​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖​សមាជិក​សភា​ស្រីលង្កា​បាន​ជួបប្រជុំ​គ្នា​កាលពី​ថ្ងៃ​សៅរ៍​ទី​១៦​កក្កដា​ដើម្បី​ចាប់ផ្តើម​ជ្រើសរើស​មេដឹកនាំ​ថ្មី​ដើម្បី​បម្រើ​អាណត្តិ​សេសសល់​ដែល​បោះបង់​ចោល​ដោយ​​ប្រធានាធិបតី ដែល​រត់គេចខ្លួន​ទៅ​ក្រៅប្រទេស ហើយ​បាន​លាលែង​ពី​តំណែង​បន្ទាប់ពី​ការតវ៉ា​ដ៏​ធំ​ជុំវិញ​ការដួលរលំ​សេដ្ឋកិច្ច​របស់​ប្រទេស​។​

​មួយ​ថ្ងៃមុន​នេះ នាយករដ្ឋមន្ត្រី​ស្រីលង្កា​បាន​ស្បថ​ចូលកាន់​តំណែង​ជា​ប្រធានាធិបតី​បណ្តោះអាសន្ន​រហូត​ដល់​សភា​ជ្រើសរើស​អ្នកស្នង​តំណែង​ពី​លោក ហ្គោ​តាបា​យ៉ា រ៉ា​ចា​ប៉ាក់​សា (Gotabaya Rajapaksa) ដែល​អាណត្តិ​របស់​គាត់​នឹង​បញ្ចប់​នៅ​ឆ្នាំ ២០២៤​។

​ប្រធានសភា លោក ម៉ា​ហ៊ី​ន​ដា យ៉ាប៉ា អាបេ​វ៉ា​ដា​ណា (Mahinda Yapa Abeywardana) បាន​សន្យា​ឱ្យមាន​ដំណើរការ​នយោបាយ​ដ៏​ឆាប់រហ័ស​និង​តម្លាភាព ដែល​គួរ​ធ្វើ​រួច​ក្នុង​រយៈពេល​មួយ​សប្តាហ៍​។

​ប្រធានាធិបតី​ថ្មី​អាច​តែងតាំង​នាយក​រដ្ឋមន្ត្រី​ថ្មី​ដែល​បន្ទាប់មក​នឹង​ត្រូវ​អនុម័ត​ដោយ​សភា​។​

​អគ្គលេខាធិការ​សភា លោក ដាម​មី​កា ដា​សា​ណា​យ៉ាកេ (Dhammika Dasanayake) បាន​និយាយ​ក្នុង​សម័យប្រជុំ​ខ្លី​មួយ​កាលពី​ថ្ងៃ​សៅរ៍​ថា​ការតែងតាំង​សម្រាប់​ការបោះឆ្នោត​ប្រធានាធិបតី​ថ្មី​​នឹង​ត្រូវ​ធ្វើ​នៅ​ថ្ងៃ​អង្គារ ហើយ​ប្រសិនបើ​មាន​បេក្ខជន​ច្រើន​ជាង​ម្នាក់ សមាជិក​សភា​នឹង​បោះឆ្នោត​នៅ​ថ្ងៃ​ពុធ​។​

​លោក​ដា​សា​ណា​យ៉ា​កេក៏​បាន​អាន​លិខិត​លាលែង​ពី​តំណែង​របស់​លោក​ហ្គោ​តាបា​យ៉ា ឮៗ​នៅក្នុង​សភា​ផងដែរ​។​

​ក្នុង​លិខិត​នោះ លោក​រ៉ា​ចា​ប៉ាក់​សា​និយាយថា លោក​ចុះចេញ​ពី​តំណែង​តាម​សំណើ​របស់​ប្រជាជន​ស្រីលង្កា​និង​ក្រុម​មេដឹកនាំ​គណបក្សនយោបាយ​នានា​។ លោក​បាន​កត់សម្គាល់​ថា​វិបត្តិ​សេដ្ឋកិច្ច​កំពុង​​កើត​មាន​សូម្បី​នៅពេលដែល​លោក​ចូលកាន់​តំណែង​នៅ​ឆ្នាំ ២០១៩ ហើយ​ត្រូវ​បាន​ធ្វើឱ្យ​កាន់តែ​ធ្ងន់ធ្ងរ​ឡើង​ដោយ​ការបិទ​ខ្ទប់​ជា​ញឹកញាប់​ក្នុងអំឡុងពេល​ផ្ទុះ​ជំងឺ​រាតត្បាត​កូវី​ដ​៕

ប្រធានាធិបតី​បណ្តោះអាសន្ន លោក រ៉ានី​ល វីក្រេ​មេ​ស៊ីង (​ស្តាំ​) សំពះ​ស្វាគមន៍​ប្រមុខ​ក្រសួង​យុត្តិធម៌​លោក ចា​យ៉ាន​ថា ចាយ៉ា​ស៊ូរី​យ៉ា​អំឡុង​ពេល​ស្បថ​កាន់​តំណែង​នៅ​ទីក្រុង​កូឡុំបូ​កាលពី​ថ្ងៃ​សុក្រ​ទី​១៥​កក្កដា ឆ្នាំ​២០២២​