​ប្រែ​សម្រួលៈ​បំណង​(​ដេល្លី​ម៉េល​)៖ ជំនន់​ទឹកភ្លៀង​នៅ​ចិន​ភាគ​និរតី​និង​ពាយព្យ​បាន​បណ្តាលអោយ​ស្លាប់​មនុស្ស​១២​នាក់​និង​បង្ខំ​អោយ​មនុស្ស​រាប់ពាន់​នាក់​ផ្សេង​ទៀត​ភៀសខ្លួន នេះ​បើ​តាម​សារព័ត៌មាន​​ក្នុងស្រុក​រាយការណ៍​កា​លពី​ថ្ងៃអាទិត្យ​។​

​សារព័ត៌មាន​រដ្ឋ​CGTN​បាន​រាយការណ៍​ថា នៅក្នុង​ខេត្ត​ស៊ី​ឈ័ន​ភាគ​ពាយព្យ​ប្រទេស យ៉ាងហោច​ណាស់​មនុស្ស​៦​នាក់​បាន​ស្លាប់​និង​១២​នាក់​កំពុង​បាត់​ខ្លួន​ក្រោយ​ការ​ធ្លាក់ភ្លៀង​ខ្លាំង​បង្ក​ការ​ជន់​លិច​ភ្លាម​​ៗ​។​មនុស្ស​ប្រមាណ​១.៣០០​នាក់​ត្រូវបាន​ជម្លៀស​នៅ​ស៊ី​ឈ័ន​កាលពី​ថ្ងៃ​សៅរ៍​។​

​ក្នុងពេល​ជាមួយគ្នា​ទូរទស្សន៍​CCTV​បាន​និយាយថា ក្នុង​ទីក្រុង​ឡុង​ណាន​(Longnan)​ក្នុង​ខេត្ត​ហ្កានស៊ូ​(Gansu)​មនុស្ស​ប្រាំមួយ​នាក់​ទៀត​ក៏​បាន​ស្លាប់​ក្នុង​ទឹកជំនន់​និង​ប្រមាណ​៣.០០០​នាក់​ភៀសខ្លួន​​នៅ​ពេល​ភ្លៀង​បាន​ធ្លាក់​ខ្លាំង​បំផុត​គឺ​កំរិត​៩៨,៩​មី​លី​ម៉ែត្រ​តែ​ក្នុង​រយៈពេល​មួយ​ថ្ងៃ​កន្លះ​។​

​សូមបញ្ជាក់​ថា​ការ​ធ្លាក់ភ្លៀង​ដ៏​អាក្រក់​នេះ​កើតឡើង​ចំពេល​ផ្នែក​ផ្សេង​ទៀត​នៃ​ប្រទេស​ចិន​រួម​មាន​ខេត្ត​ជេ​ជាំង​(Zhejiang)​និង​ទីក្រុង​សៀង​ហៃ​ជួប​ការឡើង​កំដៅ​ដល់​ទៅ​៤២​អង្សា​សេ​កាលពី​សប្តាហ៍​​មុន​។​

​ពួក​អ្នកជំនាញការ​និយាយថា ព្រឹត្តិការណ៍​អាកាសធាតុ​អាក្រក់ៗ​នឹង​កាន់តែ​កើត​មាន​ញឹកញាប់​ឡើង​ដោយសារតែ​បំរែបំរួល​អាកាសធាតុ​៕

​រថយន្ត​នៅ​ក្បែរ​ស្ពាន​មួយ​ដែល​ត្រូវ​ទឹកជំនន់​បក់​ផ្តាច់​នៅតាម​ទន្លេ​មួយ​ក្នុង​ខេត្ត​ហ្កានស៊ូ​កាល​ពី​ថ្ងៃសៅរ៍​