​ប្រែ​សម្រួលៈ​បំណង​(​ស្ត្រេត​ថែមស៍​)៖ រុស្ស៊ី​កាលពី​ថ្ងៃ​សុក្រ​ទី​១៥​កក្កដា បាន​ហាម​សមាជិក​សភា​ជប៉ុន​៣៨៤​នាក់​មិន​អោយ​ចូល​ក្នុង​ទឹកដី​របស់​ខ្លួន នៅក្នុង​ការឆ្លើយតប​ទៅនឹង​ការ​ដែល​រដ្ឋាភិបាល​ទីក្រុង​តូ​ក្យូ​​សហការ​ជាមួយ​ទណ្ឌកម្ម​អន្តរជាតិ​ប្រឆាំង​នឹង​ខ្លួន​ដោយសារ​តែ​សង្គ្រាម​នៅ​អ៊ុ​យក្រែន​។​

​ក្រសួងការបរទេស​រុស្ស៊ី​បានដាក់​សមាជិកសភា​ជប៉ុន​ក្នុង​បញ្ជី​ខ្មៅ ដាក់​ឈ្មោះ​ពួកគេ​ក្នុង​គេហទំព័​ររបស់ខ្លួន​និង​ចោទប្រកាន់ពួក​គេ​ថា​«​ប្រកាន់​យក​ឥរិយាបទ​អមិត្ត​ប្រឆាំង​រុស្ស៊ី ជា​ពិសេសជប៉ុន​បាន​ធ្វើការ​​ចោទប្រកាន់​គ្មាន​មូលដ្ឋាន​ប្រឆាំង​ប្រទេស​របស់​យើង​ពាក់ព័ន្ធ​នឹង​ប្រតិបត្តិការ​យោធា​ពិសេស​នៅ​អ៊ុ​យក្រែន​»​។​

​រុស្ស៊ី​កាលពី​ថ្ងៃ​០១​កក្កដា​ក៏​បាន​ចេញ​ក្រិត​មួយ​ដើម្បី​ផ្ទេរ​ភាគហ៊ុន​របស់​ជប៉ុន​នៅក្នុង​គំរោង​ប្រេង​និង​ហ្គាស Sakhalin-2​នៅ​កោះ​សាខា​លីន​(Sakhalin)​នៅ​ចុង​បូព៌ា​របស់​រុស្ស៊ី​ទៅកាន់​ការី​រុស្ស៊ី​​មួយ​ផង​ដែរ​។​

​គំរោង​នេះ​ភាគច្រើន​បញ្ជូន​ឧស្ម័ន​ធម្មជាតិ​(​ហ្គាស​)​ទៅកាន់​ជប៉ុន​។​

​រដ្ឋាភិបាល​ទីក្រុង​តូ​ក្យូ​មុននេះ​បាន​បង្ហាញ​សញ្ញា​ថា​ខ្លួន​សង្ឃឹម​រក្សាទុក​ភាគហ៊ុន​នេះ ដោយ​ថា​ការចូលរួម​ក្នុង​គំរោង​នេះ​មាន​សារសំខាន់​សំរាប់​សន្តិសុខ​ថាមពល​របស់ខ្លួន នៅពេល​ជប៉ុន​ពឹង​ខ្លាំង​លើ​ការ​នាំចូល​​ឥន្ធនៈ​ផូស៊ីល​។​

​កាលពី​ខែ​ឧសភា ក្រសួងការបរទេស​រុស្ស៊ី​បាន​និយាយថា ខ្លួន​បាន​ហាម​មិន​អោយ​មន្ត្រី​ជ​ប៉ុន​រាប់សិប​នាក់​ចូល​ក្នុងប្រទេស​ខ្លួន រួម​មាន​នាយក​រដ្ឋមន្ត្រី ហ្វ៊ុយ​មី​អុ គី​ស៊ី​ដា ព្រោះ​តែ​រដ្ឋាភិបាល​ទីក្រុង​តូ​ក្យូ​​ចូលរួម​ក្នុង​ទណ្ឌកម្ម​អន្តរជាតិ​ប្រឆាំង​រុស្ស៊ី ជុំវិញ​សង្គ្រាម​នៅ​អ៊ុ​យក្រែន​៕