​ប្រែ​សម្រួលៈ​បំណង​(​ស្ត្រេត​ថែមស៍​)៖ ក្នុងអំឡុង​កិច្ចប្រជុំ​របស់​គេ​នៅ​កោះ​បាលី​ដែល​បាន​បញ្ចប់​កាលពី​ថ្ងៃ​សៅរ៍ បណ្តា​ប្រមុខ​ហិរញ្ញវត្ថុ​មកពី​ក្រុម​ប្រទេស​មាន​សេដ្ឋកិច្ច​រីកចំរើន​ទាំង​ម្ភៃ(G-20)​បាន​សន្យា​​ដោះស្រាយ​បញ្ហា​អសន្តិសុខ​ស្បៀង តែ​នៅ​ជាប់គាំង​អំពី​តួនាទី​របស់​រុស្ស៊ី​ក្នុង​វិបត្តិ​នេះ​។​

​ពួក​រដ្ឋ​មន្ត្រី​ហិរញ្ញវត្ថុ​និង​ប្រធាន​ធនាគារ​G-20 មិន​បាន​ចេញ​សេចក្តីថ្លែងការណ៍​មួយ​ណា​មួយ​ទេ​ក្រោយ​ចប់កិច្ចប្រជុំ តែ​បាន​ព្រមព្រៀង​ច្រើន​ចំណុច​លើ​ពង្រាង​សេចក្តីថ្លែងការណ៍​របស់​ប្រធាន​អង្គប្រជុំ​ឥណ្ឌូ​​នេ​ស៊ី រួមមាន​បញ្ហា​ចាប់ពី​ស្ថិរភាព​ម៉ាក្រូសេដ្ឋកិច្ច​រហូតដល់​និរន្តរភាព​ហិរញ្ញវត្ថុ​។​

​សង្គ្រាម​របស់​រុស្ស៊ី​នៅ​អ៊ុ​យក្រែន ជា​«​បញ្ហា​មួយ​ដែល​សមាជិក​អង្គប្រជុំ​ភាគច្រើន​មិន​អាច​ស្រុះស្រួល​មតិគ្នាបាន​» នេះ​បើ​តាម​រដ្ឋមន្ត្រី​ហិរញ្ញវត្ថុ​ឥណ្ឌូនេស៊ី​លោកស្រី ស្រ៊ី មុល​យ៉ានី អ៊ី​នដ្រា​វ៉ាទី​(Mulyani Indrawati)​បាន​និយាយ​នៅ​សន្និសីទ​សារព័ត៌មាន​មួយ​។​

​ក្នុងអំឡុងពេល​ពិភាក្សា បណ្តា​មេដឹកនាំ​ហិរញ្ញវត្ថុ​មកពី​ប្រទេស​លោក​ខាងលិច​បាន​ចោទប្រកាន់​ពួក​បច្ចេកវិទ្យា​សេដ្ឋកិច្ច​រុស្ស៊ី​ថា​សមគំនិត​ជាមួយ​ការឈ្លានពាន​របស់​រដ្ឋាភិបាល​ទីក្រុង​មូ​ស្គូ​ចូល​អ៊ុ​យក្រែន​​និង​ក៏​បាន​បញ្ជាក់​ថា​សង្គ្រាម​នេះ​ជា​មូលហេតុ​នៃ​ការធ្លាក់ចុះ​សេដ្ឋកិច្ច​សកល​នាពេល​បច្ចុប្បន្ន​។​

​ចំណែក​រុស្ស៊ី​បន្ទោស​ទណ្ឌកម្ម​លោកខាងលិច​ថា​រារាំង​ការដឹកជញ្ជូន​ស្បៀង​និងការដាក់ទណ្ឌកម្មនាំ​អោយ​ឡើងថ្លៃ​ថាមពល​នៅ​ទូទាំង​ពិភពលោក​។​

​ទោះជា​យ៉ាងណា​លោកស្រី មុល​យ៉ានី បាន​និយាយថា សមាជិក​ទាំងអស់​យល់​ស្របគ្នា​ថា​ចាំបាច់​ត្រូវ​«​យកចិត្តទុកដាក់​ជា​ខ្លាំង​ឡើង​និង​បង្កើន​អន្តរាគមន៍​រួមទាំង​កែសម្រួល​គោល​នយោបាយ​ផ្គ​ត់​​ផ្គង់ស្បៀង​ដើម្បី​ដោះស្រាយ​បញ្ហា​អសន្តិសុខ​ស្បៀង​បច្ចុប្បន្ន​»​។​

