​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សេត​វិមាន​បាន​និយាយថា ប្រធានាធិបតី ចូ បៃ​ដិន បាន​ធ្វើតេស្តិ៍​វិជ្ជមាន​កូវី​ដ​១៩​។​

​អ្នកនាំពាក្យ​សេត​វិមាន ការី​ន ហ្សង់​ព្យែរ (Karine Jean-Pierre) បាន​និយាយថា លោកបៃ​ដិន​កំពុង​ជួបប្រទះ “​រោគសញ្ញា​ស្រាល​” ហើយ​បាន​ចាប់ផ្តើម​ប្រើ​ថ្នាំ Paxlovid​ដែល​ជា​ថ្នាំ​ប្រ​​ឆាំង​មេរោគ​បង្កើតឡើង​ដើម្បី​កាត់បន្ថយ​ភាព​ធ្ងន់ធ្ងរ​នៃ​ជំងឺ​កូវី​ដ​។​

​នាង​បាន​និយាយថា លោកបៃ​ដិន “​នឹង​ធ្វើ​ចត្តា​ឡីស័​កនៅ​សេត​វិមាន ហើយ​នឹង​បន្ត​បំពេញភារកិច្ច​ទាំងអស់​របស់​គាត់​យ៉ាង​ពេញលេញ​ក្នុង​អំឡុងពេល​នោះ​។ គាត់​បាន​ទាក់ទង​ជាមួយ​សមាជិក​នៃ​បុគ្គលិក​សេត​វិមាន​តាម​ទូរស័ព្ទ​នៅ​ព្រឹក​នេះ ហើយ​នឹង​ចូលរួម​ក្នុង​ការប្រជុំ​ដែល​បាន​គ្រោងទុក​នៅ​សេត​វិមាន​នៅ​ព្រឹក​នេះ​តាមរយៈ​ទូរស័ព្ទ និង Zoom ពី​សេត​វិមាន​”​។​

​លោកបៃ​ដិន​អាយុ ៧៩ ឆ្នាំ​បាន​ចាក់​វ៉ាក់សាំង​ពេញលេញ បន្ទាប់ពី​ទទួលបាន​វ៉ាក់សាំង​ការពារ Pfizer​ចំនួន​ពីរដូ​ស​មុនពេល​ចូលកាន់​តំណែង វ៉ាក់សាំង​ជំរុញ​ទីមួយ​នៅ​ខែកញ្ញា​និង​វ៉ាក់សាំង​ជំរុញ​​បន្ថែម​មួយទៀត​នៅ​ថ្ងៃទី ៣០ ខែ​មីនា​។​

​សេចក្តីថ្លែងការណ៍​របស់សេត​វិមាន​បាន​បន្តថា “​តាម​ពិធីការ​ស្តង់ដារ​សម្រាប់​ករណី​វិជ្ជមាន​ណា​មួយ​នៅ​សេត​វិមាន អង្គភាព​វេជ្ជសាស្ត្រ​សេត​វិមាន​នឹង​ជូនដំណឹង​ដល់​អ្នក​ប៉ះពាល់​ជិតស្និទ្ធ​ទាំងអស់​របស់​​ប្រធានាធិបតី​ក្នុងអំឡុងពេល​ថ្ងៃនេះ រួមទាំង​សមាជិក​សភា និង​សមាជិក​សារព័ត៌មាន​ណា​ដែល​មាន​អន្តរ​កម្ម​ជាមួយ​លោក​ប្រធានាធិបតី​អំឡុងពេល​ធ្វើ​ដំណើរ​កាល​ពី​ម្សិលមិញ​”​។​

“​ការធ្វើ​តេស្តិ៍​ចុងក្រោយ​របស់​ប្រធានាធិបតីស​ម្រាប់​កូ​វីដ​គឺ​នៅ​ថ្ងៃ​អង្គារ​នៅ​ពេល​គាត់​មាន​លទ្ធផល​តេស្តិ៍​អវិជ្ជមាន​”៕

​ប្រធានាធិបតី​បៃ​ដិននិយាយ​ទៅកាន់​សមា​ជិក​ប្រព័ន្ធ​ផ្សព្វផ្សាយ​បន្ទាប់​ពី​ចាកចេញ​ពី​យន្តហោះ Air Force One នៅ​ថ្ងៃ​ពុធ ទី ២០0 ខែកក្កដា ឆ្នាំ ២០២២ នៅ​មូលដ្ឋាន​ទ័ព​អាកាសអេន​ឌ្រូ​