ដោយ​៖ សុវណ្ណ​កុម្ភៈ​/​ភ្នំពេញ​៖ ក្លិប​កីឡា​តេ​ក្វាន់​ដូ WT (World Taekwondo) ពិភពថ្មី​គ្រង​​តំណែង​ជើងឯក​បន្ទាប់ពី​ក្លិប​នេះ​ដណ្តើមបាន​មេដាយមាស​រហូតដល់​៥​គ្រឿង​ច្រើនជាងគេ​នៃ​ព្រឹត្តិការណ៍​ការប្រកួត​កីឡា​តេ​ក្វាន់​ដូ WT ពានរង្វាន់​ឯកអគ្គរដ្ឋទូត​សាធារណរដ្ឋ​កូរ៉េ ប្រចាំឆ្នាំ​២០២២ មាន​រហស្សនាម​ថា “Korean Ambassador’s Cup 2022 Taekwondo Competition”​។​

​ក្នុងឱកាស​ពិធី​បិទ និង​ប្រគល់​ជ័យលាភី មានការ​អញ្ជើញ​ចូលរួម​ពី​សំណាក់​លោក​បណ្ឌិត Park Heung kyeong ឯកអគ្គរដ្ឋទូត​សាធារណរដ្ឋ​កូរ៉េ​ប្រចាំ​ប្រទេស​កម្ពុជា លោក ម៉ិ​ល កាដូ អគ្គនាយករង​នៃ​អគ្គនាយកដ្ឋាន​កីឡា រដ្ឋមន្ត្រីក្រសួង​អប់រំ យុវជន និង​កីឡា លោក​បណ្ឌិត ជ្រិ​ន សុធា អគ្គលេខាធិការ​ខេ​មរ​សហព័ន្ធ​តេ​ក្វាន់​ដូ​។​

​លោក គង់ ស​ក្ខិ​ដា​ដែលជា​អគ្គលេខាធិការរង​បាន​និយាយថា ការប្រកួត​ពានរង្វាន់​ឯកអគ្គរដ្ឋទូត​សាធារណរដ្ឋ​កូរ៉េ Best of the Best 2022 មាន​ក្លិប​ចំនួន​២០ ព្រមទាំង​ក្រសួង​២ គឺ​ក្រសួងការពារជាតិ និង​ក្រសួងមហាផ្ទៃ​ដោយមាន​ក្រុម​កីឡាករ​-​កីឡាការិនី​តេ​ក្វាន់​ដូ WT និង​គ្រូបង្វឹក​ចំនួន ១៤១​នាក់ និង​គ្រូបង្វឹក​៣២​នាក់​មកពី ៦ រាជធានី​ខេត្ត​ក្រុង​សរុប​ទាំងអស់​១៧៣​នាក់​។​

​ក្លិប​កីឡា​តេ​ក្វាន់​ដូ WT ពិភពថ្មី​ឈ្នះ​ជើងឯក ដណ្តើមបាន​មេដាយមាស ៥ គ្រឿង ប្រាក់​២​គ្រឿង និង​សំរិទ្ធ ៤​គ្រឿង​, ក្លិប​កីឡា​តេ​ក្វាន់​ដូ WT BT ដណ្តើមបាន​មេដាយមាស ៤ គ្រឿង និង​សំរិទ្ធ​១​គ្រឿង​, ក្លិប​កីឡា​តេ​ក្វាន់​ដូ WT មិត្តភាព​ដណ្តើមបាន​មេដាយមាស ៣ គ្រឿង ប្រាក់​១​គ្រឿង និង​សំរិទ្ធ​២​គ្រឿង​, ក្លិប​កីឡា​តេ​ក្វាន់​ដូ WT BG ដណ្តើមបាន​មេដាយមាស ២ គ្រឿង ប្រាក់ ២​គ្រឿង និង​សំរិទ្ធ ៤​គ្រឿង និង​ក្លិប​កីឡា​តេ​ក្វាន់​ដូ WT ក្រសួងមហាផ្ទៃ​ដណ្តើមបាន​មេដាយមាស ៥ គ្រឿង និង​ប្រាក់​១​គ្រឿង​។​

​ចំពោះ​ក្លិប​កីឡា​តេ​ក្វាន់​ដូ WT ឌ្រី​ម​ស្ព័ត ដណ្តើមបាន​មេដាយមាស ១ គ្រឿង ប្រាក់​១​គ្រឿង និង​សំរិទ្ធ ៣​គ្រឿង​, ក្លិប​កីឡា​តេ​ក្វាន់​ដូ WT បក្សី​ដែក​ដណ្តើមបាន​មេដាយមាស ១ គ្រឿង ប្រាក់​១​គ្រឿង និង​សំរិទ្ធ ២​គ្រឿង​, ក្លិប​កីឡា​តេ​ក្វាន់​ដូ WT វ៉ុ​ន​ក្វាង​ដណ្តើមបាន​មេដាយមាស ១ គ្រឿង ប្រាក់​១​គ្រឿង និង​សំរិទ្ធ ២​គ្រឿង​, និង​ក្លិប​កីឡា​តេ​ក្វាន់​ដូ WT ហូ​សា​ណា​ដណ្តើមបាន​មេដាយមាស ១ គ្រឿង និង​សំរិទ្ធ ១​គ្រឿង​៕​