​ដោយៈ សៅ​វ៉ាន់ឌី / ព្រះ​វិហារៈ នៅ​ថ្ងៃទី​២១ ខែ​កក្កដា ឆ្នាំ​២០២២ នេះ លោក ប្រាក់ សុវណ្ណ អភិបាលខេត្ត​ព្រះវិហារ បាន​អ​ញ្ចើ​ញ​ចូលរួម​ដាំ​ដើមឈើ ដើម្បី​អបអរសាទរ បុណ្យ​រុក្ខទិវា ៩ កក្ត​ដា ឆ្នាំ​២០២២ ព្រមទាំង​មានការ​ចូលរួម​ពី​មន្ត្រី​នៃ​មន្ទីរ​ជុំវិញ​ខេត្ត និង​សិស្សានុសិស្ស និង​ប្រជាពលរដ្ឋ​ជាច្រើន​នាក់ ។ កម្ម​វី​ធី​នេះ បានធ្វើ​ឡើង​នៅ​សាលាបឋមសិក្សា​អូរ​ទ្រ​លោក ក្នុងភូមិ​អូរ​ទ្រ​លោក ឃុំ​រមទម ស្រុក​រវៀង ។​

​លោក ពឹង ទ្រី​ដា នាយ​ខណ្ឌ​រដ្ឋបាល​ព្រៃឈើ​ព្រះវិហារ បាន​មានប្រសាសន៍ថាៈ ថ្ងៃនេះ ខណ្ឌ​រដ្ឋបាល​ព្រៃឈើ​ព្រះវិហារ បាន​យក​កូនឈើ​ចម្រុះ សរុប ៦៥០ ដើម ក្នុងនោះ កូន​ស្វាយ​ចំនួន ១២០ ដើម កូន​ខ្នុរ ចំនួន ១០០ ដើម កូន​ទាបបារាំង ចំនួន ១៥០ ដើម កូន​អំពិល​ផ្អែម ចំនួន ១៣០ ដើម កូន​គ្រញូង​ចំនួន ៥០ ដើម កូន​ធ្នង់​ចំនួន ៥០ ដើម និង​កូនឈើ​លឿង​រាជ ចំនួន ៥០ ដើម ជូន​ដល់​ប្រជាពលរដ្ឋ ឲ្យ​យកទៅ​ដាំ​តាម​លំនៅដ្ឋាន ផងដែរ​។

​លោក​បាន​បន្តទៀតថាៈ ចំពោះ​កូនឈើ​ដែល​បាន​ចែកជូន បងប្អូន​ពលរដ្ឋ ឲ្យ​យកទៅ​ដាំ​ដុះ នោះ ថ្វីដ្បិតតែ​មិនទាន់បាន​ទទួលផល នៅពេលនេះ ក៏ពិតមែន ក៏ប៉ុន្តែ​នៅពេល​អនាគត យើង​នឹង​ទទួលបាន​ផល​ផ្លែផ្កា ជាក់​ជាពុំខាន ហើយក៏​បាន​ជួយ​ចូលរួម ចំណែក​កាត់​បន្ត​ថយ ការខ្វះខាត​ជីវភាព​រស់នៅ របស់​បងប្អូន​មួយកំរិត​ថែមទៀត នៅពេល​អនាគត ។

​ពិធី​ដាំ​កូនឈើ ដើម្បី​អបអរ​សារ​ទរ រុក្ខទិវា ៩ កក្កដា ២០២២ នេះដែរ នៅក្នុង ខណ្ឌ​រដ្ឋបាល​ព្រៃឈើ​ព្រះវិហារ នឹង​ដាំ​កូនឈើ​ប្រភេទ​ចម្រុះ សរុប​ចំនួន ១.១៦១ ដើម ក្នុងនោះ កូនឈើ​គ្រញូង​ចំនួន ៣៨ ដើម កូនឈើ​ធ្នង់ ១.០១១ ដើម កូនឈើ​អំពិល​ទឹក​បារាំង ៥០ ដើម កូនឈើ​ក្ងោក ៥០ ដើម និង កូនឈើ​លឿង​រាជ ១២​ដើម លើ​ផ្ទៃដី​ទំហំ ១.៨៥៧ ម៉ែត្រការ៉េ នៅ​សាលាបឋមសិក្សា​អូរ​ទ្រ​លោក ផងដែរ ។​

