ប្រែ​សម្រួលៈ​បំណង​(ST)៖ ពួក​អ្នក​ពន្លត់ភ្លើង​បាន​និង​កំពុង​ខិតខំ​ទប់ទល់​ភ្លើងព្រៃ​ដែល​កំពុង​វាតទី​នៅ​ពាសពេញ​អឺរ៉ុប​ភាគ​និរីកាល​ពី​ថ្ងៃអាទិត្យ​នៅ​ពេលរលក​កំដៅ​មួយ​មិន​បាន​ជួយ​អោយ​អណ្តាត​​ភ្លើង​ថមថយ​ទេ ហើយ​សីតុណ្ហភាព​នៅ​អង់គ្លេស​ឡើង​ជិត​ដល់​កំរិត​ខ្ពស់​បំផុត​មិន​ដែល​ធ្លាប់​មាន​។​

​ភ្លើងព្រៃ​កំពុង​កើតមាន​នៅ​បារាំង ក្រិច ព័រទុយហ្កាល់ និង​បារាំង ដោយ​វា​បាន​បំផ្លាញ​ដី​រាប់ពាន់​ហិច​តា​បង្ខំ​អោយ​មនុស្ស​រាប់​ម៉ឺន​នាក់​ចេញពីផ្ទះ​និង​បានសម្លាប់​បុគ្គលិក​ផ្នែក​គ្រាអាសន្ន​មួយចំនួន​​ចាប់តាំងពី​សប្តាហ៍​មុន​មក​។​

​វា​ជា​រលក​កំដៅ​ទី​ពីរ​ដែល​វាយប្រហារ​ផ្នែក​ខ្លះ​នៃ​អឺរ៉ុប​ខាងត្បូង​នៅ​រយៈពេល​ប៉ុន្មាន​សប្តាហ៍​មក​នេះ​។​ពួក​អ្នកវិទ្យាសាស្ត្រ​បន្ទោស​លើ​ការប្រែប្រួល​អាកាសធាតុ​និង​ព្យាករណ៍​ថា​នឹង​មាន​ព្រឹត្តិការណ៍​អាកាសធាតុ​​អាក្រក់​ខ្លាំងៗ​កាន់តែ​ញឹកញាប់​ទៅ ដូចជា​រលក​កំដៅ​និង​ភាពរាំងស្ងួត​។​

​ក្រុម​អគ្គិភ័យ​នៅ​តំបន់​ជី​រ៉ុន​(Gironde)​របស់​បារាំង​ភាគ​និរតី​កំពុង​តស៊ូ​គ្រប់គ្រង​ភ្លើងព្រៃ​ពីរ​កន្លែង​ដែល​បាន​បំផ្លាញ​ព្រៃ​អស់​ប្រមាណ​១១.០០០​ហិច​តា​ចាប់តាំងពី​ថ្ងៃ​អង្គារ​សប្តាហ៍​មុន​មក​។​វា​ក៏​បង្ខំ​​អោយ​មនុស្ស​ជាង​១៤.០០០​នាក់ រួម​មាន​អ្នកស្រុក​និង​អ្នកទេសចរ​ភៀសខ្លួន ដោយ​ជម្រក​បណ្តោះអាសន្ន​ចំនួន​ប្រាំពីរ​ត្រូវបាន​បង្កើតឡើង​។​

​ផ្នែក​ឧតុនិយម​បារាំង​ព្យាករណ៍​ថា សីតុណ្ហភាព​ឡើងដល់​៤០​អង្សា​សេ​នៅ​ផ្នែក​ខ្លះ​នៅ​បារាំង​ខាងត្បូង​នៅ​ថ្ងៃអាទិត្យ​ទី​១៧​កក្កដា ហើយ​កំដៅ​ឡើង​ថែម​ទៀត​នៅ​ថ្ងៃ​ចន្ទ​ទី​១៨​កក្កដា​។​

​កំដៅ​ក៏​ទំនង​ជា​បាន​បង្ក​ការបាក់​ទឹកកក​នៅ​ជួរ​ភ្នំ​អាល់​ភី​ន​(Alpine)​នៅ​អ៊ីតាលី​ដោយ​សម្លាប់​មនុស្ស​១១​នាក់​ផង​ដែរ​។​

