​ដោយៈ ភ្នំ​សន្ទុក / កំពង់ធំៈ នៅ​ថ្ងៃទី​២១ ខែកក្កដា ឆ្នាំ​២០២២ នេះ សមត្ថកិច្ច​ចម្រុះ ពីរ​ក្រុម នៃ​ខេត្តកំពង់ធំ បាន​ចុះបង្ក្រាប​បទល្មើស នេសាទ បឹង​ទន្លេសាប ក្នុង​រដូវ​ហាមឃាត់ នៅ​គោលដៅ​ពីរ​ផ្សេងគ្នា គឺ​នៅ​ស្រុក​កំពង់ស្វាយ និង​នៅក្នុង​ស្រុក​ស្ទោង​។

​សមត្ថកិច្ច​ចម្រុះ ក្រុមទី​១ ដឹកនាំ​ដោយ​លោក​ឧ​ត្ត​ម​សេនីយ៍​ត្រី វ៉ា ចាន់​កុសល ស្នងការរង​នគរបាល​ខេត្ត និង​ជា​ប្រធាន​ក្រុមការងារ​ទទួលខុសត្រូវ ឃុំ​ផាត់​សណ្តាយ ស្រុក​កំពង់ស្វាយ និង​សហការី បាន​ចុះបង្ក្រាប​បទល្មើស​នេសាទ នៅ​ចំណុច​ចាប់ពី កន្លុក​បាយក្អែក ដល់​ចុង​អូរ​គន្លងលប ក្នុងភូមិ​សាស្ត្រ​ឃុំ​ផាត់​សណ្តាយ ស្រុក​កំពង់ស្វាយ​។

​នៅក្នុង​ការបង្ក្រាប​បទ​ល្មើស​នេសាទ បឹង​ទន្លេសាប របស់​ក្រុមទី​១ នេះ សមត្ថកិច្ច​ចម្រុះ បង្ក្រាប​បទល្មើស​បាន ១ ករណី ក្នុងនោះ បាន​រុះរើ​បំផ្លាញចោល​វត្ថុតាង នៅនឹងកន្លែង រួមមាន របាំង​សាច់​អួន​ក្រឡា​ញឹក ចំនួន ៥ របាំង​ប្រវែង ១.២០០ ម៉ែត្រ ឡុ​ក​ចំនួន ១៤ គ្រឿង លប​/​លូ​ចំនួន ១០​លប បង្គោល​ចំនួន ១.០០០ ដើម ចាក់​លែង​ត្រី​ចំរុះ ចូលទៅក្នុង បឹង​ធម្មជាតិ​វិញ ចំនួន ២០ គីឡូក្រាម ។​

​ចំណែក​សមត្ថកិច្ច​ចម្រុះ ក្រុមទី​២ ដឹកនាំ​ដោយ​លោក គង់ សុភាព មេបញ្ជាការរង កងរាជអាវុធហត្ថ​ខេត្តកំពង់ធំ បាន​ចុះបង្ក្រាប​បទល្មើស​នេសាទ នៅ​ចំណុច​ព្រែក​ខ្វែង​សណ្តាន់​ក្នុងភូមិ​ពៅ​វើ​យ ឃុំ​ពាម​បាង ស្រុក​ស្ទោង​។

​សមត្ថកិច្ច​ចម្រុះ ក្រុមទី​២​នេះ បង្ក្រាបបាន ១ ករណី​ដែរ ក្នុងនោះ បាន​រុះរើ កាប់បំផ្លាញចោល ឧបករណ៍​នេសាទ របាំង​សាច់​ស្បៃ​មុង នៅនឹងកន្លែង រួមមាន របាំង​ស្បៃ​មុង​ចំនួន ២ របាំង ប្រវែង ២០០ ម៉ែត្រ លូ​ស្បៃ​មុង​ចំនួន ៤​មាត់ ឡុ​ក​ស្បៃ​មុង ចំនួន ៣​គ្រឿង បង្គោល​ចំនួន ២៣០ ដើម និង​បាន​ចាក់​លែង​ត្រី ចូល​បឹង​ធម្មជាតិ ទម្ងន់ ៥ គីឡូក្រាម​៕/V​