​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ៊ុយ​ក្រែន​បាន​ប្រឈម​មុខ​នឹង​ភាពចលាចល​ថ្មី​កាលពី​ថ្ងៃអាទិត្យ​ទី​១៧​កក្កដា​នៅពេលដែល​ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី ប្រកាស​ថា​លោក​បាន​បណ្តេញ​​មន្ត្រី​អនុវត្ត​ច្បាប់កំពូល​ពីរ​រូប​របស់គាត់ នៅក្នុង​ការរុះរើ​ដ៏​ធំ​បំផុត​របស់​រដ្ឋាភិបាល​ចាប់តាំងពី​រុស្ស៊ី​បានចាប់ផ្តើម​ការ​លុកលុយ​ដ៏​សាហាវ​កាលពី​ខែ​កុម្ភៈ​។​

​ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី បណ្តេញ​អគ្គ​រដ្ឋអាជ្ញា​និង​ប្រធាន​ទីភ្នាក់ងារ​ចារកម្ម​ជាតិ​ដោយ​សង្ស័យ​ថា​ពួកគេ​ពាក់ព័ន្ធ​អំពើ​ក្បត់​

​វិបត្តិ​ក្នុងស្រុក​បាន​កើតឡើង​ខណៈ​សហភាព​អឺរ៉ុប​បាន​ត្រៀម​ពិភាក្សា​អំពី​ការ​រឹតបន្តឹង​ទណ្ឌកម្ម​ប្រឆាំង​នឹង​រុស្ស៊ី​នៅ​ថ្ងៃ​ចន្ទ​ទី​១៨​កក្កដា​នេះ​និង​ខណៈ​ដែល​រដ្ឋាភិបាល​ទីក្រុង​គៀវ​បាន​ចោទប្រកាន់​ទីក្រុង​មូ​ស្គូ​ថា​បើ​កការវាយប្រហារ​ថ្មីៗ​លើ​តំបន់​លំនៅដ្ឋាន​ជាច្រើន​នៅ​ភាគ​ខាងកើត​និង​ភាគខាងត្បូង​អ៊ុ​យក្រែន​។​

​ការវាយប្រហារ​ថ្មី​នេះ​បាន​កើតឡើង​បន្ទាប់​ពី​ទីក្រុង​មូ​ស្គូ​បាន​ប្រកាសថា​ខ្លួន​នឹង​បង្កើន​ប្រតិបត្តិការ​យោធា​របស់​ខ្លួន​ហើយ​អ៊ុយ​ក្រែន​បាន​ចោទប្រកាន់រុ​ស្ស៊ី​ថា​បាន​ដំឡើង​ជើង​ទម្រ​បាញ់​មី​ស៊ី​ល​នៅក្នុង​​រោងចក្រ​នុយក្លេអ៊ែរ​ដ៏​ធំ​បំផុត​របស់​អឺរ៉ុប​។​

​លោក​ហ្សេ​លេន​ស្គី​បាន​និយាយថា គាត់​បាន​បណ្តេញ​អគ្គ​រដ្ឋអាជ្ញា អៀ​រី​ណា វេ​ណេ​ឌី​ក​តូ​វ៉ា (Iryna Venediktova) និង​ប្រធាន​សន្តិសុខ អ៊ី​វ៉ាន់ បា​កាណូវ (Ivan Bakanov)​ចំ​ពេល​មាន​​ករណី​សង្ស័យ​ក្បត់ជាតិ​ដោយ​មន្ត្រី​អនុវត្ត​ច្បាប់​អ៊ុយ​ក្រែន​ច្រើនឡើង​។​

