​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​អាម៉េរិក​លោកចូ បៃ​ដិន បាន​និយាយ​កាលពី​ថ្ងៃ​ពុធ​ទី​២០​កក្កដា​ថា ពួក​មន្ត្រី​យោធា​អាម៉េរិក​ជឿថា​វា​«​មិន​នេះ​ជា​គំនិតល្អ​មួយ​»​ទេ​ដែល​ប្រធានសភា​​អាម៉េរិក​លោកស្រី ណាន់​ស៊ី ផេ​ឡូ​ស៊ី ទៅធ្វើ​ទស្សនកិច្ច​កោះ​តៃវ៉ាន់​នៅពេលនេះ​។​

​ការលើកឡើង​របស់​បៃដិនជា​ការឆ្លើយតប​ទៅនឹង​សំណួរ​អ្នកកាសែត​និង​កើតឡើង​មួយ​ថ្ងៃ​ក្រោយពី​ក្រសួងការបរទេស​ចិន​បាន​និយាយថា​ខ្លួន​«​នឹង​ចាត់វិធានការ​ដាច់ខាត​និង​ខ្លាំងក្លា​» បើ​លោក​ស្រី​​ផេ​ឡូ​ស៊ី​នៅតែ​បន្ត​ទៅ​ធ្វើ​ទស្សនកិច្ច​កោះ​តៃវ៉ាន់​តាម​គំរោង​នៅ​ប៉ុន្មាន​សប្តាហ៍​ខាង​មុខ​។​

​លោក​បាន​ឆ្លើយតប​ទៅ​នឹង​សំណួរ​អំពី​ដំណើរ​ទស្សនកិច្ច​នេះ​ថា «​បាទ ​ផ្នែក​យោធា​គិតថា​វា​មិន​ជា​គំនិតល្អ​មួយ​ទេ​នៅពេល​ឥឡូវ​។​តែ​ខ្ញុំ​អត់​ដឹងថា​ផែនការ​នេះ​យ៉ាង​មិច​ទៅ​ហើយ​ទេ​»​។​

​ទោះជា​យ៉ាងណា​លោកបៃ​ដិន​មិន​បាន​បញ្ជាក់ថា​លោកស្រី ផេ​ឡូ​ស៊ី នឹង​ទៅឬមិន​ទៅ​តៃវ៉ាន់​​ទេ។​

​លោកស្រី ផេ​ឡូ​ស៊ី ដំបូង​គ្រោង​នឹង​ទៅ​ធ្វើ​ទស្សនកិច្ច​នៅ​ខែ​មេសា តែ​បាន​ពន្យារពេល​ក្រោយ​លោក​ស្រី​តេស្តិ៍​វិជ្ជមាន​កូវី​ដ​១៩​។​លោក​ស្រី​នឹង​ជា​សមាជិក​សភា​អាម៉េរិក​ជាន់​ខ្ពស់​បំផុត​ដែល​នឹង​ទៅ​កាន់​សម្ពន្ធ​​មិត្ត​ជិតដិត​បំផុត​របស់​អាម៉េរិក​មួ​យ​នេះ ចាប់តាំងពី​ពេល​លោក ញូ​វ ហ្គី​ន​រីច​(Newt Gingrich)​សមាជិកសភា​មក​ពី​គណបក្ស​សាធារណរដ្ឋ​បាន​ធ្វើដំណើរ​ទៅ​ទីនោះ​កាលពី​២៥​ឆ្នាំ​មុន​ក្នុងនាមជា​​ប្រធានសភាអាម៉េរិក​។​

​សារព័ត៌មាន​ដឹ ហ្វាញ​នែន​សឹល ថែមស៍​(The Financial Times) បាន​និយាយ​កាលពី​ថ្ងៃ​អង្គារ​ថា​លោកស្រី ផេ​ឡូ​ស៊ី​នៅតែមាន​ផែនការ​ទៅ​ធ្វើ​ទស្សនកិច្ច​តៃវ៉ាន់​នៅ​ខែ​ក្រោយ​ តែការិយាល័យ​របស់​​លោកស្រី​បាន​បដិសេធ​មិន​ព្រម​បញ្ជាក់ ដោយសារ​តែ​បញ្ហា​សន្តិសុខ​៕

​លោកបៃ​ដិន មិនដឹង​ថា​លោកស្រី​ផេ​ឡូ​ស៊ី​នឹង​បន្ត​ផែនការ​ទៅធ្វើ​ទស្សនកិច្ច​តៃវ៉ាន់​តែ​ដែរ​ឬ​អត់ តែ​លោក​ថា​មន្ត្រី​យោធា​គិតថា​វា​ជា​គំនិត​មិនល្អ​