ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សភាតំណាងរាស្ត្រ​អាម៉េរិក​បាន​អនុម័ត​ច្បាប់​មួយ​កាលពី​ថ្ងៃ​អង្គារ​ទី​១៩​កក្កដា​ដែល​នឹង​ផ្តល់​ការការពារ​សហព័ន្ធ​សម្រាប់​អាពាហ៍ពិពាហ៍​ភេទ​ដូចគ្នា​ចំ​ពេល​មាន​​ការបារម្ភ​ថា តុលាការ​កំពូល​អាច​លុប​ចោល​ការទទួលស្គាល់​មង្គលកា​របែបនេះ​។​

​ច្បាប់​ស្តីពី​ការគោរព​អាពាហ៍ពិពាហ៍​ត្រូវបាន​អនុម័ត​នៅក្នុង​សភា​ដែល​គ្រប់គ្រង​ដោយ​បក្ស​ប្រជាធិបតេយ្យ ដោយ​ការបោះឆ្នោត​ក្នុង​សំឡេងគាំទ្រ ២៦៧ ទល់នឹង ១៥៧​ប្រឆាំង​ប៉ុន្តែ​ការរំពឹងទុក​របស់​​វា​មាន​ភាពមិនច្បាស់លាស់​ទេ​នៅ​ក្នុង​ព្រឹទ្ធសភា​។​

​សមាជិកសភា​មក​ពី​គណបក្ស​សាធារណរដ្ឋ​ចំនួន ៤៧ នាក់​បាន​ចូលរួម​ជាមួយ​គណបក្ស​ប្រជាធិបតេយ្យ​ក្នុង​ការបោះឆ្នោត​សម្រាប់​សេចក្តីព្រាងច្បាប់​នេះ​ដែល​ត្រូវបាន​ទះដៃ​អបអរ​យ៉ាង​កងរំពង​នៅ​​អគារ​សភា​នៅ​ពេល​អនុម័ត​ច្បាប់​នេះ​។​

​គណបក្ស​ប្រជាធិបតេយ្យ​មាន ៥០ អាសនៈ​នៅក្នុង​ព្រឹទ្ធសភា ដែល​មាន​សមាជិក ១០០ នាក់ ហើយ​ការ​បោះឆ្នោត​ពី​សមាជិក​គណបក្ស​សាធារណរដ្ឋ​ចំនួន ១០​រូប​នឹង​ត្រូវការ​ចាំបាច់​ដើម្បី​នាំយក​វិធានការ​​នេះ​មក​អនុវត្ត​។​

​ច្បាប់​ស្តីពី​ការគោរព​អាពាហ៍ពិពាហ៍​នឹង​បង្ខំ​ឱ្យ​រដ្ឋ​ទាំងអស់​របស់​សហរដ្ឋ​អាម៉េរិក​ទទួលស្គាល់​អាពាហ៍ពិពាហ៍​ដែល​មាន​សុពលភាព​មួយ ដែល​បាន​ធ្វើឡើង​នៅក្នុង​រដ្ឋ​មួយ​ផ្សេង​ទៀត​ដោយ​ផ្តល់​ការការពារ​មិន​​ត្រឹមតែ​អាពាហ៍ពិពាហ៍​ភេទ​ដូចគ្នា​ប៉ុណ្ណោះ​ទេ តែ​ថែមទាំង​អាពាហ៍ពិពាហ៍​អន្តរ​ភេទ​ផងដែរ​។​

​ច្បាប់​នេះ​គឺ​ដើម្បី​លុបចោល​ច្បាប់​ការពារ​អាពាហ៍ពិពាហ៍​ឆ្នាំ ១៩៩៦ ដែល​កំណត់​អាពាហ៍ពិពាហ៍​ជា​ការរួម​សង្វាស​រវាង​បុរស​ម្នាក់​និង​ស្ត្រី​ម្នាក់​។​

​តុលាការ​កំពូល​នៅក្នុង​សេចក្តីសម្រេច ៥​ទល់​៤ បាន​បដិសេធ​ផ្នែក​មួយ​នៃ​ច្បាប់​ការពារ​អាពាហ៍ពិពាហ៍ ដែល​បាន​បដិសេធ​អត្ថប្រយោជន៍​សហព័ន្ធ​ចំពោះ​គូស្នេហ៍​ភេទ​ដូចគ្នា​ដែល​បាន​រៀបការ​កាលពី​ឆ្នាំ ២០១៣ ប៉ុន្តែ​ច្បាប់​នេះ​នៅតែ​មាន​នៅ​លើ​សៀវភៅ​។​

​ព្រឹទ្ធ​សមាជិក​លោកស្រី ថា​មមី បាល់​វីន (Tammy Baldwin) នៃ​រដ្ឋ​វី​ស្កុន​សិន (Wisconsin) បាន​និយាយថា “​ច្បាប់​ស្តីពី​ការគោរព​អាពាហ៍ពិពាហ៍​នឹង​បញ្ជាក់​និង​ការពារ​សមភាព​អាពាហ៍ពិពាហ៍ និង​ធ្វើ​ឱ្យ​ប្រាកដថា​អាពាហ៍ពិពាហ៍​ភេទ​ដូចគ្នា និង​អន្តរ​ភេទ​ស្របច្បាប់​ត្រូវបាន​ទទួលស្គាល់​”​។​

​កាលពី​ថ្ងៃទី ២៤ ខែ​មិថុនា​កន្លង​ទៅ តុលាការ​កំពូល​បាន​លុបចោល​ច្បាប់ Roe v Wade ជា​សេចក្តីសម្រេច​ឆ្នាំ ១៩៧៣ ដែល​ចែង​អំពី​សិទ្ធិ​រំលូតកូន​ទូទាំងប្រទេស ជាហេតុ​បង្ក​ឱ្យ​មាន​ការព្យាករណ៍​ថា តុលាការ​អភិរក្ស​នេះ​អាច​នឹង​ពិនិត្យមើល​ឡើងវិញ​នូវ​ការសម្រេចចិត្ត​សំខាន់ៗ​ផ្សេងទៀត​។​

​អាពាហ៍ពិពាហ៍​ភេទ​ដូច​គ្នា​នៅតែ​ជា​គោលដៅ​សម្រាប់​សមាជិក​គណបក្ស​សាធារណរដ្ឋ​មួយចំនួន​និង​សិទ្ធិ​សាសនា​នៅក្នុង​សហរដ្ឋ​អាម៉េរិក ទោះបីជា ៧១ ភាគរយ​នៃ​ជនជាតិ​អាម៉េរិក​នៅក្នុង​ការស្ទង់មតិ Gallup កាលពី​ខែ​ឧសភា​បាន​និយាយថា ពួក​គេ​គាំទ្រ​ទំនាក់ទំនង​បែបនេះ​ក៏ដោយ​៕

​សភាតំណាងរាស្ត្រ​អាម៉េរិក​បាន​អនុម័ត​ច្បាប់​មួយ​កាលពី​ថ្ងៃ​អង្គារ​ទី​១៩​កក្កដា​ដែល​នឹង​ផ្តល់​ការការពារ​សហព័ន្ធ​សម្រាប់​អាពាហ៍ពិពាហ៍​ភេទ​ដូចគ្នានៅពេលក្រុមមនុស្សស្រឡាញ់ភេទដូចគ្នាអបអរនៅខាងក្រៅ