ដោយ : ប​.​ជ័យ / ប​បន្ទាយមានជ័យ​៖ កម្លាំង​អាវុធហត្ថ ក្រុង ប៉ោយប៉ែត បាន​បង្ក្រាប​ករណី រក្សាទុក និង​ប្រើប្រាស់​ដោយ​ខុសច្បាប់​នូវ​សារធាតុ​ញៀន ឃាត់ខ្លួន​ជនសង្ស័យ​ជនជាតិ​ថៃ ម្នាក់ រួម​នឹង​ថ្នាំញៀន មួយចំនួន នៅវេលា​ម៉ោង ០៣​និង​៣០​នាទី ថ្ងៃទី​១៥ ខែកក្កដា ឆ្នាំ​២០២២ នៅ​ចំណុច​ផ្សារ​រាត្រី​ទឹក​ពុះ ស្ថិត​ក្នុងភូមិ​ក្បាលស្ពាន​១ សង្កាត់​ប៉ោយប៉ែត ក្រុង​ប៉ោយប៉ែត ខេត្តបន្ទាយមានជ័យ​។​

​លោក​វរសេនីយ៍ត្រី នួន នី​ណា​រ៉ូ មេបញ្ជាការ​មូលដ្ឋាន​ក​ង​រាជ​អាវុធហត្ថ​ក្រុង ប៉ោយប៉ែត បាន​ឲ្យ​ដឹង​ថ្ងៃទី​១៦​ខែកក្កដា​ថា ជនសង្ស័យ ដែល​កម្លាំង​បាន​ឃាត់ខ្លួន​ឈ្មោះ គៀត​តិ​សាក់ ខាន​ភី​ត ភេទ​ប្រុស អាយុ​២២​ឆ្នាំ ជនជាតិ​ថៃ ជា បុគ្គលិក​កាស៊ីណូ ទីកន្លែង​កំណើត​ខេត្ត​សមុទ្រ​បាកាន ប្រទេស​ថៃ បច្ចុប្បន្ន ស្នាក់នៅ​បណ្តោះអាសន្ន​ភូមិ​អូរជ្រៅ សង្កាត់​ប៉ោយប៉ែត ក្រុង​ប៉ោយប៉ែត ខេត្តបន្ទាយមានជ័យ ។

​អ​អាវុធហត្ថ​បាន​ដកហូត​សម្ភារៈ​វត្ថុតាង​រួមមាន -​ម្សៅ​ក្រាម ពណ៌​ស​(​ខេ​ហិត​) ចំនួន​០៤​កូន​ថង់​កិប ទម្ងន់ ២,១៣​ក្រាម​, -​ថ្នាំ​គ្រាប់​រាង​មូល​ពណ៌​កាហ្វេ​(​ថ្នាំ​ក្រវី​) ចំនួន ០១​គ្រាប់​កន្លះ ទម្ងន់ ០,៥៣​ក្រាម​, -​ទូរស័ព្ទ ចំនួន ០១​គ្រឿង (​ម៉ាក realme ពណ៌​ខ្មៅ​) ។

​ជនសង្ស័យ ឈ្មោះ គៀត​តិ​សាក់ ខាន​ភី​ត បាន​សារភាពថា ខ្លួន​ពិតជា​បាន​រក្សាទុក និង​ប្រើប្រាស់​ដោយ​ខុសច្បាប់​នូវ​សារធាតុ​ញៀន​នោះ​ព្រោះ​ខ្លួន​ញៀន​ថ្នាំ មិនអាច​ខាន​បាន ហើយ​ទុក​លក់​បន្ត​ខ្លះ​ដើម្បី​បាន​ចំណេញ​ខ្លះ​ទុក​ទិញ​សេព​បន្ត ។​

​លោក​វរសេនីយ៍ឯក ជា តារា មេបញ្ជាការរង​កងរាជអាវុធហត្ថ​ខេត្ត ទទួល​ការងារ​ប្រឆាំង​គ្រឿងញៀន​បាន​ប្រាប់​ឱ្យដឹងថា :​ការបង្ក្រាប​នេះ​ដោយ​ទទួលបាន​ការអនុញ្ញាត​ពី​លោក​ឧ​ត្ត​ម​សេនីយ៍​ត្រី បោ​ន ប៊ិន មេបញ្ជាការ​កងរាជអាវុធហត្ថ​ខេត្ត និង​មានការ​សម្របសម្រួល​នីតិវិធី​ពី លោក​កើត វណ្ណា​រ៉េត ព្រះរាជអាជ្ញា អម​សាលាដំបូង​ខេត្ត​ផងដែរ ។

ជនសង្ស័យ រួម​និង​វត្ថុតាង​ត្រូវបាន​កម្លាំង​ការិយាល័យ​ប្រឆាំង​គ្រឿងញៀន​កងរាជអាវុធហត្ថ​ខេត្ត​បញ្ជូនទៅ​សាលាដំបូង​ខេត្ត អនុវត្តតាម​នីតិវិធី​ហើយ​នៅ​ថ្ងៃ​សៅរ៍ ទី​១៦ ខែកក្កដា ឆ្នាំ ២០២២៕​