​ប្រែ​សម្រួលៈ​បំណង (Xinhua)៖​រលក​កំដៅ​ដែល​កំពុង​គ្របដណ្តប់​អឺរ៉ុប​ខាងលិច​និង​ខាងត្បូង​មិន​បង្ហាញ​សញ្ញា​ថមថយ​ទេ នៅពេល​សីតុណ្ហភាព​បាន​ឡើង​ដល់​កំរិត​ខ្ពស់​បំផុត​នៅក្នុង​ប្រទេស​អឺរ៉ុប​ខ្លះ​។​​សេវា​អាកាសធាតុ​អង់គ្លេស​បាន​ព្រមាន​ថា ប្រទេស​អាច​ជួប​ថ្ងៃ​ក្តៅ​បំផុត​នៅ​សប្តាហ៍​នេះ​នៅពេល​វា​ជួប​ស៊ី​តុ​ណ្ហ​ភាព​៤០​,៣អង្សា​សេ​រួច​ជា​ស្រេច​ហើយ​។​

ភ្លើងព្រៃបំផ្លាញសហគមន៍ជាច្រើននៅអង់គ្លេសនៅពេលសីតុណ្ហភាពឡើងដល់៤០អង្សាសេ

​របាយការណ៍​កាលពី​ពេល​ថ្មីៗ​មួយ​ដោយ​មជ្ឈមណ្ឌល​សិក្សា​ស្រាវជ្រាវ​រួម​របស់​គណៈកម្មាធិការ​អឺរ៉ុប​បានបង្ហាញ​ថា ទឹកដី​អឺរ៉ុប​ជិត​ពាក់កណ្តាល​រួមទាំង​អង់គ្លេស​ប្រឈម​ភាពរាំងស្ងួត​នៅ​ខែកក្កដា​។​រលក​កំដៅ​​ដ៏​កម្រ​និង​ភាពរាំងស្ងួត​ក៏​នាំ​អោយ​កកើត​ភ្លើង​ឆេះ​ព្រៃ​ដ៏​ហិនហោច​នៅ​ប្រទេស​មួយ​ចំនួន​រួម​មាន​បារាំង អេ​ស្ប៉ាញ ព័រទុយហ្កាល់ អ៊ីតាលី​និង​ក្រិច​។​

​មជ្ឈមណ្ឌល​នេះ​បាន​ចេញ​ការព្រមាន​កំរិត​ក្រហម​ជា​លើកដំបូង​អំពី​កំដៅ​ខ្លាំង ដោយ​រំលឹក​សាធារណជន​ថា កំដៅ​បង្ក​ហានិភ័យ​នៃ​ការ​កើត​ជំងឺ​ធ្ងន់ធ្ងរ ឬ​គ្រោះថ្នាក់​ដល់​ជីវិត​។​

​សីតុណ្ហភាព​ខ្ពស់បំផុត​នៅ​អង់គ្លេស​កាលពី​មុន​គឺ​៣៨,៧​អង្សា​សេ ដែល​ត្រូវបាន​កត់ត្រា​ឃើញ​កាលពី​ខែកក្កដា ឆ្នាំ​២០១៩​។​

​ទូរទស្សន៍​បារាំង BFMTV​បាន​រាយការណ៍​កាលពី​ថ្ងៃ​ចន្ទ​ថា បារាំង​ខាងលិច​នៅតែ​ស្ថិត​ក្រោម​ការព្រមាន​អំពី​កំដៅ​ខ្លាំង ដោយ​សីតុណ្ហភាព​ត្រូវ​រំពឹងថា​នឹង​ឡើង​ដល់​៤០​អង្សា​សេ​។​

​ក្រសួង​សុខាភិបាល​អេស្ប៉ាញ កាលពី​ថ្ងៃ​ចន្ទ​បាន​និយាយថា​មនុស្ស​៥១០​នាក់​ស្លាប់​ដោយសារ​ឧបទ្ទវហេតុ​ពាក់ព័ន្ធ​នឹង​កំដៅ​នៅ​សប្តាហ៍​ទី​មួយ​នៃការវាយប្រហារ​ដោយ​រលក​កំដៅ​នៅពេល​សីតុណ្ហភាព​ឡើង​​ដល់​៤៥​អង្សា​សេ​នៅ​ផ្នែក​ខ្លះ​នៃ​ប្រទេស​។​

