​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​អ៊ីតាលី​បាន​រំលាយ​សភា ដោយ​ត្រួសត្រាយ​ផ្លូវ​សម្រាប់​ការបោះឆ្នោត​មុន​កាលកំណត់ បន្ទាប់​ពី​ការលាលែង​ពី​តំណែង​របស់​នាយក​រដ្ឋមន្ត្រី ម៉ា​រី​អូ ដ្រា​ហ្គី (Mario Draghi)​។​

​លោក​ដ្រា​ហ្គី​បាន​លាលែង​ពី​តំណែង​កាលពី​ថ្ងៃ​ព្រហស្បតិ៍​ទី​២១​កក្កដា បន្ទាប់​ពី​ក្រុមចម្រុះ​កំពុងកាន់​អំណាច​របស់​លោក​បាន​ដួលរលំ​។​

​ចំណាត់ការ​នេះ​បាន​បង្ក​ផលប៉ះពាល់​ដ៏​អស្ថិរភាព​ដល់​ប្រទេស​អ៊ីតាលី​និង​អឺរ៉ុប​នៅ​គ្រា​នៃ​អតិផរណា​និង​ភាពមិនប្រាកដប្រជា​នៃ​សេដ្ឋកិច្ច​ដែល​បណ្តាលមកពី​ជំងឺ​រាតត្បាត​និង​សង្គ្រាម​របស់​រុស្ស៊ី​នៅ​អ៊ុ​យក្រែន​។​

​មិន​មាន​កាលបរិច្ឆេទ​ណាមួយ​ត្រូវបាន​កំណត់​ទេ ប៉ុន្តែ​ប្រធានាធិបតី សឺ​ជី​អូ ម៉ាត់​តារែ​លឡា (Sergio Mattarella) បាន​និយាយថា ការបោះឆ្នោត​ថ្មី​ត្រូវតែ​ធ្វើ​ឡើង​ក្នុង​រយៈពេល ៧០​ថ្ងៃ​ក្រោម​​រដ្ឋធម្មនុញ្ញ​របស់​អ៊ីតាលី​។​

​លោក​ដ្រា​ហ្គី​បាន​ដាក់ពាក្យ​លាលែង​ពី​តំណែង​ទៅកាន់​លោក​ម៉ាត់​តារែ​ល​ឡា​ក្នុងអំឡុង​កិច្ចប្រជុំ​ពេលព្រឹក​នៅ​ឯ​វិមាន​គ្វី​រី​ណាល់​

សភា​អ៊ីតាលី​ត្រូវបាន​រំលាយ​កាលពី​ថ្ងៃ​ព្រហស្បតិ៍​

​លោក​បាន​និយាយថា​លោក​បាន​ធ្វើ​ចំណាត់ការ​បែប​នេះ​ដោយសារ​កង្វះ​ការគាំទ្រ​សម្រាប់​លោក​ដ្រា​ហ្គី ហើយ​វា​ក៏​ចង្អុលបង្ហាញ​ដែរ​ថា​មិន​មាន “​លទ្ធភាព​” នៃ​ការបង្កើត​រដ្ឋាភិបាល​មួយ​ផ្សេង​ទៀត ដែល​អាច​ទទួលបាន​សំឡេង​ភាគច្រើន​នោះ​ទេ​។​

​អាណត្តិ​ប្រាំ​ឆ្នាំ​របស់​សភា​នឹង​ផុតកំណត់​នៅ​ខែ​មីនា​ឆ្នាំ ២០២៣​។​

​លោក​ដ្រា​ហ្គី​បាន​ដាក់ពាក្យ​លាលែង​ពី​តំណែង​ទៅកាន់​លោក​ម៉ាត់​តារែ​ល​ឡា​ក្នុងអំឡុង​កិច្ចប្រជុំ​ពេលព្រឹក​នៅ​ឯ​វិមាន​គ្វី​រី​ណាល់ (Quirinale) ។ ការិយាល័យ​ប្រធានាធិបតី​បាន​និយាយថា​លោក​​ម៉ាត់​តារែ​លឡា ដែល​បាន​បដិសេធ​សំណើ​សុំ​លាលែង​ពី​តំណែង​ស្រដៀង​គ្នា​នេះ​ពី​នាយក​រដ្ឋមន្ត្រី​កាលពី​សប្តាហ៍​មុន បាន​ស្នើសុំ​ឱ្យ​រដ្ឋាភិបាល​របស់​លោក​ដ្រា​ហ្គី បន្ត​ស្ថិតក្នុង​សមត្ថភាព​ចាំផ្ទះ​។​

​អ៊ីតាលី​កំពុង​ប្រឈម​មុខ​នឹង​ការ​ឡើងថ្លៃ​សម្រាប់​អ្វីៗ​គ្រប់យ៉ាង​ចាប់ពី​អាហារ​រហូតដល់​ឧបករណ៍ប្រើប្រាស់​ក្នុងផ្ទះ ដែល​ជា​លទ្ធផល​នៃ​ការ​សង្គ្រាម​នៅ​អ៊ុ​យក្រែន​។​អ៊ីតាលី​ក៏​កំពុង​រង​ទុក្ខ​ដោយ​គ្រោះរាំងស្ងួត​​អូស​បន្លាយពេល​យូរ ដែល​កំពុង​គំរាមកំហែង​ដល់​ដំណាំ និង​ជួប​ការលំបាក​ក្នុង​ការអនុវត្ត​កម្មវិធី​ស្តារ​សេដ្ឋកិច្ច​ពី​ជំងឺ​រាតត្បាត ដែល​ផ្តល់​ហិរញ្ញប្បទាន​ដោយ​សហភាព​អឺរ៉ុប​ផង​ដែរ​។​

​អស្ថិរភាព​ណាមួយ​ក្នុងប្រទេស​អ៊ីតាលី​អាច​នឹង​រាលដាល​ដល់​ប្រទេស​អឺរ៉ុប​ដទៃទៀត ដែល​ប្រឈម​នឹង​បញ្ហា​សេដ្ឋកិច្ច​ផង​ដែរ និង​ដកហូត​ឋានៈ​បុរស​រដ្ឋ​គួរឱ្យ​គោរព​ពី​សហភាព​អឺរ៉ុប ខណៈ​ខ្លួន​ព្យាយាម​រក្សា​រណសិរ្ស​រួបរួម​ប្រឆាំង​នឹង​រុស្ស៊ី​។​

​លោក​ដ្រា​ហ្គី ដែល​មិនមែន​ជា​អ្នកនយោបាយ​ប៉ុន្តែ​ជា​អតីតមន្ត្រី​ធនាគារកណ្តាល បាន​ឡើងកាន់​តំណែង​កាលពី ១៧ ខែ​មុន​ដើម្បី​ស្តារ​សេដ្ឋកិច្ច​ដែល​ធ្លាក់​ចុះ​ដោយសារកូ​វីដ​១៩​។ ប៉ុន្តែ​រដ្ឋាភិបាល​រួបរួម​ជាតិ​របស់​លោក​បាន​ដួលរលំ​កាលពី​ថ្ងៃ​ពុធ​បន្ទាប់ពី​សមាជិក​នៃ​ក្រុមចម្រុះ​ស្តាំនិយម ឆ្វេង​និយម និង​ប្រជា​និយម ដែល​មិន​សប្បាយចិត្ត បាន​ច្រាន​ចោល​ការអំពាវនាវរ​បស់​លោក​ដើម្បី​រួម​គ្នា​ជា​បន្ត​ដើម្បី​បញ្ចប់​អាណត្តិ​របស់​សភា​៕