ប្រែ​សម្រួលៈ​បំណង​(​បាងកក​ប៉ុស្តិ៍​)៖ នាយករដ្ឋមន្ត្រី​ថៃ​ដែល​ត្រូវ​បណ្តេញចេញ​ពី​តំណែង​លោក ថាក់ស៊ីន ស៊ីណា​វ៉ាត់ បាន​ឆ្លើយតប​ទៅ​នឹង​ការ​បបួល​បែប​ផ្គើន​របស់​នាយក​រដ្ឋមន្ត្រី ប្រា​យុទ្ធ ចាន់​អូ​ចា​អោយ​​ក្រុមប្រឆាំង​ហៅ នាយករដ្ឋមន្ត្រី​រត់ចោល​ស្រុក​ទាំង​ពីរ​វិល​មក​ដោះស្រាយ​សេដ្ឋកិច្ច​ប្រទេស​។​

​ក្នុង​កម្មវិធី​ជជែក​កម្សាន្ត​មួយ​កាលពី​យប់​ថ្ងៃ​អង្គារ​លោក​ថាក់ស៊ីន បាន​និយាយថា «​ប្រាកដ​ណាស់ ខ្ញុំ​នឹង​វិល​មក​វិញ​។​ខ្ញុំ​ពិតជា​វិល​មក​វិញ​»​។​

​ថាក់ស៊ីន ដែល​ត្រូវបាន​ទម្លាក់​ពី​អំណាច​ក្នុង​រដ្ឋប្រហារ​យោធា ក៏​បាន​និយាយ​ចំអក​លេងសើច​អោយ​លោក​ប្រា​យុទ្ធ​ថា​លោកនាយក​រដ្ឋមន្ត្រី​ប្រហែលជា​ដេក​គិត​ដល់​រូបលោក​គ្រប់ពេល​។​

​លោក​បាន​និយាយ​ដូច្នេះ​ថា​« បើ​គាត់​សួរថា​តើ​ខ្ញុំ​នៅ​ទីណា ខ្ញុំ​ឆ្លើយថា​ខ្ញុំ​តែងតែ​នៅក្នុង​ចិត្ត​របស់​គាត់​ជានិច្ច​។​នៅពេល​អ្នកយក​ព័ត៌មាន​សួរ​គាត់​…​ឬ​ក៏​នៅ​ពេល​មាន​ការជជែក​សួរដេញដោល​ក្នុង​សភា ខ្ញុំ​​ជា​មនុស្ស​ទី​មួយ​នៅក្នុង​ចិត្ត​របស់​គាត់​»​។​

​សមាជិក​សភា​បក្សប្រឆាំងបាន​ឡើង​ស៊ុត​នាយករដ្ឋមន្ត្រី​ប្រា​យុទ្ធ​ថា ខ្វះ​ទេព្យកោសល​ដឹកនាំ​សេដ្ឋកិច្ច​និង​ការដោះស្រាយ​ជំងឺឆ្លង នាំអោយ​លោក​ប្រា​យុទ្ធ​ក្តៅស្លឹកត្រចៀក​ហើយ​បបួល​អោយ​ក្រុមប្រឆាំង​ហៅ​អ្នក​​ដែល​ពួកគេ​គិត​ថា​ពូកែ​នោះ​ចូល​ស្រុក​

​លោក​ថាក់ស៊ីន​បាន​អំពាវនាវ​អោយ​នាយក​រដ្ឋមន្ត្រី​មាន​យុទ្ធសាស្ត្រ​រឹងមាំ​មួ​យ​និង​ថា​លោក​មាន​បំណង​ផ្តល់​ដំបូន្មាន​។​

​ប្រតិកម្ម​របស់​ថាក់ស៊ីន​កើតឡើង​ក្រោយ​ឧត្តមសេនីយ៍ប្រា​យុទ្ធបា​ន​បបួល​គណបក្ស​ភឿ​ថៃ​អោយ​នាំ​នាយករដ្ឋមន្ត្រី​រត់ចោល​ស្រុក​ពីរ​នាក់​បងប្អូន​(​ថាក់ស៊ីន និង​យី​ង​ឡាក់ ស៊ីណា​វ៉ាត់​)​ចូល​ស្រុក​ដើម្បី​ដោះ​ស្រា​​យ​បញ្ហា​របស់​ប្រទេស ចំ​ពេល​មាន​ការ​ជជីក​សួរ​និង​រិះគន់​លោក​ពី​ពួក​សមាជិក​សភា​ប្រឆាំង​នៅក្នុង​សភា​មុន​ការបោះឆ្នោត​សម្តែង​ការ​មិន​ទុកចិត្ត​លើ​រដ្ឋាភិបាល​នៅ​ចុង​សប្តាហ៍​នេះ​។​

