ប្រែ​សម្រួលៈ​បំណង​(​ដេល្លី​ម៉េល​)៖ ថ្លៃ​ប្រេង​ឆៅ​បាន​ធ្លាក់​កាលពី​ថ្ងៃ​ព្រហស្បតិ៍​ទី​២១​កក្កដា ក្រោយ​ស្តុក​ប្រេងសាំង​អាម៉េរិក​កើនឡើង​បាន​ជួយ​សម្រន់​ការព្រួយបារម្ភ​អំពី​កង្វះ​ប្រេង និង​លី​ប៊ី រួម​ទាំង​រុស្ស៊ី​វិល​មក​​ផ្គត់ផ្គង់​ថាមពល​ឡើងវិញ​។​

​ប្រេង​ផ្សារ​Brent​ធ្លាក់ចុះ​អស់​២,៣៦​ដុល្លារ​មក​នៅត្រឹម​១០៤,៥៦​ដុល្លារ​ក្នុង​មួយ​បារ៉ែល​ខណៈ​ប្រេង​ឆៅ​នៅ​ផ្សារ​អាម៉េរិក​WTI​ធ្លាក់ចុះ​២,៤៩​ដុល្លារ​មក​នៅត្រឹម​៩៧,៣៩​ដុល្លារ​ក្នុង​មួយ​បារ៉ែល​។​

​សូមបញ្ជាក់​ថា​ថ្លៃ​ប្រេង​មាន​ការប្រែប្រួល​ជាប់​នៅ​ពេល​ឈ្មួញ​ជម្នះ​នឹង​ការផ្គត់ផ្គង់​កាន់តែ​តានតឹង​ទៅ​ដោយសារ​តែ​បាត់បង់​ការផ្គត់ផ្គង់​ប្រេង​រុស្ស៊ី​ដោយសារ​ជាប់​ទណ្ឌកម្ម​ក្រោយប្រទេស​នេះចូល​ឈ្លានពាន​​អ៊ុ​យក្រែន​។​

​នៅ​ថ្ងៃ​២១​កក្កដា​នេះ ថ្លៃ​មាស​បាន​ធ្លាក់​ចុះ​ដល់​កំរិត​ទាប​របស់​វា​ក្នុង​រយៈពេល​ជិត​មួយ​ឆ្នាំ​មកនេះ ចំ​ពេល​ដុល្លារ​ឡើងថ្លៃ​និង​ការ​រំពឹង​ថា​បណ្តា​ធនាគារ​កណ្តាល​នឹង​ដំឡើង​អត្រា​កា​ប្រាក់​ដើម្បី​ប្រយុទ្ធ​នឹង​​អតិផរណា​។​មាសគីឡូ​បាន​ចុះ​០,២​ភាគរយ​មក​នៅត្រឹម​១.៦៩៣,៩០​ដុល្លារ​ក្នុង​មួយ​អោន ក្រោយ​ចុះ​ដល់​១.៦៩១,៤០​ដុល្លារ​ក្នុង​ជំនួញ​ព្រឹក​ថ្ងៃ​ព្រហស្បតិ៍​។​

​ក្នុងពេល​ជាមួយគ្នា​ប្រាក់​ដុល្លារឡើង​ថ្លៃ​ធៀប​នឹង​រូបិយ​បណ្ណ​ប្រជែង​ដទៃទៀត ដែលនាំអោយ​មាស​ដែល​កំណត់​ថ្លៃ​ដោយ​ប្រាក់​ដុល្លារ​កាន់តែ​ថ្លៃ​សំរាប់​អ្នក​កាន់​រូបិយ​បណ្ណ​ផ្សេង​។​

​បណ្តា​ភាគហ៊ុន​អាស៊ី​ភាគច្រើន​នៅ​ថ្ងៃនេះ​ក៏​បាន​ធ្លាក់ចុះ នៅពេល​ក្តីរំពឹង​អំពី​ចំណូល​ខ្ពស់​ត្រូវ​រារាំង​ដោយ​ការព្រួយបារម្ភ​ជាប់​អំពី​អតិផរណា​និង​សេដ្ឋកិច្ច​ចិន ទោះជា​ភាគហ៊ុន​នៅ​ផ្សារ Wall Street​កើនឡើង​ក្តី​។​

​រាល់​ក្រសែភ្នែក​ឥឡូវ​សម្លឹង​ទៅរក​ធនាគារកណ្តាល​ជប៉ុន​ដែល​នឹង​បញ្ចប់​កិច្ចប្រជុំ​អំពី​គោលនយោបាយ​មួយ តែ​ពួក​អ្នកវិភាគ​មិន​រំពឹងថា​នឹង​មាន​ការផ្លាស់ប្តូរ​ធំដុំ​ទេ​។​ធនាគារ​មិន​បាន​បង្ហាញ​សញ្ញា​ថា​​ខ្លួន​នឹង​ដើរ​តាម​ធនាគារ​កណ្តាល​ដទៃទៀត​ទេ រួម​មាន​ធនាគារកណ្តាល​អាម៉េរិក ក្នុង​ការដំឡើង​អត្រា​កា​ប្រាក់​ដើម្បី​ទប់​អតិផរណា​។​តាមពិត​សេដ្ឋកិច្ច​ជប៉ុន​នៅ​ជាប់គាំង​រាប់​ឆ្នាំ​មក​ហើយ​នៅ​ពេល​ប​រិត​ផរណា ឬ​ការធ្លាក់​ថ្លៃ​ទំនិញទូទៅ​ជា​បញ្ហា​ធំ​មួយ​។​

​ក្នុង​ការជួញដូរ​ថ្ងៃនេះ ប្រាក់​ដុល្លារ​មួយ​ដុល្លារ​ដូរ​បាន​១៣៨,៣៥​យេន និង​១,០២០៦ អឺរ៉ូ ៕

​ឈ្មួញ​ហ៊ុន​មើល​ម៉ូនីទ័រ​នៅ​ផ្សារ​ហ៊ុន​ក្នុង​ទីក្រុង​សេ​អ៊ូ​ល របស់​កូរ៉េ​ខាងត្បូង​កាលពី​ថ្ងៃ​២១​កក្កដា​