ដោយៈ ជា សីហៈ​/​ភ្នំពេញៈ កាលពី​ថ្ងៃទី ១៥ ខែ កក្កដា ឆ្នាំ ២០២២ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង នេសាទ បាន​អញ្ជើញ​ទៅ​ចូលរួម ជា​អធិបតី​រួមជាមួយ​លោក សុខ ចិន្តា​សោភា រដ្ឋមន្ត្រី​ប្រតិភូ​អម​នាយករដ្ឋមន្ត្រី អគ្គលេខា​ក្រុម ប្រឹក្សា​អភិវឌ្ឍន៍​កម្ពុជា និង​លោក ប៉ា​ប្លូ កាង (Pablo Kang) ឯកអគ្គរាជទូត​អូស្ត្រាលី​ប្រចាំ​កម្ពុជា​បានប្រកាស​ដាក់​ឲ្យ​ប្រើប្រាស់​ឧបករណ៍​ផ្សព្វផ្សាយ​របស់​តុ​វិនិយោគ​ក​សិ​-​ចំណីអាហារ ដែល​រៀបចំ​នៅ​ទីស្តីការ​ក្រុមប្រឹក្សា​អភិវឌ្ឍន៍​កម្ពុជា​។​

​ពិធី​នេះ​បានរៀបចំ​ឡើង​ដោយ​ក្រុមប្រឹក្សា​អភិវឌ្ឍន៍​កម្ពុជា សហការ​ជាមួយ​ក្រសួងកសិកម្ម ក្រសួងកសិកម្ម រុក្ខាប្រមាញ់ និង​នេសាទ ស្ថាន​ឯកអគ្គរាជទូត​អូស្ត្រាលី តាមរយ​: AusAid, CAVAC and Agri-food Investment Dest (AfiD)​។

លោក​រដ្ឋមន្ត្រី​បាន​សម្តែង​ការគាំទ្រ​នូវ​មតិ​របស់លោក សុខ ចិន្តា​សោភា និង​លោក​ឯកអគ្គរដ្ឋទូត​ដែល​បានបង្ហាញ​ពី​ជោគជ័យ​នៃ​កិច្ចសហប្រតិបត្តិការ​ប្រកប​ដោយ​ផ្លែផ្កា រួមទាំង​ការជួយ​គាំទ្រ​ពី​រដ្ឋាភិបាល​អូស្ត្រាលី​ក្នុងការ​បង្កើត​នូវ​យន្តការ​សម្របសម្រួល​តុ​វិ​និ យោគ​លើ​វិស័យ​ក​សិ​-​ចំណីអាហារ​។ ព្រមជាមួយ​គ្នា លោក​បាន​វាយតម្លៃ​ខ្ពស់​ចំពោះ​កិច្ចសហការ​យ៉ាង​ល្អប្រសើរ​ពី​គ្រប់​ដៃគូ​ពាក់ព័ន្ធ ពិសេស​ក្រុមប្រឹក្សា​អភិវឌ្ឍន៍​កម្ពុជា និង​ស្ថានទូត​អូស្ត្រាលី​ដែល​បាន​គាំទ្រ​ទាំង​បច្ចេកទេស និង​ធនធាន​ហិរញ្ញវត្ថុ​ក្នុងការ​លើកកម្ពស់​ការ​វិនិយោគ​ក្នុង​វិស័យ​កសិកម្ម និង​ក​សិ​-​ឧស្សាហកម្ម​។

​លោក​រដ្ឋមន្ត្រី​បានបង្ហាញ​ឆន្ទ​:​ចូលរួម​អបអរសាទ និង​គាំទ្រ​ក្នុង​ពិធី “​ប្រកាស​ឱ្យប្រើ​ប្រាស់​នូវ​ឧបករណ៍​ផ្សព្វផ្សាយ​របស់​តុ​វិនិយោគ​ក​សិ​-​ចំណីអាហារ​” នាពេលនេះ ហើយ​លោក​សង្ឃឹមថា​កិច្ចដំណើរការ​នេះ​ប្រាកដជា​នឹង​ផ្តល់​ផល​មកវិញ​នូវ​កំណើន​នៃ​ការវិនិយោគ​លើ​វិស័យ​ក​សិ​-​ចំណីអាហារ ព្រមទាំង​ចូលរួមចំណែក​ដល់​ការអនុវត្ត​គោ​លន​យោ បាយ​អភិវឌ្ឍន៍​ឧស្សាហកម្ម​កម្ពុជា​ឆ្នាំ​២០១៥-២០២៥ គោលនយោបាយ​ជាតិ​អភិវឌ្ឍន៍​វិស័យ​កសិកម្ម ឆ្នាំ​២០២២-២០៣០ និង​ផែនការ​យុទ្ធសាស្ត្រ​អភិវឌ្ឍ​ន៏​ក​សិ​-​ឧស្សាហកម្ម​កម្ពុជា​ឆ្នាំ​២០១៩-២០៣០ ផងដែរ​។

