​ប្រែ​សម្រួលៈ​បំណង​(ST)៖ ប្រធានាធិបតី​ស្តីទី​របស់​ស្រីលង្កា​លោក រ៉ានី​ល វិក​ក្រេមេ​ស៊ីង បានប្រកាស​ស្ថានភាព​គ្រាអាសន្ន​មួយ​កាលពី​យប់​ថ្ងៃអាទិត្យ នៅពេល​រដ្ឋាភិបាល​រប​ស់លោក​ស្វះស្វែង​បញ្ចប់​ចលាចល​​សង្គម​និងចាប់ផ្តើម​ដោះស្រាយ​វិបត្តិ​សេដ្ឋកិច្ច​។​

​តាមពិត​ពួក​មេដឹកនាំ​ស្រីលង្កា​ធ្លាប់បាន​ប្រកាស​ដាក់​ប្រទេស​ក្នុងស្ថានភាព​គ្រាអាសន្ន​ជាច្រើនលើក​ចាប់តាំងពី​ខែ​មេសា ចំ​ពេល​មាន​ការតវ៉ា​ប្រឆាំង​របស់​មហាជន​ប្រឆាំងនឹង​ដំណោះស្រាយ​របស់​​រដ្ឋាភិបាល​ចំពោះ​វិបត្តិ​សេដ្ឋកិច្ច​និង​កង្វះ​ទំនិញ​ចាំបាច់​ដ៏​អូសបន្លាយ​ពេល​។​

​សេចក្តីប្រកាស​មួយ​សរសេរថា​«​វា​ជា​មធ្យោបាយ​​បន្ទាន់​ក្នុងការ​ធ្វើ​ដូច្នេះ ដើម្បី​ផលប្រយោជន៍​សន្តិសុខ​សាធារណៈ ការពារ​សណ្តាប់ធ្នាប់​សាធារណៈ​និង​ការរក្សា​ការផ្គត់ផ្គង់​រួម​ទាំង​ការផ្តល់​សេវា​ចាំ​​បាច់​ដល់​ជីវិត​សហគមន៍​»​។​

​បុរស​ម្នាក់​កាន់​ទង់ជាតិ​ស្រីលង្កា​ក្នុងអំឡុងពេល​តវ៉ា​មួយ​នៅក្បែរ​ការិយាល័យ​ប្រធានាធិបតី​ក្នុង​ទីក្រុង​កូឡុំបូ​កាលពី​ថ្ងៃ​អាទិត្យទី១៧​កក្កដា ។​ចលនា​តវ៉ា​ប្រឆាំង​នៅ​ស្រីលង្កា​បាន​ឈាន​ដល់​ថ្ងៃទី​១០០​របស់​វា​កាលពី​​ថ្ងៃអាទិត្យ​

​លោក វិក​ក្រេមេ​ស៊ីង បានប្រកាស​ស្ថានភាព​គ្រាអាសន្ន​មួយ​ផង​ដែរ​កាលពី​សប្តាហ៍​មុន ក្រោយ​ពី​ប្រធានាធិបតី ហ្គោ​តាបា​យ៉ា រ៉ា​ចា​ប៉ាក់​សា ភៀសខ្លួន​ចេញពី​ប្រទេស​ដើម្បី​គេចចេញ​ពី​ការបះបោរ​ប្រឆាំង​​រដ្ឋាភិបាល​របស់​លោក​។​

​គេ​មិនដឹងថា​តើ​បទបញ្ជា​នោះ​ត្រូវបាន​ដកចេញ ឬ​ប្រកាស​ថែម​មួយ​ទៀត ឬក៏​ថា​តើ​លោក វិក​ក្រេមេ​ស៊ីង បាន​ចេញ​បញ្ជា​ជា​ថ្មី​ក្នុងនាម​លោក​ជា​ប្រធានាធិបតី​ស្តីទី​ក្រោយ​ការស្បថ​ចូលកាន់​តំណែង​កាល​​ពី​ថ្ងៃ​១៥​កក្កដាឬយ៉ាងណា​។​

​សូមបញ្ជាក់​ថា សភា​ស្រីលង្កា​កាលពី​ថ្ងៃ​សៅរ៍​បានចាប់ផ្តើម​ដំណើរការ​ជ្រើសរើស​ប្រធានាធិបតី​ថ្មី​មួយ​រូប និង​ការដឹកជញ្ជូន​ប្រេង​។​លោក រ៉ានី​ល វិក​ក្រេមេ​ស៊ីង ដែល​ជា​សម្ពន្ធមិត្ត​របស់​អតីត​ប្រធានាធិបតី​​រ៉ា​ចា​ប៉ាក់​សា ក៏​ជា​បេក្ខជន​ម្នាក់ តែ​ពួក​អ្នក​ប្រឆាំង​តវ៉ា​ក៏​ចង់អោយ​លោក​ចុះចេញ​ពី​តំណែង​ផងដែរ​៕​