​ដោយៈ ជា សីហៈ​/​ភ្នំពេញៈ កាលពី​ថ្ងៃទី​១៨ ខែកក្កដា ឆ្នាំ​២០២២ នៅ​ការិយាល័យ​លេខាធិការដ្ឋាន​សហព័ន្ធ​ស្រូវ​អង្ករ​កម្ពុជា លោក ហ៊ុន ឡាក់ ប្រធាន​ក្រុមប្រឹក្សាភិបាល​សហព័ន្ធ​ស្រូវ​អង្ករ​កម្ពុជា បានទទួល​ជួបពិភាក្សា​ការងារ​ជាមួយ​គម្រោង Feed the Future Cambodia Agriculture Partnership Hub ( The AgriHub) ដែលជា​កម្មវិធី​របស់​ទីភ្នាក់ងារ​អភិវឌ្ឍន៍​អន្តរជាតិ​របស់​សហរ​ដ្ឋ​អាមេរិក (USAID)​។

​សហព័ន្ធ​ស្រូវ​អង្ករ​កម្ពុជា បាន​អះអាងថា ខាង​គម្រោង​AgriHub គឺ​ដឹកនាំ​ដោយ លោក នី​មី​ស ហ្សា​វ័​រី ( Nimish Jhaveri) ប្រធាន​កម្មវិធី (Chief of Party) និង​មានការ​ចូលរួម​ពី​លោកស្រី ស្តេ​ហ្វា​នី ឡេ​ន​ឌ័​រ ស៊ី​ល​វ៉ា ( Stephanie Landers Silva) និង លោក កូប ម៉ា​ត (Kob Math) ។​

​ប្រភព​ដដែល​បាន​ឲ្យ​ដឹងថា គោលបំណង​នៃ​កិច្ចពិភាក្សា​នេះ គឺ​ដើម្បី​សិក្សា​លើ​លទ្ធភាព​នៃ​ការចូលរួម​ក្នុងការ​សហប្រតិបត្តិកា​រ​រវាង​ស្ថាប័ន​ទាំងពីរ ក្នុង​ក្របខ័ណ្ឌ​គម្រោង The AgriHub ។

​កម្មវិធី AgriHub ជា​គម្រោង​ថ្មី​បន្ត​ពី​កម្មវិធី Harvest II ដែល​ទើប​បញ្ចប់ ហើយ​កម្មវិធី​នេះ​មាន​រយៈពេល ៥​ឆ្នាំ ចាប់ពី​ឆ្នាំ​២០២២ ដល់​ឆ្នាំ​២០២៧ ក្នុង​គោលបំណង​លើកកម្ពស់​ដល់​និរន្តរភាព និង​ជំរុញ​កំណើនសេដ្ឋកិច្ច​ជា​មូលដ្ឋាន តាមរយៈ​ការធ្វើ​ពិពិធ​កម្ម បរិ​យា​ប័ន្ន និរន្តរភាព ភាព​ធន់ និង ភាព​ប្រកួតប្រជែង​នៅក្នុង​វិស័យ​កសិកម្ម​កម្ពុជា​៕