​នៅក្នុង​សុន្ទរកថា​ថ្នាក់​ជាតិ​មួយ លោក​ហ្សេ​លេន​ស្គី​បាន​និយាយថា ករណី​សង្ស័យ​ចំនួន ៦៥០ នៃ​អំពើ​ក្បត់ជាតិ​និង​ការជួយ​រុស្ស៊ី​ដោយ​មន្ត្រី​សន្តិសុខ​អ៊ុ​យក្រែន បច្ចុប្បន្ន​កំពុង​ត្រូវបាន​ស៊ើបអង្កេត​រួមទាំង​​ករណី​មន្ត្រី​ចំនួន ៦០ ដែល​គាត់​និយាយថា​បាន​បន្ត​រស់នៅ​ក្នុង​ទឹកដី​ដែល​កាន់កាប់​ដោយ​រុស្ស៊ី ហើយ​កំពុង​ធ្វើការ​ប្រឆាំង​នឹង​រដ្ឋ​របស់​យើង​”​។

​លោក​ហ្សេ​លេន​ស្គី​បាន​និយាយថា “​ឧក្រិដ្ឋកម្ម​ក្នុង​ចំនួន​ធំធេង​បែប​នេះ​ប្រឆាំងនឹង​មូលដ្ឋាន​គ្រឹះ​នៃ​សន្តិសុខ​ជាតិ​និង​ការភ្ជាប់​ទំនាក់ទំនង​ដែល​បាន​បង្កើត​ឡើង​រវាង​មន្ត្រី​អនុវត្ត​ច្បាប់​អ៊ុយ​ក្រែ​ន​និង​សេវា​​កម្ម​ពិសេស​របស់​រុស្ស៊ី បាន​ដាក់​ជា​សំណួរ​ធ្ងន់ធ្ងរ​ដល់​មេដឹកនាំ​ពាក់ព័ន្ធ​”​។​

“​សំណួរ​នីមួយៗ​នឹង​ត្រូវ​បាន​ឆ្លើយ​ជូន​”​។​

​លោក​ហ្សេ​លេន​ស្គី​ក៏​បាន​គូសបញ្ជាក់​ផងដែរ​អំពី​កម្លាំង​យោធា​ដ៏​បំផ្លិចបំផ្លាញ ដែល​ក្រុង​មូ​ស្គូ​បាន​ប្រើ​ប្រឆាំង​នឹង​អ៊ុ​យក្រែន ដោយ​និយាយថា គិត​ត្រឹម​ថ្ងៃអាទិត្យ​កងកម្លាំង​រុស្ស៊ី​បាន​បាញ់​មី​ស៊ី​ល​ឆ្លង​ទ្វីប​​ជាង ៣.០០០ គ្រាប់​លើ​គោលដៅ​ក្នុង​ប្រទេស​អ៊ុ​យក្រែន​។​

​ជាមួយ​នឹង​ជម្លោះ​កំពុង​កើត​ឡើង​ជា​បន្ត​និង​រីក​រាលដាល​កាន់តែ​ខ្លាំង​ឡើង​ចូលទៅ​ក្នុង​វិបត្តិ​ថាមពល​និង​អាហារ​ពិភពលោក រដ្ឋមន្ត្រីការបរទេស​សហភាព​អឺរ៉ុប​កំពុង​ពិចារណា​លើ​ការហាមឃាត់​ការទិញ​​មាស​ពី​រុស្ស៊ី ហើយ​ឥស្សរជន​រុស្ស៊ី​ច្រើន​រូប​ទៀត​ក៏​អាច​ត្រូវ​ដាក់​ក្នុង​បញ្ជីខ្មៅ​របស់​សហភាព​អឺរ៉ុប​ដែរ​៕

​រដ្ឋាភិបាល​ទីក្រុង​គៀវ​បាន​ចោទប្រកាន់​ទីក្រុង​មូ​ស្គូ​ថា​បើ​កការវាយប្រហារ​ថ្មីៗ​លើ​តំបន់​លំនៅដ្ឋាន​ជាច្រើន​នៅ​ភាគ​ខាងកើត​និង​ភាគខាងត្បូង​អ៊ុ​យក្រែន​