​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ទូរទស្សន៍​រដ្ឋ​រុស្ស៊ី​បាន​ផ្សាយ​ថា គ្រួសារ​ទាហាន​ដែល​ត្រូវបាន​សម្លាប់​ក្នុងប្រទេស​អ៊ុយ​ក្រែន​អាច​ទិញ​រថយន្ត​ម៉ាក​ឡា​ដា​( Lada)​ថ្មី​ជាមួយ​នឹង​ប្រាក់​សំណង​ក្នុងការ​ប្រឹង​​ប្រែង​ដើម្បី​បង្កើន​ចំនួន​ទាហាន​ថ្មី​របស់​ខ្លួន​។​

​ទូរទស្សន៍ Rossiya 1​ដែល​គាំទ្រ​ដោយ​វិមាន​ក្រឹម​ឡាំង បាន​បង្ហាញ​ពី​របៀប​ដែល​ឪពុក​ម្តាយ​មួយគូ​បាន​សម្រេចចិត្ត​ជះ “​លុយ​មឈូស​” ទៅលើ​ឡាន​ពណ៌​ស​ថ្មី​សន្លាង​ពី​ក្រុមហ៊ុន​ផលិត​រថយន្ត​របស់​រដ្ឋ​។​​លោក អា​ឡិច​សី ម៉ា​ឡូ​វ (Alexei Malov) អាយុ ៣១ ឆ្នាំ​បាន​ស្លាប់​នៅ​ខែ​កុម្ភៈ គឺ​ត្រឹមតែ​បី​ថ្ងៃ​ក្នុងការ​លុកលុយ ប៉ុន្តែ​ម្តាយ​និង​ឪពុក​របស់​គាត់​ឥឡូវ​នេះ​បាន​ទទួល​សំណង​ហើយដោយ​វិមាន​ក្រឹម​​ឡាំង​ផ្តល់ជូន​រហូតដល់ ១០៥.០០០ ផោន (១២៦.៣៣៣ ដុល្លារ​) សម្រាប់​ទាហាន​ដែល​បាន​ស្លាប់​ម្នាក់ៗ​។​

​ឪពុក​របស់​ម៉ា​ឡូ​វ​បាន​និយាយថា “​ជាការ​ចង​ចាំ​ដល់​កូនប្រុស​របស់​យើង យើង​បាន​ទិញ​ឡាន​ថ្មី​ដ៏​ស្រស់ស្អាត​”​។​

​គ្រួសារ​របស់​ទាហាន​នេះ​គឺ​រស់នៅ​ក្នុង​ភូមិតូច​មួយ​ឈ្មោះ វីយ៉ា​ហ្សូ​វ​កា (Vyazovka) ស្ថិតនៅ​ចម្ងាយ ៨៨៥ គីឡូម៉ែត្រ​ពី​ភាគ​អាគ្នេយ៍​នៃ​ទីក្រុង​មូ​ស្គូ​។​

​របាយការណ៍​របស់ Rossiya 1 បាន​និយាយថា “​ដូច​ជីតា​និង​ជីទួត​របស់គាត់​ដែរ គាត់​បាន​ប្រយុទ្ធ​ប្រឆាំង​នឹង​ការរើសអើង​ជាតិ​សាសន៍​”​។​

“​រថយន្ត Lada ថ្មី​ត្រូវបាន​ទិញ​ជាមួយ​នឹង​អ្វី​ដែល​មនុស្ស​ហៅថា លុយ​មឈូស ប៉ុន្តែ​វា​ជា​ប្រាក់​ឧបត្ថម្ភ​ផ្លូវការ​សម្រាប់​គ្រួសារ​អ្នកស្លាប់​។​ឪពុក​របស់​គាត់​និយាយ​ថា​អា​ឡិច​សី​សុបិន​ចង់បាន​ឡាន​ពណ៌​ស​ដូច​​ឡាន​នេះ​ចឹង​”៕

​ឪពុក​ម្តាយ​របស់​អា​ឡិច​សី​ទទួល​ឡាន Lada ថ្មី​ពណ៌​ស​សម្រាប់​ជា​សំណង​ចំពោះ​ការបាត់បង់​ជីវិត​កូន​នៅក្នុង​សង្គ្រាម