​ដោយ​៖ រ៉ា​ម៉ន / ភ្នំពេញ​៖ លោក​ឃួ​ង ស្រេង អភិបាល​រាជធានី​ភ្នំពេញ បាន​ដឹកនាំ​ដាំ​ដើមឈើ ចំនួន ១. ០៧២ ដើម និង​បាន​ជំ​រុញឱ្យ​មន្ទីរ​កសិកម្ម រុក្ខាប្រមាញ់ និង​នេសាទ​រាជធានី​ភ្នំពេញ និង​អាជ្ញាធរ​ខណ្ឌ​ទាំង​១៤ យកចិត្តទុកដាក់​ពិនិត្យ និង​មើលថែ​ដើមឈើ​គ្រប់​ប្រភេទ ដែល​បាន​ដាំ​រួច ឱ្យបាន​ល្អ ពិសេស​ត្រូវ​ជួយ​បំផុស​ប្រជាពលរដ្ឋ ឱ្យ​ចេះ​ស្រឡាញ់ និង​មើលថែ​ដើមឈើ កុំ​សម្លាប់​ដើមឈើ ។​

​ការជំរុញ​បែបនេះ​របស់លោក ឃួ​ង ស្រេង បានធ្វើ​ឡើង កាលពី​ព្រឹក​ថ្ងៃទី​២១ ខែកក្កដា ឆ្នាំ​២០២២ នេះ ក្នុង​ពិធី​ដាំ​ដើមឈើ អបអរសាទរ រុក្ខទិវា ៩ កក្កដា ឆ្នាំ​២០២២ នៅ​បរិ​វណ​វត្ត​ភ្នៀ​ត​សិម្ពលី ស្ថិតក្នុង​ភូមិ​ស្វាយ សង្កាត់​ស្នោរ ខណ្ឌ​កំបូល រាជធានី​ភ្នំពេញ​។

​លោក​អភិបាល​រាជធានី​ភ្នំពេញ បាន​មានប្រសាសន៍ថាៈ នៅ​រាជធានី​ភ្នំពេញ ថ្វីត្បិតតែ​ពុំមាន ផ្ទៃដី​ទំនេរ មាន​ទំហំ​ធំ​សម្រាប់​ដាំ​ឈើ ជា​ចម្ការ​ក៏ពិតមែន តែ​ពិធី​នេះ​តែង​ត្រូវបាន​ប្រារព្ធ ធ្វើឡើង ជា​រៀងរាល់ឆ្នាំ ដូច​បណ្តា​ខេត្ត​នានា​ទូទាំងប្រទេស​ដែរ លើកលែងតែ​ឆ្នាំ​២០២០ និង ២០២១ ដែល​ពិធី​នេះ ត្រូវ​អាក់ខាន ដោយសារ​ការឆ្លង​រាលដាល នូវ​ជំងឺ​កូ​វីដ​-១៩ ។ ពាក់ព័ន្ធ​នឹង​ជំងឺ​កូ​វីដ​-១៩ នេះ សម្តេច​តេ​ជោ ហ៊ុន សែន នាយករដ្ឋមន្ត្រី បានដាក់​ចេញ​នូវ វិធានការ​នានា រួមទាំង​វិធានការ ៣​កុំ និង ៣​ការពារ ដើម្បី​ទប់ស្កាត់ ការពារ​ការឆ្លង​រាលដាល ជំងឺ​កូ​វីដ​-១៩ សំដៅ​ការពារ​អាយុជីវិត​ប្រជាពលរដ្ឋ រហូត​ធ្វើឱ្យ​ប្រទេស​កម្ពុជា បាន​រួច​ផុតពី វិបត្តិ​នៃ​ជំងឺ​រាតត្បាត​នេះ ។ ប៉ុន្តែ​ទោះជា​យ៉ាងនេះ​ក្តី សកម្មភាព​បណ្តុះ​កូនឈើ និង​ចែក ចាយ​កូនឈើ ជូន​សាធារណជន អង្គភាព​សាធារណៈ​សាលារៀន វត្ត​អារាម សម្រាប់​យក ទៅ​ដាំ ត្រូវបាន​អនុវត្ត ជាធម្មតា ស្របតាម​រដូវ​កាល​ដាំ​ដុះ មិនមាន​ការអាក់ខាន​ឡើយ ដោយ​គ្រាន់តែ​មិនមាន​ការជួប​ជុំគ្នា ប្រារព្ធ​ពិធី​ប៉ុណ្ណោះ​។​

