ដោយៈ​ប​.​ខុន / ភ្នំពេញៈ ភ្លៀងរលឹម ដែល​បាន​កើតមាន​តាំងពី​យប់ រហូតមកដល់​រសៀល ថ្ងៃទី​២១ ខែកក្កដា នៅ​មិនទាន់​រាំង​ទេ ស្ថានភាព​បែបនេះ បានកើត​មាន នៅ​ទូទាំងប្រទេស និង ភ្លៀង​ធ្លាក់​ច្រើន កើតមាន​នៅលើ​បណ្តា​ខេត្ត ជាប់​ព្រំដែន​កម្ពុជា វៀតណាម រហូតដល់ ថ្ងៃទី​២២ ខែកក្កដា ទើប​ភ្លៀង​ចុះខ្សោយ​ទៅវិញ បន្ទាប់ពី​ប្រព័ន្ធ​សម្ពាធ​ទាប ដែល​ស្ថិតនៅលើ ប្រទេស​វៀតណាម ឡាវ និង ប្រទេស​ថៃ បាន​រំកិល​ឡើង​ទៅលើ (​ជើង​) បន្តិច​វិញ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​២១ ខែកក្កដា​ថាៈ ស្ថានភាព​ភ្លៀងរលឹម នៅថ្ងៃនេះ បាន កើត​មាននៅ​ទូទាំងប្រទេស ភ្លៀង​ធ្លាក់​ច្រើន មាន​នៅលើ​បណ្តា​ខេត្ត ជាប់​ព្រំដែន​កម្ពុជា វៀតណាម និង​ខេត្តសៀមរាប ក៏មាន​ភ្លៀង​ធ្លាក់​ច្រើន​ដែរ​។​

​អ្នកនាំពាក្យ ក្រសួង​ជំនាញ​ខាងលើ បាន​និយាយ​ឱ្យដឹងទៀតថាៈ ផ្ទៃមេឃ​អាប់អួរ និង​មាន​ភ្លៀង ម្តង​តិច ម្តង​ខ្លាំង​នេះ នឹង​ថយចុះ​ទៅវិញ នៅ​ថ្ងៃទី​២២ ខែកក្កដា បន្ទាប់ពី​ប្រព័ន្ធ សម្ពាធ​ទាប ដែល​ស្ថិតនៅលើ​ប្រទេស​វៀតណាម ឡាវ និង​ប្រទេស​ថៃ បាន​រំកិល​ឡើង ទៅលើ​(​ជើង​)​បន្តិច​វិញ​។ ភ្លៀងរលឹម​ជាប់​គ្នា ពីរ​ថ្ងៃ​មកនេះ មិនទាន់​បង្កឱ្យមាន​ជា​ជំនន់ ទឹកភ្លៀង នៅលើ​ខេត្ត​ណាមួយ នៅឡើយ​ទេ តែ​វា​អាច​នឹងមាន បើ​ភ្លៀងរលឹម​បែបនេះ ថែម​មួយ​យប់ មកទៀត​នោះ​។​

​លោក ហេង សោភ័ណ​រិ​ទ្ធ ប្រធាន​មន្ទីរ​ធនធានទឹក និង​ឧតុនិយម ខេត្ត​ព្រះសីហនុ បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​២១ ខែកក្កដា​ថាៈ ភ្លៀង​តាំងពី​យប់ រហូតមកដល់​រសៀល ថ្ងៃនេះ នៅ​មិនទាន់​រាំង​នៅឡើយ​ទេ តែ​ភ្លៀង ក៏​មិន​ខ្លាំង​ដែរ​។ ពេលនេះ ផ្ទៃមេឃ នៅតែមាន​សភាព​ងងឹត និង​មាន​ភ្លៀងរលឹម ម្តង​តិច ម្តង​ច្រើន​។​

​ក្រសួង​ធនធានទឹក និង​ឧតុនិយម កាលពី​ថ្ងៃទី​១៩ ខែកក្កដា ឆ្នាំ​២០២២ បាន​ជូនដំណឹង ស្តីពី​ស្ថានភាព​អាកាសធាតុ សម្រាប់​ពីថ្ងៃ​ទី​២០ ដល់​ថ្ងៃទី​២៦ ខែកក្កដា ឆ្នាំ​២០២២​ថាៈ ព្រះរាជាណាចក្រ​កម្ពុជា នឹង​ទទួល​ឥទ្ធិពល ពី​ជ្រលង​នៃ​ប្រព័ន្ធ​សម្ពាធ​ទាប អូសបន្លាយ​ពី ភាគ​ខាងជើង ប្រទេស​ថៃ កាត់​លើ​ភាគខាងត្បូង ប្រទេស​ឡាវ និង​ភាគ​កណ្ដាល ប្រទេស​វៀតណាម ជាមួយ​ខ្យល់មូសុង​និរតី បក់​ក្នុង​ល្បឿន ពី​មធ្យម​ទៅ​បង្គួរ​ធ្វើឱ្យមាន​ភ្លៀង​ធ្លាក់ ក្នុង​កម្រិត​ពី​តិច​ទៅ​បង្គួរ និង​ផ្នែក​ខ្លះ​នៃ​បណ្តា​ខេត្ត និង​រាជធានី អាចមាន​ភ្លៀង​ធ្លាក់​ច្រើន ដោយ​អន្លើ លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់​។​

​ក្នុង​សេចក្តីជូនដំណឹង បាន​សរសេរ​ទៀតថាៈ ស្ថានភាព​បែប​ខាងលើ ធ្វើ​ឲ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា មាន​ពី ២៤ ទៅ ២៦ អង្សា​សេ សីតុណ្ហភាព អតិបរមា មាន​ពី ៣៤ ទៅ ៣៦ អង្សា​សេ​។ អាចមាន​ភ្លៀង​ក្នុង​កម្រិត​ពី​តិច ទៅ​បង្គួរ ជាមួយគ្នានេះ បណ្តា​ផ្នែក​ខ្លះ នៃ​បណ្តា​ខេត្ត និង​រាជធានី អាចមាន​ភ្លៀង​ធ្លាក់​ច្រើន ដោយ​អន្លើ លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់ ។​

​សម្រាប់​បណ្តា​ខេត្ត​ជាប់​ជួរ​ភ្នំ​ដង​រែ និង​ខ្ពង់រាប​ឦសាន មាន​សីតុណ្ហភាព អប្បបរមា​ពី ២៣ ទៅ ២៥ អង្សា​សេ សីតុណ្ហភាព អតិបរមា មាន​ពី ៣៤ ទៅ ៣៦ អង្សា​សេ​។ អាចមាន​ភ្លៀង ក្នុង​កម្រិត​ពី​តិច​ទៅ​បង្គួរ លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់ ។​

​នៅ​តំបន់​មាត់សមុទ្រ មាន​សីតុណ្ហភាព អប្បបរមា​ពី ២៣ ទៅ ២៥ អង្សា​សេ សី​តុ​ណ្ណ​ភាព អតិបរមា មាន​ពី ៣៣ ទៅ ៣៥ អង្សា​សេ​។ អាចមាន​ភ្លៀង ក្នុង​កម្រិត​ពី​តិច​ទៅ​បង្គួរ លាយឡំ ទៅដោយ​ផ្គរ រន្ទះ និង​ខ្យល់​កន្ត្រាក់​៕/V​