​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ព្រះអង្គម្ចាស់​ហារី​របស់​ចក្រភព​អង់គ្លេស​បាន​មានបន្ទូល​ប្រាប់​អង្គការសហប្រជាជាតិ​កាលពី​ថ្ងៃ​ចន្ទ​ទី​១៨​កក្កដា​ថា​ការលុបចោល​សិទ្ធិ​រដ្ឋធម្មនុញ្ញ​មួយ​នៅ​​ក្នុង​សហរដ្ឋ​អាម៉េរិក​គឺជា​ផ្នែក​នៃ “​ការវាយប្រហារ​ជា​សកល​លើ​លទ្ធិប្រជាធិបតេយ្យ​និង​សេរីភាព​”​។​

​ព្រះអង្គម្ចាស់ បាន​ថ្លែង​សុន្ទរកថា​បែបនេះ​ទៅកាន់​មហាសន្និបាត​អ​.​ស​.​ប​នៅ​ទីក្រុង​ញូវយ៉ក​ក្នុង​ព្រឹត្តិការណ៍​មួយ​ដែល​ប្រារព្ធ​ទិវា​អន្តរជាតិ​នែ​ល​សុន ម៉ង់​ដេ​ឡា (Nelson Mandela) ។​

​ព្រះអង្គម្ចាស់​បាន​មានបន្ទូល​ប្រាប់​ក្រុម​ប្រតិភូ​នានា​ថា “​នេះ​គឺជា​ឆ្នាំ​ដ៏​ឈឺចាប់​មួយ​នៅក្នុង​ទសវត្សរ៍​ដ៏​ឈឺចាប់​”​។​

​ទ្រង់​បាន​លើកឡើង​អំពី​រឿង​ក្រឡាប់​ចាក់​ពី​ជំងឺ​រាតត្បាត ការប្រែប្រួល​អាកាសធាតុ ព័ត៌មាន​មិន​ពិត​និង​ការ​លុកលុយ​របស់​រុស្ស៊ី​មកលើ​អ៊ុយ​ក្រែន​មុនពេល​សំដៅ​អំពី​ការលុបចោល​សិទ្ធិ​រំលូតកូន​នៅ​ទូទាំង​​សហរដ្ឋ​អាម៉េរិក​នាពេល​ថ្មីៗ​នេះ​ដោយ​តុលាការ​កំពូល​។​

​ព្រះអង្គម្ចាស់​ហារី​មានបន្ទូលថា​”​ហើយ​ចេញពី​សង្គ្រាម​ដ៏​គួរឱ្យ​រន្ធត់​នៅ​អ៊ុយ​ក្រែន​រហូត​ដល់​ការលុបចោ​ល​វិញ​នៃ​សិទ្ធិ​រដ្ឋធម្មនុញ្ញ​នៅ​ទី​នេះ​នៅក្នុង​សហរដ្ឋ​អាម៉េរិក យើង​កំពុង​ឃើញ​ការរំលោភបំពាន​ជា​សក​​ល​លើ​លទ្ធិប្រជាធិបតេយ្យ​និង​សេរីភាព ដែល​ជា​បុព្វហេតុ​នៃ​ជីវិត​របស់​លោក​ម៉ង់​ដេ​ឡា​”​។​

​ព្រះអង្គម្ចាស់​បាន​គោរព​ដល់​លោក​ម៉ង់​ដេ​ឡា​ជា​វីរបុរស​ប្រឆាំងការ​រើសអើង​ជាតិ​សាសន៍​របស់​អាហ្វ្រិក​ខាងត្បូង ដែល​បាន​ជាប់គុក ២៧ ឆ្នាំ​មុន​ពេល​ត្រូវបាន​ជ្រើសរើស​ជា​មេដឹកនាំ​ស្បែក​ខ្មៅ​ដំបូងបង្អស់​​របស់​ប្រទេស​នេះ​ថា “​មិន​ត្រឹមតែ​ជា​មនុស្ស​មាន​សតិសម្បជញ្ញៈ​ប៉ុណ្ណោះ​ទេ​” ប៉ុន្តែ​ថែមទាំង​ជា “​មនុស្ស​ដែល​ធ្វើ​សកម្មភាព​” ផងដែរ​។​

​ព្រះអង្គម្ចាស់​ហារី​ព្រះជន្ម​៣៧​វស្សា​បាន​ជំរុញ​ឱ្យមាន​អារម្មណ៍​បែប​នេះ​ឡើង​ដើម្បី​ជំរុញ​ឱ្យ​មេដឹកនាំ​ទាំងអស់​ដោះស្រាយ​ការប្រែប្រួល​អាកាសធាតុ ខណៈ​មហេសី​របស់​ទ្រង់​គឺ​ព្រះ​នាង មេហ្គា​ន ម៉ា​កិល (Meghan Markle) កំពុង​សម្លឹង​មើល​ពី​កន្លែង​អង្គុយ​។​

​ទ្រង់​បាន​មានបន្ទូលថា “​ខណៈ​យើង​អង្គុយ​នៅ​ទីនេះ​ថ្ងៃនេះ ពិភពលោក​របស់​យើង​បាន​ឆេះ​ជាថ្មី​ម្ដងទៀត​” ដោយ​បន្ថែម​ថា “​ព្រឹត្តិការណ៍​អាកាសធាតុ​ជា​ប្រវត្តិសាស្ត្រ​លែង​ជា​រឿង​ប្រវត្តិសាស្ត្រ​ទៀតហើយ​។ ចង់​មិន​ចង់ ពួក​វា​គឺជា​ផ្នែក​មួយ​នៃ​ជីវិត​ប្រចាំថ្ងៃ​របស់​យើង​។ ហើយ​វិបត្តិ​នេះ​នឹង​កាន់តែ​អាក្រក់​ទៅៗ លុះត្រាតែ​អ្នក​ដឹកនាំ​របស់​យើង​ធ្វើ​សកម្មភាព​”៕

ព្រះអង្គម្ចាស់​ហារី និង​ព្រះ​នាង មេហ្គា​ន ម៉ា​កិល​នៅ​មហាសន្និបាត​អ​.​ស​.​ប​នៅ​ទីក្រុង​ញូវយ៉ក​