​ក្នុងពេល​ជាមួយគ្នា អាជ្ញាធរ​អេស្បាញ​បាន​រាយការណ៍​ភ្លើងព្រៃ​ប្រមាណ​២០​កន្លែង​កំពុង​ឆាបឆេះ​ហួស​ពី​ការ​អាច​គ្រប់គ្រង​បាន​នៅ​ផ្នែក​ផ្សេងៗ​នៃ​ប្រទេស​ចាប់ពី​ភាគខាងត្បូង​ដល់​តំបន់​ហ្កាលី​សា​( Galicia)​នៅ​ចុង​ពាយព្យ​ប្រទេស កន្លែង​ដែល​ភ្លើង​បំផ្លាញ​ព្រៃ​អស់​ប្រមាណ​៤.៥០០​ហិច​តា​។​

​អគ្គិភ័យ​នៅ​អេស្បាញ​នេះ​បាន​បណ្តាលអោយ​មាន​ការ​ជម្លៀស​មនុស្ស​ជាង​៣​ពាន់​នាក់​។​

​ក្នុងពេល​ជាមួយគ្នា សីតុណ្ហភាព​ត្រូវ​រំពឹងថា​នឹង​ឡើងដល់​៤២​អង្សា​សេ​នៅ​ទីក្រុង​ឡូហ្គ្រោ​ណូ​(Logrono)​និង​៤០​អង្សា​នៅ​ក្រុង​ម៉ា​ឌ្រី​ដ រួម​ទាំង​ទីក្រុង​សេ​វី​ល​(Seville)​។​អ្នក​បោសសម្អាត​វ័យ​៦០​ឆ្នាំ​ម្នាក់​​ត្រូវបាន​រាយការណ៍​ថា​ស្លាប់​ដោយសារ​កំដៅ​កាលពី​ថ្ងៃ​សៅរ៍​។​

​ការប្រយុទ្ធ​ទល់នឹង​ភ្លើងព្រៃ​ក៏​បណ្តាល​អោយ​បាត់បង់​អាយុជីវិត​បុគ្គលិក​ផ្នែក​គ្រាអាសន្ន​មួយចំនួន រួមមាន​អាកាសយានិក​ម្នាក់​នៅពេល​យន្តហោះ​ដឹក​ទឹក​របស់​គាត់​ធ្លាក់​នៅ​ព័រទុយហ្កាល់ និង​ពីរ​នាក់​​ទៀត​ស្លាប់​នៅ​ក្រិច​នៅពេល​ឧទ្ធម្ភាគចក្រ​ដឹក​ទឹក​របស់គេ​ធ្លាក់​ចូល​ក្នុង​សមុទ្រ​។​

​នៅ​ព័រទុយហ្កាល់ មួយ​ប្រទេស​ស្ថិតក្នុង​ស្ថានភាព​ប្រុងប្រយ័ត្ន​ខ្ពស់​អំពី​ភ្លើងព្រៃ​ទោះជា​សីតុណ្ហភាព​ធ្លាក់ចុះ​បន្តិច ក្រោយ​វា​ឡើងដល់​៤៧​អង្សា​សេ​កាលពី​ថ្ងៃ​ព្រហស្បតិ៍​សប្តាហ៍​មុន​។​មាន​ភ្លើង​ព្រៃធំ​តែ​មួយ​កំពុង​​បន្ត​ឆេះ​កាលពី​ថ្ងៃអាទិត្យ​។​

​នៅ​ក្រិច សេវា​ការពារ​ស៊ីវិល​បាន​តស៊ូ​នឹង​ភ្លើងព្រៃ​នៅលើ​កោះ​ក្រេត​(Crete)​តាំងពី​ថ្ងៃ​សុក្រ​មក​និង​អាច​គ្រប់គ្រង​វា​បាន​ហើយ​។​

​នៅ​ចក្រភព​អង់គ្លេស អាជ្ញាធរ​កំពុង​ព្រមាន​អំពី​កំដៅ​ខ្លាំង​បំផុត ដោយ​ប្រាប់​ប្រជាជន​អោយ​ប្រយ័ត្នប្រយែង​ជីវិត​របស់​គេ​។​ការិយាល័យ​ឧតុនិយម​បាន​និយាយថា​អាកាសធាតុ​នៅ​អង់គ្លេស​ខាងត្បូង​អាច​​នឹង​ឡើង​ដល់​៤០​អង្សា​សេ​ជា​លើកដំបូង​នៅ​ថ្ងៃ​ចន្ទ​ឬ​អង្គារ ជាហេតុ​បណ្តាល​អោយ​មាន​ការបិទ​សាលារៀន​ខ្លះ​៕

​អាកាសធាតុ​ក្តៅ​និង​ភ្លើងព្រៃ​ដ៏​អាក្រក់​កំពុង​វាយប្រហារ​ផ្នែក​ជាច្រើន​នៃ​អឺរ៉ុប​ភាគ​និរតី​