​លោក ប្រាក់ សុវណ្ណ អភិបាលខេត្ត​ព្រះវិហារ បាន​មានប្រសាសន៍ថាៈ ក្រោម​ចក្ខុវិស័យ​ដ៏ ភ្លឺស្វាង របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ដ្រី នៃ​ព្រះរាជា​ណា ចក្រ​កម្ពុជា នៅក្នុង​អាណត្តិ​ទី​៥ បាន​យកចិត្តទុកដាក់ ក្នុងការ​ធ្វើ​កំណែ​ទំរង់ លើ​វិស័យ​ព្រៃឈើ ដើម្បី​ទប់ស្កាត់ និង​ការស្ដារ​ឡើងវិញ នូវ​ធនធាន​ព្រៃឈើ​ដ៏​មាន​តំលៃ ដោយបាន​ដាក់ចេញ នូវ​វិធានការ​ជាច្រើន ដូចជា បទបញ្ជា​លេខ ០១ បទបញ្ជា​លេខ ០២ ថ្មីៗ​នេះ រាជរដ្ឋាភិបាល ក៏​បានចេញ​បទបញ្ជា​លេខ​០១​បប ចុះ​ថ្ងៃទី​០៧ ខែឧសភា ឆ្នាំ​២០១២ និង បញ្ញា​លេខ​០៥ ស .​គ​.​ណន របស់​រាជរដ្ឋាភិបាល​កម្ពុជា ស្ដីពី​វិធានការ​ចាំបាច់​នានា ក្នុងការ​ពង្រឹង​ការគ្រប់គ្រង ធនធានធម្មជាតិ ចុះ​ថ្ងៃទី​២២ ខែ កញ្ញា ឆ្នាំ​២០១៦ និង​លិខិតបទដ្ឋាន​គតិយុត្តិ​នានា ដើម្បី​លុបបំបាត់ ភាពអនាធិបតេយ្យ ក្នុង​វិស័យ​ព្រៃឈើ និង​ជំរុញ​ការការពារ​ថែទាំ​ព្រៃឈើ ដែល​បាន​ដាំ​កន្លងមក និង​ការដាំ​ដើមឈើ​ថ្មី​ឡើងវិញ ហើយ​ត្រូវខិតខំ​អនុវត្ត​គោលនយោបាយ ស្ដីពី​កំណែ​ទំរង់​វិស័យ​ព្រៃឈើ​ជាតិ ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​រាជរដ្ឋាភិបាល ឲ្យ​ទទួលបាន​ជោគជ័យ​ដ៏​ឧត្ដុង្គ​ឧ​ត្ត​ម ព្រមទាំង​ថែរក្សា​ការពារ និង ដាំ​ដុះ​ព្រៃឈើ​ឡើងវិញ ដើម្បី​រួមចំណែក​កាត់បន្ថយ បំរែបំរួល​អាកាសធាតុ​។​

​លោក​អភិបាលខេត្ត ក៏បាន​បញ្ជាក់​យ៉ាងច្បាស់​ថាៈ ការដាំដុះ​កូនឈើ នៅតែ​បន្ត តែ​ត្រូវអនុវត្ត ជាដាច់ខាត ចំពោះ​បទល្មើស​ធនធានធម្មជាតិ ដែល​កើតមាន​ជា​បន្តបន្ទាប់ នៅក្នុង​ខេត្ត ធ្វើយ៉ាងណា ត្រូវតែ​បង្ក្រាប​ឱ្យ​ខាន​តែ​បាន ។​

​បច្ចុប្បន្ននេះ ខេត្តព្រះវិហារ មាន​សហគមន៍​ព្រៃឈើ សរុប​ចំនួន ៤៨ សហគមន៍ ស្មើនឹង​ផ្ទៃដី សរុប​ចំនួន ៧១.៣៥០ ហិកតា ក្នុងនោះ មាន​ប្រកាស​ទទួលស្គាល់ ដោយ​ក្រសួងកសិកម្ម ចំនួន ៣៨ សហគមន៍ ស្មើនឹង​ផ្ទៃដី ៧១.៣០៥ ហិកតា និង​សហគមន៍​ព្រៃឈើ បាន​ចុះ​កិច្ចព្រមព្រៀង​ជាមួយ ខណ្ឌ​រដ្ឋបាល​ព្រៃឈើ​ព្រះវិហារ ចំនួន ៤០ សហគមន៍ ស្មើនឹង​ផ្ទៃដី ៥៣.៨៣៣ ហិកតា​។​

​ដោយ​គិត​ចាប់ពី​ថ្ងៃទី​០១ ខែមករា ឆ្នាំ​២០២២ ដល់​ថ្ងៃទី​២០ ខែកក្កដា ឆ្នាំ​២០២២ ខណ្ឌ​រដ្ឋបាល​ព្រៃឈើ​ព្រះវិហារ បង្ក្រាប​បទល្មើស​ព្រៃឈើ និង​សត្វព្រៃ ក្នុង​ដែន​សមត្ថកិច្ច ខេត្តព្រះវិហារ លទ្ធផល​បង្ក្រាបបាន ចំនួន ៦២ ករណី ស្មើនឹង ១៣០ ម៉ែត្រគុប ៦៦៥ ក្នុងនោះ បញ្ជូនទៅ​តុលាការ ចំនួន ៤៣ ករណី និង​បញ្ជូនទៅ​រដ្ឋបាល​ព្រៃឈើ ចំនួន ១៩ ករណី ៕/V​