​លោក​រដ្ឋមន្ត្រី​បាន​រំលេច​ជូន​អង្គ​ពិ​ធិ​ឲ្យ​ឃើញថា វិស័យ​កសិកម្ម​បាននិងកំពុង​មានការ​អភិវឌ្ឍ ដោយបាន​ផលិត​ស្បៀង​លើសពី​សេចក្តីត្រូវការ​ក្នុងស្រុក ហើយ​កំពុង​ជំរុញ​គាំទ្រ និង​លើកទឹកចិត្ត​ដល់​វិស័យ​ឯកជន និង​ដៃគូ​អភិវឌ្ឍន៍​នានា​វិនិយោគ​លើ​ការកែច្នៃ ដើម្បី​ធានា​នូវ​និរន្តរភាព​នៃ​ការ ប្រើប្រាស់​វត្ថុធាតុដើម​ក្នុងស្រុក បង្កើន​តម្លៃបន្ថែម លើកកម្ពស់​គុណភាព ស្តង់ដារ​អនាម័យ សុវត្ថិភាព និង​បង្កើន​ភាព​ប្រកួតប្រជែង​។ ព្រមជាមួយ​គ្នា យើង​ក៏​ទទួលស្គាល់ថា​វិស័យ​ឯកជន នៅ​ជួបប្រទះ​បញ្ហា​ប្រឈម​ដែល​ត្រូវ​រួមគ្នា​ដោះស្រាយ​មាន​ជាអាទិ៍​៖ ប្រព័ន្ធ​ស្តុក​ទុក ឃ្លាំង​ស​ម្ងួ​ត ឃ្លាំង​ត្រជាក់ ទូរ​ត្រជាក់ បញ្ហា​ស្ថិរភាព​នៃ​ការផ្គត់ផ្គង់​អគ្គិសនី និង​ឡូ​ជី​ស្ទីក នៅមាន​ការខ្វះខាត មិនបាន​ឆ្លើយតប​តាម​សេចក្តីត្រូវការ​ជាក់ស្តែង ហើយ​ទាមទារ​ចាំបាច់​ត្រូវធ្វើ​ការគិតគូ​ដោះស្រាយ​ឲ្យ​បាន​ទាន់ពេលវេលា និង​មាន​ប្រសិទ្ធ​ភាពជា​បន្តបន្ទាប់​។​

លោក​បាន​បន្តថា​ពិធី​នេះ គឺ​ពិតជា​បានបង្ហាញ​នូវ​កិច្ចខិតខំ​ប្រឹងប្រែង​រប​ស់​យើង​ក្នុង​ការជួយ​សម្រួល និង​ដោះស្រាយ​បញ្ហា​ទាំងឡាយ ទាំងពួង​ដែល​ពាក់ព័ន្ធ​នឹង​ការសម្រួល​ដល់​ការវិនិយោគ​លើ​ផ្នែក​ក​សិ​-​ចំណីអាហារ ក៏ដូចជា​ជួយ​ដល់​វិស័យ​ក​សិ​-​ឧស្សាហកម្ម​ផងដែរ ហើយ​ជា​ប្រាកដ​កិច្ចការ​របស់​យើង​ដែល​នឹង​ត្រូវធ្វើ​ចាប់ពីពេលនេះ ក៏​នឹង​គាំទ្រ​ដល់​ការអនុវត្ត “​ក្របខណ្ឌ​យុទ្ធសាស្ត្រ និង​កម្មវិធី​ស្តារ និង​ជំរុញ​កំណើនសេដ្ឋកិច្ច​កម្ពុជា ក្នុងការ​រស់នៅ​ជាមួយ​កូ​វីដ​-១៩ តាម​គន្លង​ប្រក្រតីភាព​ថ្មី​”​។

​លោក រដ្ឋមន្ត្រី​បាន​ថ្លែងអំណរគុណ​ជូន​ចំពោះ​ដៃគូ​ពាក់ព័ន្ធ​ដែល​បាននិងកំពុង​បន្ត​ចូលរួម​គាំទ្រ និង​សហការ​ក្នុងការ​អភិវឌ្ឍ​វិស័យ​កសិកម្ម ស្របតាម​អភិក្រម “​រដ្ឋ​-​ឯកជន​-​ដៃគូ​អភិវឌ្ឍន៍ និង​សហគមន៍​” ដើម្បី​ពង្រឹង​យន្តការ​ផលិត ផ្តល់​សេវាកម្ម​ត្រួតពិនិត្យ និង​បញ្ជាក់​គុណ ភាព​សុវត្ថិភាព​ផលិតផល​កសិកម្ម​ដែល​ផលិត​តាម​ស្តង់ដារ ការអនុវត្ត​កសិកម្ម​ល្អ​កម្ពុជា ដើម្បី​បង្កើន​ជំនឿ​ទុកចិត្ត​ពី​អ្នកពាក់ព័ន្ធ​ទាំងអស់ ពិសេស​ពី​អ្នក​បរិភោគ​ក៏ដូចជា​ការអនុវត្ត​ផលិតកម្ម​កសិកម្ម​តាម​កិច្ចសន្យា​ធានាបាន​នូវ​បរិមាណ​ផលិតផល​កសិកម្ម​ដែល​ផ្គត់ផ្គង់ ប្រកបដោយ​គុណភាព សុវត្ថិភាព និង​មាន​ប្រភព​ច្បាស់លាស់​។ ជាមួយនេះ ឯកឧត្តម​រដ្ឋមន្ត្រី​បាន​អំណរគុណ​ចំពោះ​គម្រោង CAVAC និង​រដ្ឋាភិបាល​អូស្ត្រាលី​ដែល​បាន​ជួយ​ដល់​កម្ពុជា​លើ​ការសម្របសម្រួល​វិនិយោគ​ផ្នែក​ក​សិ​-​ចំណីអាហារ​នេះ​ដែលជា​ការរួមចំណែក​មួយ​ដើម្បី “​ប្រែក្លាយ​កសិករ​យើង​ទៅជា​ក​សិ​-​សហគ្រិន​” ផងដែរ​៕​