​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​និង​រុស្ស៊ី​បាន​និយាយ​កាលពី​ថ្ងៃ​សុក្រ​ទី​១៥​កក្កដា​ថា ពួកគេ​នឹង​បន្ត​ជើងហោះហើរ​រួម​គ្នា​ទៅ​កាន់​ស្ថានីយ​អវកាស​អន្តរជាតិ​ដោយ​រក្សា​ផ្នែក​​មួយ​នៃ​កិច្ចសហប្រតិបត្តិការ​ចុងក្រោយ ចំពេល​មាន​ការប៉ុនប៉ង​របស់​លោកខាងលិច​ដើម្បី​ដាក់​ទីក្រុង​មូ​ស្គូ​ឱ្យ​នៅ​ឯកោ​ជុំវិញ​ការទន្ទ្រាន​ចូល​អ៊ុ​យក្រែន​។​

​ទីភ្នាក់ងារ​អវកាស​អាម៉េរិក​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ដើម្បី​ធានាបាន​នូវ​ប្រតិបត្តិការ​ប្រកប​ដោយ​សុវត្ថិភាព​នៃ​ស្ថានីយ​អវកាស​អន្តរជាតិ ការពារ​អាយុជីវិតរ​បស់​អវកាសយានិក និង​ធានាបាន​នូវ​វត្តមាន​របស់​សហរដ្ឋ​អាម៉េរិក​ជា​បន្ត​នៅ​ក្នុង​លំហ ណា​សា​នឹង​បន្ត​រួមបញ្ចូល​ក្រុម​អវកាសយានិក​នៅលើ​យានអវកាស​អាម៉េរិក​និង​យាន​អវកាស Soyuz របស់​រុស្ស៊ី​”​។​

​ណា​សាបាន​និយាយថា អវកាស​យានិក ហ្វ្រែង រូប៊ី​អូ (Frank Rubio)​នឹង​ហោះ​ជាមួយ​អវកាសយានិក​រុស្ស៊ី​ពីរ​នាក់​នៅលើ​យាន​រ៉ុក្កែត Soyuz ដែល​គ្រោង​នឹង​បាញ់​បង្ហោះ​នៅ​ថ្ងៃទី ២១​ខែ​កញ្ញា​​ពី​ប្រទេស​កា​ហ្សាក់​ស្ថាន ខណៈ​អវកាសយានិក​ម្នាក់ទៀត​ឈ្មោះ ឡូ​រ៉ាល់ អូ ហា​រ៉ា (Loral O’Hara) នឹង​បំពេញ​បេសកកម្ម​មួយទៀត​នៅ​ដើមឆ្នាំ ២០២៣​។​

​ក្នុង​បេសកកម្ម​ទីមួយ អវកាសយានិក​រុស្ស៊ី​នឹង​ចូលរួម​ជាមួយ​អវកាសយានិក​ណា​សា​នៅលើ​យាន Crew-5 ថ្មី​របស់​ក្រុមហ៊ុន SpaceX ដែល​នឹង​បាញ់​បង្ហោះ​នៅ​ខែ​កញ្ញា​ពី​រដ្ឋ​ផ្លរីដា​ជាមួយនឹង​អវកាស​​យានិក​ជប៉ុន​មួយ​រូប​ក្នុង​បេសកកម្ម​នេះ​ផងដែរ​។​

​ណា​សាបាន​និយាយថា បេសកកម្ម​រួមគ្នា​មួយទៀត​នៅ​លើ​យាន Crew-6 របស់ SpaceX នឹង​ហោះហើរ​នៅ​ដើមឆ្នាំ ២០២៣​។​

​ចំណាត់ការ​នេះ​បាន​កើតឡើង​បើទោះបីជា​ទីភ្នាក់ងារ​អវកាស​អឺរ៉ុប​កាលពីដើម​សប្តាហ៍​នេះ​បាន​ផ្តាច់ទំនាក់ទំនង​របស់ខ្លួន​ជាមួយ​រុស្ស៊ី​ក្នុង​បេសកកម្ម​ដាក់​យាន​រុករក​នៅ​លើ​ភព​ព្រះ​អង្គារ​ក៏​ដោយ​ដោយ​​ធ្វើ​ឱ្យ​ប្រធាន​អវកាស​រុស្ស៊ី​លោក ឌី​មី​ទ្រី រ៉ូ​ហ្គោ​ហ្ស៊ី​ន (Dmitry Rogozin) ខឹងសម្បា​យ៉ាងខ្លាំង ដែល​នាំឱ្យ​លោក​ហាមឃាត់​អវកាសយានិក​របស់ខ្លួន​នៅលើ​ស្ថានីយ ISS​កុំឱ្យ​ប្រើ​ដៃ​រ៉ូបូ​តផលិត​នៅ​​អឺរ៉ុប​។​

​ទីភ្នាក់ងារ​អវកាស​រុស្ស៊ី Roscosmos បាន​និយាយថា កិច្ចព្រមព្រៀង​ជាមួយ​ណា​សា​គឺ​ដើម្បី​ផលប្រយោជន៍​នៃ​ប្រទេស​ទាំង​ពីរ ហើយ​នឹង “​ជំរុញ​កិច្ចសហប្រតិបត្តិការ​” នៅលើ​លំហ​៕

​យាន​អវកាស Soyuz MS-13 របស់​រុស្ស៊ី ដែល​ដឹក​សមាជិក​នៃ​ស្ថានីយ​អវកាស​អន្តរជាតិ ត្រូវ​បាន​បាញ់​បង្ហោះ​ពី​កា​ហ្សាក់​ស្ថាន ក្នុង​ខែកក្កដា ឆ្នាំ ២០១៩