​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ចក្រភព​អង់គ្លេស​បាន​និយាយ​កាលពី​ថ្ងៃ​ចន្ទ​ទី​១៨ ខែកក្កដា​ថា ខ្លួន​កំពុង​សហការ​ជាមួយ​ជប៉ុន​និង​ដៃគូ​មាន​ស្រាប់ អ៊ីតាលី​លើ​កម្មវិធី​យន្តហោះ​ចម្បាំង​​ជំនាន់​ក្រោយ​របស់​ខ្លួន ជាមួយនឹង​ការវិភាគ​គំនិត​រួមគ្នា​ដែល​រំពឹង​នាំទៅរក​ការសម្រេចចិត្ត​លើ​ភាពជា​ដៃគូ​កាន់តែ​ស៊ីជម្រៅ​នៅ​ចុងឆ្នាំ​នេះ​។​

​ទីភ្នាក់ងារ​សារព័ត៌មាន​រ៉​យ​ទ័របាន​រាយការណ៍​កា​លពី​ថ្ងៃ​ព្រហស្បតិ៍​សប្តាហ៍​មុន​ថា ចក្រភព​អង់គ្លេស​និង​ជប៉ុន​ជិត​ឈានដល់​កិច្ចព្រមព្រៀង​មួយ​ដើម្បី​បញ្ចូល​គ្នា​នូវ​កម្មវិធី​យន្តហោះ​ចម្បាំង Tempest និង F-X ជំនាន់​ក្រោយ​របស់​ពួកគេ ដោយ​ប្រទេស​ទាំង​ពីរ​មាន​គោលបំណង​ចុះ​កិច្ចព្រមព្រៀង​លើ​គម្រោង​រួមគ្នា​ថ្មី​មួយ​នៅ​ចុងឆ្នាំ​នេះ​។​

​នាយករដ្ឋមន្ត្រី​អង់គ្លេស​លោក បូរី​ស ច​ន​សុន បាន​និយាយថា រដ្ឋាភិបាល​របស់​លោក​គាំទ្រ​អាកាសចរណ៍​និង​បច្ចេកវិជ្ជា​។​

​លោក​បាន​និយាយ​នៅ​ឯ​ពិធី​បើក​កម្មវិធី​ពិព័រណ៍ Farnborough Airshow ថា “​ខ្ញុំ​ជា​អ្នក​ជឿជាក់​លើ​សក្តានុពល​នៃ​ភាព​ជា​ដៃគូ​ដែល​កំពុង​រីកចម្រើនរ​បស់​យើង មិន​ត្រឹមតែ​ជាមួយ​អ៊ីតាលី​ប៉ុណ្ណោះ​ទេ ប៉ុន្តែ​ថែមទាំង​ជាមួយនឹង​ជប៉ុន​ផងដែរ​”​។​

​ចក្រភព​អង់គ្លេស​និង​ដៃគូ​ការពារជាតិ​ឈាន​មុខ​របស់​ខ្លួន​គឺ​ក្រុមហ៊ុន BAE Systems បាន​និយាយថា អ្នក​ហោះ​សម្តែង​យន្តហោះ Tempest នឹង​ហោះហើរ​ក្នុង​រយៈពេល ៥​ឆ្នាំ​ទៀត​ដោយ​ក្លាយជា​អ្នក​​បង្ហាញ​យន្តហោះ​ប្រយុទ្ធ​លើកដំបូង​របស់​ប្រទេស​ចាប់តាំងពី​យន្តហោះ Typhoon កាលពី​ជិត ៤០ ឆ្នាំមុន​។​

​ក្រុមហ៊ុន BAE បាន​និយាយ​នៅក្នុង​កម្មវិធី​នោះ​ថា វា​នឹង​ក្លាយ​ជា​យន្តហោះ​លឿន​ជាង​សំឡេង​ដែល​បើក​ដោយ​មនុស្ស​ដើម្បី​សាកល្បង​បច្ចេកវិជ្ជា​ថ្មីៗ​ជាច្រើន​រួម​ទាំង​ការរួម​បញ្ចូល​មុខងារ​បំបាំងកាយ​ដែល​​ត្រូវ​គ្នា​ផងដែរ​។​

​បន្ទាប់​ពី​ការចាកចេញ​របស់ខ្លួន​ពី​សហភាព​អឺរ៉ុប ចក្រភព​អង់គ្លេស​ចង់បាន​យន្តហោះ​ចម្បាំង​ថ្មី​នេះ​ចូល​បម្រើការ​នៅ​ឆ្នាំ ២០៣៥​និង​កំពុង​បន្ត​កម្មវិធី​ដាច់ដោយឡែក​ពី​ផែនការ​បារាំង​-​អាល្លឺម៉ង់​-​អេ​ស្ប៉ាញ​។​

​អង់គ្លេស​និយាយថា ការវិភាគ​គំនិត​រួមគ្នា​ជាមួយ​ជប៉ុន​និង​អ៊ីតាលី​នឹង​ស្វែងរក​ជម្រើស​ភាព​ជា​ដៃគូ​ដ៏​មាន​សក្តានុពល​ជាមួយនឹង​គម្រោង​យន្តហោះ​ចម្បាំង​អនាគត​របស់​ចក្រភព​អង់គ្លេស ខណៈ​ការសម្រេចចិត្ត​រំពឹង​ធ្វើ​នៅ​ចុងឆ្នាំ​នេះ​។​

​ដូច​ចក្រភព​អង់គ្លេស​ដែរ ទាំង​ជប៉ុន​និង​អ៊ីតាលី​ធ្វើ​ប្រតិបត្តិការ​យន្តហោះ​ចម្បាំង F-35 ហើយ​ប្រទេស​ទាំង​បី​ក៏​បាន​ធ្វើ​សមយុទ្ធ​រួមគ្នា​ផងដែរ​។​

​លោក រី​ឆាដ បឺ​ថុន (Richard Berthon) នាយក​អង់គ្លេស​នៃ​កម្មវិធី​យន្តហោះ​ចម្បាំង​អនាគត​បាន​និយាយថា ចក្រភព​អង់គ្លេស​កំពុងនិយាយ​ទៅកាន់ “​ប្រទេស​សំខាន់ៗ​ជាមួយនឹង​មហិច្ឆតា​ធំ​ក្នុង​ការវិនិយោគ​”៕

​គំរូ​យន្តហោះ​ថ្មី Tempest របស់​អង់គ្លេស​ដាក់តាំង​បង្ហាញ​កាលពី​ឆ្នាំ​២០១៨​