​សីតុណ្ហភាព​ក្តៅ​ខ្លាំង​ប៉ះពាល់​ខ្លាំងជាងគេ​មនុស្ស​ចាស់ ដោយ​ជនរងគ្រោះ​៣២១​នាក់​ក្នុងចំណោម​ជនរងគ្រោះ​៥១០​នាក់​មាន​អាយុ​៨៥​ឆ្នាំ​ឡើង និង​១២១​នាក់​មាន​អាយុ​ចន្លោះ​៧៥​ដល់​៨៤​ឆ្នាំ និង​៤៤​នាក់​​អាយុ​៦៥​ដល់​៧៤​ឆ្នាំ​។​

​ក្នុងពេល​ជាមួយគ្នា អាកាសធាតុ​ក្តៅ​ក៏​រំខាន​ដល់​ការរស់នៅ​និង​ផលិតកម្ម​។​ការិយាល័យ​ឧតុនិយម​អង់គ្លេស​បាន​ព្រមាន​សាធារណជន​អំពី​ការ​ដាច់​ចរន្តអគ្គិសនី ដាច់​ទឹក​និង​សេវា​ទូរស័ព្ទ ថែម​ទាំង​ការ​​ពន្យារ​ពេល​ការធ្វើដំណើរ​។​

កំដៅ ការរាំងស្ងួត​​និង​ខ្វះ​ទឹកនឹង​ប៉ះពាល់​ការផលិត​ថាមពល​និង​កាត់បន្ថយ​ទិន្នផល​ដំណាំ​។​

​កំដៅ​និង​ភាពរាំងស្ងួត​ក៏​វាយប្រហារ​សត្វព្រៃ​នៅក្នុង​ប្រទេស​មួយចំនួន​រួម​មាន​បារាំង អេ​ស្ប៉ាញ ព័រទុយហ្កាល់ អ៊ីតាលី​និង​ក្រិច​។​ភ្លើងព្រៃ​បានចាប់ផ្តើម​នៅ​បារាំង​ភាគ​និរតី​ចាប់តាំងពី​ថ្ងៃ​១២​កក្កដា និង​បំ​​ផ្លាញ​ដី​ប្រមាណ​១៤.០០០​ហិច​តា ដោយ​បង្ខំ​អោយ​ជម្លៀស​មនុស្ស​ជាង​១៦.០០០​នាក់​។​នៅអេ​ស្ប៉ាញ​ភ្លើង​ព្រៃ​បំផ្លាញ​ដី​ជាង​២២.០០០​ហិច​តា​។​

​ការប្រែប្រួល​អាកាសធាតុ​ជា​កក្តា​ចំបង​នៃ​ការឡើង​កំដៅ​ខ្លាំង​នៅអឺរ៉ុប និង​នៅ​ជុំវិញ​ពិភពលោក នេះ​បើ​តាម​សាស្ត្រាចារ្យ​ខាង​វិទ្យាសាស្ត្រ​បំរែបំរួល​អាកាសធាតុ កូរី​ន ឡឺ កេរ៉េ​( Corinne Le Quere)​នៅ​​សកល​វិទ្យាល័យ​មួយ​នៅ​អង់គ្លេស​៕

រលក​កំដៅ​​ដ៏​កម្រ​និង​ភាពរាំងស្ងួត​ក៏​នាំ​អោយ​កកើត​ភ្លើង​ឆេះ​ព្រៃ​ដ៏​ហិនហោច​នៅ​ប្រទេស​មួយ​ចំនួន​រួម​មាន​បារាំង អេ​ស្ប៉ាញ ព័រទុយហ្កាល់ អ៊ីតាលី​និង​ក្រិច​