​លោក ឃួ​ង ស្រេង បាន​បន្តទៀតថាៈ នៅ​ភ្នំពេញ យើង​បាន​ត្រៀម​ដើមឈើ ចំនួន ២ សែន​ដើម ដើម្បី​ដាំ​នៅ​ឧទ្យាន ។ សម្រាប់​មន្ទីរ​កសិកម្ម រុក្ខាប្រមាញ់ និង​នេសាទ រាជធានី​ភ្នំពេញ និង​អាជ្ញាធរ​ខណ្ឌ ទាំង​១៤ ត្រូវ​យកចិត្តទុកដាក់ ក្នុងការ​ពិនិត្យ មើលថែ​ដើមឈើ គ្រប់​ប្រភេទ ដែល​យើង​បាន​ដាំ​រួច ព្រោះ​មាន​មនុស្ស​ខ្លះ លួច​សម្លាប់ ដើមឈើ​របស់​យើង​។ នេះ​ជា​បញ្ហា​មួយ ដែល​យើង​ត្រូវតែ​យកចិត្តទុកដាក់ មើលថែ​ដើមឈើ ឱ្យបាន​ម៉ត់ចត់​។​

​លោក ចាន់ រិទ្ធី ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ រាជធានី​ភ្នំពេញ បាន​មានប្រសាសន៍ថាៈ រុក្ខទិវា ត្រូវ​ប្រារឰធ្វើឡើង នៅ​ថ្ងៃទី​៩ ខែកក្កដា ជា​រៀងរាល់ឆ្នាំ ក្រោម​ព្រះរាជាធិបតីភាព​ដ៏​ខ្ពង់ខ្ពស់​របស់ ព្រះមហាក្សត្រ នៃ​ព្រះរាជាណាចក្រ​កម្ពុជា ឬ​ព្រះរាជតំណាង​។ ការរៀបចំ​ពិធី​អបអរសាទរ ទិវា​ដាំ​ដើមឈើ ជា​ប្រពៃណីជាតិ ឆ្នាំនេះ មន្ទីរ​កសិកម្ម រុក្ខាប្រមាញ់ និង​នេសាទ រាជធានី​ភ្នំពេញ បានកំណត់​យក​បរិវេណ វត្ត​ឆ្លៀត​សិម្ពលី ស្ថិតក្នុង​ភូមិ​ស្វាយ សង្កាត់​ស្ងោរ ខណ្ឌ​កំបូល រាជធានី​ភ្នំពេញ ជាទី​តាំង សម្រាប់​ប្រារព្ធ​ពិធី ។ កាលពី​ថ្ងៃទី​១៩ ខែកក្កដា ឆ្នាំ​២០១៩ កន្លងទៅ ពិធី​ដាំ​ដើមឈើ អបអរសាទរ​ពិធី​រុក្ខទិវា ៩ កក្កដា ឆ្នាំ​២០១៩ ត្រូវបាន​ធ្វើឡើង​នៅ​វត្ត​និគ្រោធ​វ័ន (​ហៅ​វត្ត​គល់​ទទឹង​) តែ​សម្រាប់​ពិធី​ឆ្នាំនេះ យើង​ដាំ​ដើមឈើ​ចម្រុះ​ប្រភេទ (​មាន​គ្រញូង ធ្នង់ នាងនួន បេង គគីរ ឈើទាល គីនីន ច្រេស កកោះ សាគូ​រ៉ា ត្នោត ក្ងោក អំពិល​បារាំង ឥន្ទនេល រាំងភ្នំ រាំង​ទឹក និង​ដើម​ពោធិ៍​) សរុប​ចំនួន ១ ០៧២ ដើម ។ លើសពីនេះ យើង បាន​ដាំ​ដើមឈើ ចំនួន ៣.១១៦ ដើម​ទៀត នៅតាម​បណ្តា​វត្ត​អារាម សាលារៀន និង​ដងផ្លូវ​សាធារណៈ​នានា នៅក្នុង​ភូមិសាស្ត្រ រាជធានី​ភ្នំពេញ ខណ្ឌ​រដ្ឋបាល​ព្រៃឈើ ភ្នំពេញ នៃ​មន្ទីរ​កសិកម្ម រុក្ខាប្រមាញ់ និង​នេសាទ រាជធានី​ភ្នំពេញ បាន​បណ្តុះ​កូនឈើ ជាច្រើន​ប្រភេទ ចំនួន​ប្រមាណ ៣០.០០០ ដើម ក្នុង​១​ឆ្នាំ សម្រាប់​ទុក​ប្រគេន​ព្រះសង្ឃ និង​ចែកជូន ប្រជាពលរដ្ឋ យកទៅ​ដាំ ដែល​សម្រាប់​ឆ្នាំ​២០២២ ដោយ​គិត​ត្រឹម​ដំណាច់​ខែមិថុនា​នេះ យើង​មាន​កូនឈើ ទុក​ត្រៀម​សម្រាប់​ចែកជូន​ដល់​សាលារៀន វត្ត​អារាម សាលាខណ្ឌ គ្រឹះស្ថានសាធារណៈ និង​ប្រជាពលរដ្ឋ សរុប​ប្រមាណ​ជាង ៤០.០០០ ដើម​៕/V​