ដោយៈ ចាន់តូ / ភ្នំពេញ​៖ សមត្ថកិច្ច​ខណ្ឌឫស្សីកែវ បាននាំគ្នា​គាស់​សព​បុរស​ជនជាតិ​ខ្មែរ អ៊ិ​ស្លាម​ម្នាក់ យកមក​ត្រួតពិនិត្យ និង​ធ្វើ​កោសល្យវិច័យ ទាំង​ភ្លៀង បន្ទាប់ពី​បែកធ្លាយ​រឿង ឃាតកម្ម ដោយ​សង្ស័យថា ប្អូនស្រី​របស់​សព ជា​អ្នក​ចាក់​សម្លាប់ បន្ទាប់ពី​មានទំនាស់​គ្នា ក្នុង​គ្រួសារ​។

​ការ​គាស់​សព យកមក​ធ្វើ​កោសល្យវិច័យ​នេះ បានធ្វើ​ឡើង កាលពី​វេលា​ម៉ោង​ប្រមាណ ៣​និង​៣០​នាទី រសៀល ថ្ងៃទី​១៨ ខែកក្កដា ឆ្នាំ​២០២២ នៅ​ចំណុច​ដី​សហគមន៍ ស្ថិតនៅ​ភូមិ -​សង្កាត់​ច្រាំង​ចំរេះ​ទី​២ ខណ្ឌឫស្សីកែវ បន្ទាប់ពី​មានការ​សង្ស័យថា ជា​រឿង​ឃាតកម្ម​។ ទន្ទឹមនឹងនោះ ស្រី​ម្នាក់​ដែល​គេ​ស្គាល់​ថា ជា​ប្អូនស្រី​របស់​សព ត្រូវបាន​សមត្ថកិច្ច​ខ​ណ្ឌ ឫស្សីកែវ ឃាត់ខ្លួន​ពីបទ ជាប់​សង្ស័យថា បាន​ចាក់​សម្លាប់​បងប្រុស​រប​ស់​ខ្លួន​។​

​សព​ដែល​សង្ស័យថា ប្អូនស្រី​ចាក់​សម្លាប់​នោះ ឈ្លោះ ឡោះ សុខ​គ្រី ភេទ​ប្រុស អាយុ ៤១​ឆ្នាំ មានមុខ​របរ លាង​ម៉ូតូ មាន​លំនៅ នៅ​ភូមិ​-​សង្កាត់​ច្រាំង​ចំរេះ​ទី​២ ខណ្ឌឫស្សីកែវ ។ ចំណែក ប្អូនស្រី​ដែល​ជាប់​សង្ស័យ ឈ្មោះ ឡោះ ស៊ី​ម៉ាស់ អាយុប្រមាណ ៣៧ ឆ្នាំ​។​

​តាម​ព័ត៌មាន បានឱ្យដឹងថាៈ បុរស​ខ្មែរ​អ៊ិ​ស្លាម​ម្នាក់​នោះ បាន​ស្លាប់​ទាំង​អាថ៌កំបាំង កាលពី​វេលា​ម៉ោង ប្រមាណ ១០​និង​៣០​នាទី យប់​ថ្ងៃទី​១៧ ខែកក្កដា ឆ្នាំ​២០២២ ហើយ នៅ​ព្រឹក​ថ្ងៃទី​១៨ ខែកក្កដា ឆ្នាំ​២០២២ ស្ត្រី​ជា​ម្តាយ​ឈ្មោះ ម៉ើ ហ្វា​ល់ អាយុ ៧២ ឆ្នាំ បាន​ព្យាយាម​លាក់បាំង​ការពិត បានធ្វើ​លិខិត​គោរព​ចូលទៅ​អនាម័យ​ខណ្ឌឫស្សីកែវ ដើម្បី សុំ​បញ្ចុះសព ដោយ​អះអាងថា កូនប្រុស​របស់ខ្លួន បាន​ស្លាប់​ដោយសារតែ​ជំងឺ​សួត រយៈពេល ១០ ឆ្នាំ​មកហើយ ។​

​បន្ទាប់ពី​បញ្ចុះសព​រួច​ក៍​មានការ​ភ្ញាក់ផ្អើល និង​មានការ​សង្ស័យ ពី​អ្នកជិតខាង​ជាខ្លាំង ហើយ សមត្ថកិច្ច ក៍បាន​ចុះសាកសួរ មានការ​សង្ស័យ​ជា​រឿង​ឃាតកម្ម ក៍បាន​ឃាត់ខ្លួន​ស្ត្រី ជា​ប្អូន ស្រី​នោះ នា​វេលា​ថ្ងៃត្រង់ និង​ឈានទៅ​គាស់​សព យកមក​ត្រួតពិនិត្យ និង​ធ្វើ​កោសល្យវិច័យ តែម្ដង​។​

​តាម​ព័ត៌មាន បានដឹង​ទៀតថាៈ នៅ​មុនពេល​កើតហេតុ ប្អូនស្រី បាន​បង្ខំ​បង​ឱ្យ​លេបថ្នាំ បងអត់​លេប ក៍​មានទំនាស់​គ្នា ឈានទៅ​ចាក់​សម្លាប់​បង​នឹង​កូនកាំបិត​តែម្តង​។ ទោះបីជា​យ៉ាងណា ស្ត្រី​ជា​ប្អូន ពុំទាន់​សារភាព​នៅឡើយ​៕/V