ៍​ភ្ញាក់ផ្អើល ក្រោយ​ការប្រទះឃើញ​សាកសព​ត្រូវ​ត្រាក់ទ័រ​សង្កត់ពីលើ​ស្លាប់​នេះ បានកើត​ឡើង នៅវេលា​ម៉ោង ១០ ព្រឹក​ថ្ងៃទី​១៥ ខែកក្កដា ឆ្នាំ​២០២២ នៅត្រង់ចំណុច​ក្បែរ​ដីចម្ការ ក្នុងភូមិ​អូរ​តា​សុខ ឃុំ​ពេជ្រ​ចិន្ដា ស្រុក​ភ្នំព្រឹក ខេត្តបាត់ដំបង​។

​ជនរងគ្រោះ​មានឈ្មោះ ញឹក សារិត ភេទ​ប្រុស អាយុ ៣៤​ឆ្នាំ រស់នៅ​ភូមិ ឃុំ​កើតហេតុ​ខាងលើ​។

​សាច់ញាតិ​ជនរងគ្រោះ បាន​បញ្ជាក់ថា​: នៅ​ល្ងាច​ថ្ងៃកើតហេតុ ពួកគាត់​ចេះតែ​ងឿងឆ្ងល់ និង​ចាំមើល​ផ្លូវ ព្រោះ​មិន​បានឃើញ​ជនរងគ្រោះ វិល​ត្រឡប់មកផ្ទះ​វិញ​ដូច​សព្វ​មូ​យ​ដង ដោយ​យប់​ពេក ទើប​មិនបាន​ដើររក​។ រហូតដល់​ព្រឹក​ឡើង នៅ​ថ្ងៃទី​១៥ ខែកក្កដា សាច់ញាតិ​មានការ​សង្ស័យ ក៏​នាំគ្នា​ទៅរក​មើល ហើយ​ក៏បាន​ប្រទះឃើញ​ត្រាក់ទ័រ​ក្រឡាប់​ចូលទៅក្នុង​អូរ ចន្លោះ​កំណាត់​ផ្លូវ ពី​ចម្ការ​មក​ផ្ទះ​។

​ក្រោយ​ហេតុការណ៍ កើតឡើង​ភ្លាម សមត្ថកិច្ច​មូលដ្ឋាន​បាន​ចុះទៅពិនិត្យ​រួច សន្និដ្ឋានថា គ្រោះថ្នាក់​ក្រឡាប់​ត្រាក់ទ័រ​នេះ អាច​កើតឡើង នៅ​ល្ងាច​ថ្ងៃទី​១៤ កក្កដា​ពេលដែល​ជនរងគ្រោះ បញ្ចប់​ការងារ​ភ្ជួរ​រាស់ ហើយ​ត្រឡប់មកផ្ទះ​វិញ​។

​ក្រោយ​បាន​ពិនិត្យ​ទីតាំង​កើតហេតុ​រួច នគរបាល​ជំនាញ បានប្រគល់​សាកសព​ឲ្យ​ទៅ​សាច់ញាតិ ក្រុមគ្រួសារ ដើម្បី​ចាត់ចែង​ធ្វើបុណ្យ តាម​ប្រពៃណី​៕/V​