​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អាវុធហត្ថ​របស់​រដ្ឋ​រី​យ៉ូ​បាន​និយាយ​កាលពី​ថ្ងៃ​ព្រហស្បតិ៍​ទី​២១​កក្កដា​ថា យ៉ាងហោច​ណាស់​មនុស្ស ១៨​នាក់​ត្រូវបាន​សម្លាប់​ក្នុងអំឡុង​ការ​ឆ្មក់​បង្ក្រាប​របស់​ប៉ូលិស​​នៅក្នុង​សង្កាត់​ក្រីក្រ​ធំ​បំផុត​ឬ​សហគមន៍​ដែល​មាន​ប្រាក់​ចំណូល​ទាប​នៅ​ទីក្រុង​រី​យ៉ូ ដឺ​ហ្សា​នី​រ៉ូ (Rio de Janeiro)​របស់​ប្រេ​ស៊ីល​។​

​អ្នកយក​ព័ត៌មាន Associated Press បានឃើញ​អ្នកស្រុក​សែង​សាកសព​ប្រហែល ១០ នាក់ ខណៈ​អ្នក​ឈរ​មើល​ស្រែកថា “​យើង​ចង់​បាន​សន្តិភាព​”​។​

​ប្រជាពលរដ្ឋ​បាន​និយាយថា អ្នក​ដែល​ប៉ុនប៉ង​ជួយ​អ្នក​របួស​គឺ​ប្រថុយ​នឹង​ការចាប់ខ្លួន​។​

​ស្ត្រី​ម្នាក់​បាន​ប្រាប់​ទីភ្នាក់ងារ​សារព័ត៌មាន AP​ថា “​វា​ជា​ការសម្លាប់​រង្គាល​នៅក្នុង​អ្វីដែល​ប៉ូលិស​ហៅ​ថា​ប្រតិបត្តិការ​មួយ​”​។​

​នាង​បាន​បន្ថែមថា “​ពួកគេ​មិន​អនុញ្ញាត​ឱ្យ​យើង​ជួយ​ជនរងគ្រោះ​ទេ​” ដោយ​និយាយថា​នាង​បាន​ឃើញ​បុរស​ម្នាក់​ត្រូវបាន​ចាប់ខ្លួន​ដែល​ប៉ុនប៉ង​ធ្វើ​ដូច្នេះ​។​

​លោក អ៊ី​វ៉ាន់ ប្លាស់ (Ivan Blas) អ្នកនាំពាក្យ​អាវុធហត្ថ​របស់​រដ្ឋ​រី​យ៉ូ​បាន​និយាយ​នៅក្នុង​សន្និសីទ​កាសែត​ថា ចំនួន​អ្នក​ស្លាប់​នៅ​កំពុង​បូក​សរុប​នៅឡើយ​។​

​នៅក្នុង​សេចក្តីថ្លែងការណ៍​មុននេះ កម្លាំង​អាវុធហត្ថ​បាន​និយាយថា មន្ត្រី​ម្នាក់​ត្រូវបាន​សម្លាប់ ហើយ​ការ​ឆ្មក់​បង្ក្រាប​នេះ​បាន​កំណត់​គោលដៅ​លើ​ក្រុម​ឧក្រិដ្ឋជន​នៅ​សង្កាត់​ខំ​ផ្លិច​ហ្សូ ដូ អាឡេ​ម៉ៅ (Complexo do Alemao) ដែល​បាន​លួច​រថយន្ត​និង​ទំនិញ និង​ប្លន់​ធនាគារ​ព្រមទាំង​បាន​លុកលុយ​សង្កាត់​ក្បែរ​នោះ​ទៀត​។​

​អភិបាលរដ្ឋ​រី​យ៉ូ លោក ក្លោ​ឌី​អូ កា​ស្ត្រូ (Claudio Castro)​បាន​និយាយ​នៅលើ​ទំព័រ Twitter​ផ្លូវការ​របស់​គាត់​ដោយ​ទួញ​សោ​ក​ចំពោះ​ការស្លាប់​របស់​មន្ត្រី​នោះ​ថា​”​ខ្ញុំ​នឹង​បន្ត​ប្រយុទ្ធប្រឆាំង​នឹង​​ឧក្រិដ្ឋកម្ម​ជាមួយនឹង​កម្លាំង​របស់​ខ្ញុំ​។ យើង​នឹង​មិន​ដកថយ​ពី​បេសកកម្ម​ធានា​សន្តិភាព​និង​សន្តិសុខ​ដល់​ប្រជាជន​នៃ​រដ្ឋ​របស់​យើង​នោះទេ​”​។​

​ប៉ុន្តែ​មនុស្ស​ជាច្រើន​មិន​យល់​ស្រប​នឹង​យុទ្ធសាស្ត្រ​របស់​រដ្ឋាភិបាល​ក្នុង​ការដោះស្រាយ​អំពើហិង្សា​និង​ឧក្រិដ្ឋកម្ម​ចាត់តាំង​នោះទេ​ដែល​វា​ជា​វិធីសាស្ត្រ​មួយ​ឃើញ​ប៉ូលិស​សម្លាប់​មនុស្ស​ជា​ប្រចាំ​។​

​លោកស្រី ថា​លី​រី​យ៉ា ប៉េ​ត្រូន (Taliria Petrone) សមាជិក​សភា​សហព័ន្ធ​សម្រាប់​រដ្ឋ​រី​យ៉ូ បាន​និយាយ​នៅក្នុង​ការឆ្លើយតប​ទៅនឹង​សារ​បង្ហោះ​របស់​អភិបាលរដ្ឋ​ថា​”​ឆ្អែតឆ្អន់​ហើយ​ចំពោះ​គោល​​នយោបាយ​ប្រល័យពូជសាសន៍​បែបនេះ លោក​អភិបាល​!”​។​

“​គោល​នយោបាយ​សន្តិសុខ​សាធារណៈ​ដែល​បរាជ័យ​នេះ​បាន​បណ្តាលឱ្យ​អ្នកស្រុក​និង​ប៉ូលិស​ងាយ​រងគ្រោះ​។ វា​មិន​អាច​ទៅរួច​ទៀត​ទេ​ក្នុង​ការបន្ត​ប្រមូល​សាកសព​ស្បែក​ខ្មៅ​និង​អ្នក​នៅ​តំបន់​ក្រីក្រ​រាល់ថ្ងៃ​បែបនេះ​!”​។​

​សង្កាត់​អាឡេ​ម៉ៅ​គឺជា​ប្លុក​សហគមន៍​ក្រីក្រ​ចំនួន ១៣ នៅ​ភាគ​ខាងជើង​ទីក្រុង​រី​យ៉ូ ដែល​មាន​ប្រជាជន​ប្រហែល ៧០.០០០ នាក់​។ ជិត​បី​ភាគ​បួន​នៃ​ពួក​គេ​មាន​សម្បុរ​ខ្មៅ ឬ កាត់​ពីរ​សាសន៍ នេះ​បើ​​យោងតាម​ការសិក្សា​ខែ​កក្កដា​ឆ្នាំ ២០២០ ដែល​ចេញផ្សាយ​ដោយ​វិទ្យាស្ថាន​វិភាគ​សង្គម​និង​សេដ្ឋកិច្ច​របស់​ប្រេ​ស៊ីល​៕

មនុស្ស​១៨​នាក់​ស្លាប់​ក្នុង​ការបង្ក្រាប​របស់​អាវុធហត្ថ​ប្រេ​ស៊ីល​កាលពី​ថ្ងៃ​ព្រហស្បតិ៍​នៅ​សង្កាត់​អាឡេ​ម៉ៅ​