​លោក​បាន​និយាយថា «​ក្នុងនាម​ជា​នាយករដ្ឋមន្ត្រី ខ្ញុំ​អត់​ដឹងអី​ទាល់តែសោះ​។​ខ្ញុំ​មិន​ល្អ​គ្រប់យ៉ាង ។​ខ្ញុំ​មិន​ជា​មនុស្ស​ដែល​អ្នក​ថា​ជា​បុគ្គល​ស្អាតស្អំនោះទេ​។​តើ​បុគ្គល​នេះ​(​ថាក់ស៊ីន​)​នៅឯណា​ឥឡូវ​?»​។​

​ប្រា​យុទ្ធ​បាន​និយាយ​ក្នុង​សភា​កាលពី​ថ្ងៃ​អង្គារ​ថា «​ខ្ញុំ​ដឹង​ថា​លោកអ្នក​សរសើរ​មនុស្ស​ខ្លះ​ដែល​កាន់​តំណែង​មុន​ខ្ញុំ និង​សរសើរ​ពួកគេ​ថា​ធ្វើ​ការងារ​បាន​គ្រាន់បើ​ជាង​ខ្ញុំ​។​ល្អ​ហើយ ឥឡូវ​នាំ​ពួកគេ​មក​វិញ​មក​​បើ​អ្នក​អាច​»​។​

​នៅពេល​ត្រូវ​បាន​សួរ​អំពី​សម្តី​របស់​លោក​ថាក់​ស៊ីន ឧត្តមសេនីយ៍ប្រា​យុទ្ធបា​នយក​ចង្អុល​ដៃ​ដាក់ត្រង់​បបូរមាត់ រួច​និយាយថា​« ការនិយាយ​គ្រាន់តែ​ជា​អ្វី​ចេញ​ពី​មាត់ ប្រជាជន​អាច​និយាយ​អ្វី​ដែល​ពួកគេ​​ចង់បាន​»​។​

​សូមបញ្ជាក់​ថា​លោក​ថាក់ស៊ីន​បាន​ភៀសខ្លួន​ចេញពី​ប្រទេស​នៅ​ឆ្នាំ​២០០៨​នៅ​ពេល​តែ​បន្តិច​មុន​តុលាការ​កំពូល​ចេញ​សាលក្រម​ដាក់ទោស​លោក​ពី​បទ​រំលោភ​សិទ្ធិ​អំណាច​នាយករដ្ឋមន្ត្រី ពាក់ព័ន្ធ​នឹង​កិច្ច​​ព្រមព្រៀង​ទិញ​លក់​ដី​មួយ​របស់​អតីត​ភរិយា​របស់​លោក​។​ចំណែក​លោក​ស្រី​យី​ង​ឡាក់​បាន​ភៀសខ្លួន​ចេញពី​ប្រទេស​នៅ​ឆ្នាំ​២០១៧​ក៏​នៅ​មុន​តុលាការ​កំពូល​សំរេច​ទោស​ដាក់​គុក​លោកស្រី​ប្រាំ​ឆ្នាំ​ចំពោះ​ការ​​ធ្វេសប្រហែស​តួ​នាទី​ពាក់ព័ន្ធ​នឹង​គំរោង​រដ្ឋ​ប្រមូល​ទិញ​ស្រូវ​ពី​កសិករ​ក្នុង​តំលៃ​ខ្ពស់​៕

​វា​មិនមែន​ជា​លើក​ទី​មួយ​ទេ​ដែល​ថាក់ស៊ីន​និយាយ​អំពី​ការវិល​ចូល​ស្រុក​។​កាលពី​ខែ​មករា​ឆ្នាំនេះ លោក​បាន​ប្រកាស​ផែនការ​បញ្ចប់​ការ​និរទេស​ខ្លួន​នៅ​បរទេស និង​វិល​ចូល​ប្រទេស​ថៃ​នៅ​ឆ្នាំ​នេះ​ដើម្បី​ជា​«​កាដូ​ជូន​ប្រជាជន​ថៃ​»​