ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កាលពី​ថ្ងៃ​ចន្ទ​ទី​១៨​កក្កដា រដ្ឋមន្ត្រីការបរទេស​សហភាព​អឺរ៉ុប (EU)​បាន​ព្រមព្រៀង​គ្នា​លើ​ថវិកា​ចំនួន ៥០០ លាន​អឺរ៉ូ (៥០៤ លាន​ដុល្លារ​)​ផ្សេង​ទៀត​នៃ​មូលនិធិ​​សហភាព​អឺរ៉ុប ដើម្បី​ផ្គត់ផ្គង់​អាវុធ​ដល់​អ៊ុ​យក្រែន ដោយ​នាំ​ឱ្យ​ជំនួយ​ផ្នែក​សន្តិសុខ​របស់​ប្លុក​នេះ​ឈានដល់ ២,៥ ពាន់​លាន​អឺរ៉ូ ចាប់តាំងពី​រុស្ស៊ី​បាន​លុកលុយ​អ៊ុយ​ក្រែន​កាលពី​ថ្ងៃទី ២៤ ខែ​កុម្ភៈ​។​

​រដ្ឋមន្ត្រីការបរទេស​ស៊ុយអែត​លោកស្រី អាន លីន​ដេ (Ann Linde)​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ថ្ងៃនេះ​នៅ​ឯ​កិច្ចប្រជុំ​រដ្ឋមន្ត្រីការបរទេស​សហភាព​អឺរ៉ុប​កិច្ចព្រមព្រៀង​នយោបាយ​​មួយ​ត្រូវ​បាន​សម្រេច​ស្តីពី​ជំនួយ​យោធា​លើក​ទី​ប្រាំ​ដល់​អ៊ុ​យក្រែន​”​។​

​លុយ​នេះ​គួរតែ​ជួយ EU​បន្ត​រួម​គ្នា​ទិញ​ឧបករណ៍​និង​គ្រឿង​ផ្គត់ផ្គង់​សម្រាប់​យោធា​អ៊ុ​យក្រែន រួម​ទាំង​អាវុធ​សាហាវៗ ដែល​ប្លុក​នេះ​និយាយថា​គួរតែ​ប្រើប្រាស់​សម្រាប់​គោលបំណង​ការពារ​ខ្លួន​។​

​ជាធម្មតា​ច្បាប់​របស់​សហភាព​អឺរ៉ុប​គឺ​រារាំង​ប្លុក​នេះ​មិន​ឱ្យ​ប្រើប្រាស់​ថវិកា​រយៈពេល​ប្រាំពីរ​ឆ្នាំ​របស់​ខ្លួន​ដើម្បី​ផ្តល់​មូលនិធិ​ដល់​ប្រតិបត្តិការ​យោធា​នោះទេ ប៉ុន្តែ​អ្វី​ដែល​គេ​ហៅថា មណ្ឌល​សន្តិភាព​អឺរ៉ុប​ដែល​​មាន​ថវិកា​កំណត់ ៥ ពាន់​លាន​អឺរ៉ូ គឺ​ស្ថិតនៅ​ក្រៅ​ថវិកា​នោះ ហើយ​អាច​ប្រើប្រាស់​ដើម្បី​ផ្តល់​ជំនួយ​ផ្នែក​យោធា​បាន​។​

​សហភាព​អឺរ៉ុប​បានអនុម័ត​ការផ្តល់​ជំនួយ​ជា​លើកដំបូង បន្ទាប់​ពី​ការ​លុកលុយ​របស់​រុស្ស៊ី​បាន​ចាប់ផ្តើម​នៅក្នុង​អ្វី​ដែល​ត្រូវ​បាន​ពណ៌នា​ដោយ​ក្រុម​មន្ត្រី​សហភាព​អឺរ៉ុប​ថា​ជា​ពេលវេលារ​បត់​សម្រាប់​ប្លុក​​មួយ​នេះ ដែល​ព្រួយ​ជា​យូរ​មក​ហើយ​ចំពោះ​ការចូលរួម​ផ្នែក​យោធា​ហួស​ពី​ព្រំដែន​របស់​ខ្លួន​។​

​ទោះយ៉ាងណា ជាមួយ​នឹង​ថវិកា​ពាក់កណ្តាល​នៃ​មណ្ឌល​សន្តិភាព​នេះ​ត្រូវបាន​ផ្តល់​ឱ្យ​អ៊ុយ​ក្រែន​រួច​បន្ទាប់​ពី​រយៈពេល​ប្រាំ​ខែ​គេ​មិន​ច្បាស់​ទេ​ថា​តើ​សហភាព​អឺរ៉ុប​នឹង​អាច​បន្ត​ផ្តល់​ហិរញ្ញប្បទាន​ដល់​​ការទិញ​និង​ការ​ចែកចាយ​សព្វាវុធ​និង​ឧបករណ៍​ផ្សេងទៀត​យ៉ាងដូចម្តេច ប្រសិនបើ​ការឈ្លានពាន​របស់​រុស្ស៊ី​នៅតែ​បន្ត​។​

​អ្នកការទូត​កំពូល​របស់​សហភាព​អឺរ៉ុប​លោក យ៉ូ​សេប បូរែ​ល (Josep Borrell)​បាន​ប្រាប់​សន្និសីទ​សារព័ត៌មាន​ថា សង្គ្រាម​ទំនងជា​នឹង​បន្ត​ទៅមុខ​ទៀត​។ លោក​បាន​ព្យាយាម​បង្ហាញ​ដល់​អ៊ុយ​ក្រែនថា EU មិន​បោះបង់​ចោល​នោះឡើយ ដោយ​បន្ថែម​ថា លោក​រំពឹង​ថា ឯកអគ្គរដ្ឋទូត​សហភាព​អឺរ៉ុប​នឹង​អនុម័ត​ការហាមឃាត់​ការ​នាំចូល​ថ្មី​របស់​សហភាព​អឺរ៉ុប​លើ​មាស​រុស្ស៊ី​នៅ​ចុង​សប្តាហ៍​នេះ​៕

​អ្នកការទូត​កំពូល​របស់​សហភាព​អឺរ៉ុប​លោក យ៉ូ​សេប បូរែ​ល និយាយ​ថា​សង្គ្រាម​ទំនងជា​នឹង​បន្ត​ទៅមុខ​ទៀត​

អឺរ៉ុបផ្តល់ជំនួយយោធាអស់២,៥ ពាន់​លាន​អឺរ៉ូហើយសំរាប់អ៊ុយក្រែន ចាប់តាំងពី​រុស្ស៊ី​បាន​លុកលុយ​អ៊ុយ​ក្រែន​កាលពី​ថ្ងៃទី ២៤ ខែ​កុម្ភៈ