ប្រែ​សម្រួលៈ​បំណង​(​ដេល្លី​ម៉េល​)៖ មន្ត្រី​គយ​ម៉ាឡេស៊ី​បាន​និយាយ​កាលពី​ថ្ងៃ​ចន្ទ​ថា​ពួក​គេ​ចាប់បាន​ផ្នែក​នៃ​រាងកាយ​សត្វ​កម្រ​ទម្ងន់​ជាង៦.០០០​គីឡូក្រាម ដែល​មាន​តំលៃ​លើ​ទីផ្សារ​ងងឹត​ប្រមាណ​១៨​លាន​ដុល្លារ​​ហើយ​ត្រូវ​គេ​គិតថា​វា​ត្រូវ​បាន​លួច​នាំ​មក​ពី​អាហ្វ្រិក​។​

​ប្រទេស​អាស៊ី​អាគ្នេយ៍​មួយ​នេះ​ជា​មជ្ឈមណ្ឌល​មួ​យនៃ​ការជួញដូរ​សត្វព្រៃ ដោយ​ផ្នែក​នៃ​រាងកាយ​របស់​វា​ត្រូវបាន​ដឹក​ជញ្ជូន​កាត់​ប្រទេស​ឆ្ពោះទៅ​កាន់​ទីផ្សារ​ក្នុង​តំបន់​។​

​អាជ្ញាធរ​បាន​បង្ក្រាប​ការប៉ុនប៉ង​លួច​ដឹកជញ្ជូន​ផ្នែក​នៃ​រាងកាយ​សត្វ​កម្រ​នេះកាលពី​ថ្ងៃ​១០​កក្កដា ហើយ​បាន​រកឃើញ​ទំនិញ​ខុសច្បាប់​នេះ​នៅ​កំពង់ផែ​ក្លាង​(Klang)​នៅ​ឆ្នេរ​ខាងលិច​របស់​ប្រទេស ដោយ​​បង្កប់​ជាមួយ​ឈើ​នៅ​ក្នុង​កុងតេ​នឺមួយ​។​

​ទំនិញ​ដែល​រឹបអូស​មាន​ទម្ងន់​ជាង​៦​តោន រួម​មាន​ភ្លុក​ដំរី​ប្រមាណ​៦.០០០​គីឡូក្រាម កុយ​រមាស​២៩​គីឡូក្រាម ស្រកា​ពង្រូល​១០០​គីឡូក្រាម លលាដ៍​និង​ឆ្អឹង​សត្វ​៣០០​គីឡូក្រាម​។​មិន​មាន​ការចាប់ខ្លួន​មនុស្ស​​ពាក់ព័ន្ធ​នឹង​ទំនិញ​ខុសច្បាប់​ជាង​៦​តោន​នេះ​ទេ​។​

​មន្ត្រី​គយ​ម៉ាឡេស៊ី​បានអោយដឹងថា ទំនិញ​ដែល​រឹបអូស​នេះ​មាន​តំលៃ​ប្រមាណ​៨០​លាន​រីង​ហ្គី​ត​(១៨​លាន​ដុល្លារ​) និង​ត្រូវ​គេ​ជឿ​ថា​មកពី​អាហ្វ្រិក ហើយ​ម៉ាឡេស៊ី​មិនមែន​ជា​គោលដៅ​ចុងក្រោយ​របស់​វា​ទេ​។​

​សូមបញ្ជាក់​ថា ផ្នែក​នៃ​រាងកាយ​សត្វ​កម្រ​ដូចជា ភ្លុក​ដំរី​និង​ស្រកាពង្រូល​មាន​ការពេញនិយម​(​ត្រូវប៉ាន់​)​ក្នុង​បណ្តា​ប្រទេស​អាស៊ី ជាពិសេស​ចិន​និង​វៀតណាម​ដោយ​គេ​ប្រើ​វា​ជា​ឳ​សថ​បុរាណ​និង​គ្រឿង​លម្អ​៕

​គយ​ម៉ាឡេស៊ី​បង្ហាញ​ភ្លុក​ដំរី កុយ​រមាស ស្រកាពង្រូល​ព្រមទាំង​ឆ្អឹង​សត្វ ដែល​មាន​តំលៃ​១៨​លាន​ដុល្លារ