​លោកស្រី​បាន​បន្ថែមថា វា​រួម​មាន​ការដកចេញ​របាំ​ង​ពាណិជ្ជកម្ម​និង​ការ​គាំពារ​និយម​ដើម្បី​ធានា​លំហូរ​ស្បៀង​អោយរ​លូ​នចេញពី​ប្រទេស​ផលិត​ទៅកាន់​កន្លែង​ត្រូវការ​។​«​វា​ជា​សញ្ញា​ខ្លាំង​ណាស់​មួយ​ចេញពី​​ពួកយើង​ទាំងអស់គ្នា​​តែ​វា​ទាមទារ​ចំណាត់ការ​មាំ​ទាំង​ណាស់​មួយ​»​ដើម្បី​សំរេចបាន​លទ្ធផល​តាម​ការចង់បាន ហើយ​ប្រទេស​ជា​សមាជិក​ទាំងអស់​នឹង​ពិចារណា​បង្កើត​កិច្ចសហប្រតិបត្តិការ​រួម​គ្នា​មួយ​​រវាង​រដ្ឋ​មន្ត្រី​ហិរញ្ញវត្ថុ​និង​កសិកម្ម​។​

​ឥណ្ឌូនេស៊ី ដែល​ព្យាយាម​រក្សា​គោលនយោបាយ​ការបរទេស​ឯករាជ្យ​និង​សកម្ម បាន​ស្វះស្វែង​រក​តុល្យភាព​នៅ​ក្នុង​ក្រុម​ដែល​បែកបាក់​គ្នា​ដោយសារតែ​សង្គ្រាម​អ៊ុ​យក្រែន ចំ​ពេល​សម្ពាធ​សេដ្ឋកិច្ច​កាន់តែ​​កើន​ឡើង​ចេញ​ពី​កំណើន​អតិផរណា​។​នៅ​ពេល​ប្រទេស​លោកខាងលិច​ជាច្រើន​ដាក់ទណ្ឌកម្ម​លើ​រុស្ស៊ី សមាជិក​G-20​ខ្លះ ដូចជា​ចិន ឥណ្ឌា​និង​អាហ្វ្រិក​ខាងត្បូង​មិន​បាន​ថ្កោលទោស​រុស្ស៊ី​ឬ​ចូលរួម​ដាក់​ទណ្ឌ​​កម្ម​ទេ​។​

​រឿង​សង្គ្រាម​រុស្ស៊ី​នៅ​អ៊ុយ​ក្រែនតែង​គ្របដណ្តប់​ក្នុង​កិច្ចប្រជុំនានា​រួមទាំង​កិច្ចប្រជុំ​នៅ​កោះបាលី​ផងដែរ​។​អនុរដ្ឋមន្ត្រី​ហិរញ្ញវត្ថុ​រុស្ស៊ី​បាន​មាន​វត្តមាន​នៅក្នុង​កិច្ចប្រជុំ​កាលពី​ចុង​សប្តាហ៍ និង​មិន​មាន​របាយការណ៍​​អំពី​ការ​ដើរចេញ​ពី​អង្គប្រជុំ​ទេ ពេល​លោក​ឡើង​ថ្លែង​កាលពី​ថ្ងៃ​សុក្រ​។​តែ​កាណាដា បាន​និយាយថា វត្តមាន​របស់​រុស្ស៊ី​នៅ​កិច្ចប្រជុំ​G-20​ហាក់​មិន​សម​ទំនង​សោះ​។​រដ្ឋ​មន្ត្រី​ហិរញ្ញវត្ថុ​កា​ណា​លោកស្រី គ្រីស​ធៀ ​ហ្វ្រី​លែន​(Chrystia Freeland)​បាន​ប្រាប់​ទៅ​តំណាង​រុស្ស៊ី​ក្នុង​អង្គប្រជុំ​ថាពួកគេ​ទទួលខុសត្រូវ​ចំពោះ​«​ឧក្រិដ្ឋកម្ម​សង្គ្រាម​នៅ​អ៊ុ​យក្រែន​»​។​

​ក្នុង​សេចក្តីថ្លែងការណ៍​បញ្ចប់​កិច្ចប្រជុំ​មួយ​កាលពី​ថ្ងៃអាទិត្យ​ទី​១៧​កក្កដា ឥណ្ឌូនេស៊ី​ទទួល​ស្គាល់​ថា​ប្រទេស​ជាច្រើន​ក្នុង​អង្គប្រជុំ​បាន​ថ្កោលទោស​ការឈ្លានពាន​របស់​រុស្ស៊ី​នៅ​អ៊ុ​យក្រែ​ននិង​អំពាវនាវ​​អោយ​រដ្ឋាភិបាល​ទីក្រុង​មូ​ស្គូ​បញ្ចប់សង្គ្រាម​៕

​តំណាង​រុស្ស៊ី​ក្នុង​កិច្ចប្រជុំ​ប្រមុខ​ហិរញ្ញវត្ថុ​G-20​នៅ​កោះ​បាលី​កាលពី​ចុង​សប្តាហ៍​