​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ចក្រភព​អង់គ្លេស​នឹង​ចាប់ផ្តើម​សាកល្បង​អាវុធ​ឡាស៊ែរ​យក​ស្ទីល​តាម​រឿង Star Wars ដែ​អាចបាញ់​ទម្លាក់ដ្រូន​និង​គ្រាប់​រ៉ុក្កែត​ពី​ចម្ងាយ​រហូតដល់ ១០ គីឡូម៉ែត្រ​ក្នុង​រយៈពេល​ពីរ​វិនាទី​។​

​ក្រុមហ៊ុន​ការពារជាតិ Raytheon UK បានប្រកាសថា ខ្លួន​នឹង​បើក​មជ្ឈមណ្ឌល​សមាហរណកម្ម​ឡាស៊ែរ​កម្រិត​ខ្ពស់​នៅ​ទីក្រុង​លី​វី​ង​ស្តុន (Livingston) នៅ​តំបន់​វេស​ឡូ​ឌៀន (West Lothian) នៅ​ឆ្នាំក្រោយ​។​

​ក្រុមហ៊ុន​បាន​និយាយថា មជ្ឈមណ្ឌល​អឺរ៉ុប​ថ្មី​នឹង​ផ្តោតលើ “​ការសាកល្បង ការ​ដាក់​ពង្រាយ និង​ការថែទាំ​អាវុធ​ឡាស៊ែរ​ថាមពល​ខ្ពស់ (HEL)”​។​

​សព្វាវុធ​នេះ​នឹង​ត្រូវ​រចនា​ឡើង​ដើម្បី​បាញ់​ទម្លាក់ដ្រូន រ៉ុក្កែត កាំភ្លើង​ធំ និង​កាំភ្លើងត្បាល់ ដោយ​គ្រាន់តែ​ប្រើ​ពន្លឺ​ទម្លុះ​ខ្លាំង​ប៉ុណ្ណោះ​។​

​ការប្រកាស​នេះ​ធ្វើឡើង​បន្ទាប់​ពី​ក្រុមហ៊ុន Raytheon UK ត្រូវបាន​ផ្តល់​កិច្ចសន្យា​ក្នុង​ការផ្តល់​ប្រព័ន្ធ​អាវុធ HEL ដល់​ក្រសួងការពារជាតិ​ចក្រ​ភព​អង់គ្លេស (MoD) កាលពី​ខែ​កញ្ញា​។​

​អាវុធ​ឡាស៊ែរ​នេះ​នឹង​ត្រូវ​ដំឡើង​នៅលើ​រថពាសដែក Wolfhound ដែល​មាន​កង់​ប្រាំមួយ​ប្រើ​ដោយ​កងទ័ព​អង់គ្លេស​៕

​គំរូ​អាវុធ​ឡាស៊ែរ​ថាមពល​ខ្ពស់ (HEL) នឹង​ត្រូវ​ដំឡើង​នៅលើ​រថពាសដែក