ដោយៈ ស​រិ​ទ្ធ / ភ្នំពេញ​៖ ក្រុម​ឧក្រិដ្ឋជន ១១​នាក់ មាន​ខ្មែរ វៀតណាម និង​ថៃ ដែល​ជាប់​ពាក់ព័ន្ធ​នឹង​គ្រឿងញៀន ជាង ៤៤ គីឡូក្រាម បាន​ត្រូវ​តុលាការ សម្រេច ឃុំខ្លួន ដាក់ពន្ធនាគារ នៅ​រសៀល​ថ្ងៃទី​២១ ខែកក្កដា​ឆ្នាំ​២០២២ ដើម្បី​រង់ចាំ​ការ​ស៊ើប អង្កេត រក​គូកន​និង​មេខ្លោង​ជា​បន្តទៀត​។

​សូមបញ្ជាក់ថា កាលពី​ថ្ងៃទី​១៣-១៥ ខែកក្កដា ឆ្នាំ​២០២២ កម្លាំង​សមត្ថកិច្ច​ជំនាញ (​ក​១) នៃ​មន្ទីរ​ប្រឆាំង​គ្រឿងញៀន ដឹកនាំ​ដោយ​លោក​ឧត្ដមសេនីយ៍ទោ អ៊ិន សុង​, លោក​វរសេនីយ៍ទោ ពុធ ស៊ុន​រស្មី នាយករង​មន្ទីរ និង​មានការ​ចូលរួម ពី​កម្លាំង ជំនាញ​នៃ​ស្នងការដ្ឋាន​នគរបាល​រាជធានី​ភ្នំពេញ ខេត្តបន្ទាយមានជ័យ ព្រមទាំង​មាន ការដឹកនាំ​សម្របសម្រួល​ពី​ព្រះរាជអាជ្ញារង នៃ​អយ្យការ​អម​សាលាដំបូង រាជធានី ខេត្ត ទាំងពីរ បានធ្វើការ​ស៊ើបអង្កេត​ស្រាវជ្រាវ បង្ក្រាប​ករណី​រក្សាទុក ជួញដូរ ដោយ​ខុសច្បាប់ នូវ​សារធាតុ​ញៀន ចំនួន ៥ គោលដៅ​ផ្សេងគ្នា ជា​បន្តបន្ទាប់ ។

​គោលដៅ​ទី​១ សមត្ថកិច្ច​បានធ្វើការ​បង្ក្រាប នៅ​ចំណុច​សួនច្បារ​មាត់ទន្លេ​មុខ​វាំង ផ្លូវ​ព្រះស៊ីសុវត្ថិ ស្ថិតក្នុង​សង្កាត់​ជ័យជំនះ ខណ្ឌដូនពេញ រាជធានី​ភ្នំពេញ ឃាត់ខ្លួន ជនសង្ស័យ​ម្នាក់ និង​ចាប់យក​សារធាតុ​ញៀន​ប្រមាណ ១​គីឡូក្រាម​។ គោលដៅ​ទី​២ នៅ​ចំណុច​ខុន​ដូ​ឃ្វី​ន បន្ទប់​ជួល​លេខ ៦០២ ជាន់​ទី​៦ ផ្លូវ​លេខ ៣០៨ ស្ថិត​ក្នុងភូមិ​៥ សង្កាត់​ទន្លេបាសាក់ ខណ្ឌចំការមន រាជធានី​ភ្នំពេញ ឃាត់ខ្លួន​ជនសង្ស័យ​ម្នាក់ និង​ចាប់យក​សារធាតុ​ញៀន ប្រមាណ​ជាង ៣ គីឡូក្រាម​។ គោលដៅ​ទី​៣ បាន​បន្ត ពន្លាត​ដែនដី​ទៅ​ខេត្តបន្ទាយមានជ័យ នៅ​ចំណុច​មុខ​សណ្ឋាគារ​ហាក់​ហួត​២ ស្ថិត​ក្នុងភូមិ​សាមគ្គី​មានជ័យ សង្កាត់​អូរជ្រៅ ក្រុង​ប៉ោយប៉ែត ខេត្តបន្ទាយមានជ័យ ឃាត់ខ្លួន​ជនសង្ស័យ ៣​នាក់ និង​ចាប់យក​សារធាតុ​ញៀន ២០ កញ្ចប់​ធំ ទម្ងន់ ប្រមាណ ២០ គីឡូក្រាម​។ គោលដៅ​ទី​៤ នៅ​ចំណុច​ផ្ទះ​លេខ ៨០៣ ស្ថិត​ក្នុងភូមិ​សាមគ្គី​មានជ័យ សង្កាត់​អូរជ្រៅ ក្រុង​ប៉ោយប៉ែត ខេត្តបន្ទាយមានជ័យ ឃាត់ខ្លួន​ជនសង្ស័យ​ម្នាក់ និង​ដកហូត​ថ្នាំញៀន ៣ កញ្ចប់​ធំ ទម្ងន់​ប្រមាណ ៣ គីឡូក្រាម និង​គោលដៅ​ទី​៥ នៅ​ចំណុច​ខ្ទម​ចម្ការ ស្ថិត​ក្នុងភូមិ​គីឡូម៉ែត្រ​លេខ​៤ សង្កាត់​ផ្សារកណ្តាល ក្រុង​ប៉ោយប៉ែត ខេត្តបន្ទាយមានជ័យ ឃាត់ខ្លួន​ជនសង្ស័យ ៤​នាក់ និង​ដកហូត​ថ្នាំញៀន ២០ កញ្ចប់​ធំ ទម្ងន់​ប្រមាណ ២០ គីឡូក្រាម ។
​ជនសង្ស័យ ១១​នាក់ ខាងលើ មាន​: ទី​១-​ឈ្មោះ សុខ ទឹង ភេទ​ប្រុស អាយុ ៣៩​ឆ្នាំ ជនជាតិខ្មែរ​, ទី​២-​ឈ្មោះ សុខ គ​ន្ធា ភេទ​ស្រី អាយុ ៣៧​ឆ្នាំ ជនជាតិខ្មែរ​, ទី​៣-​ឈ្មោះ ហេង សគុណ ភេទ​ប្រុស អាយុ ៤៣​ឆ្នាំ ជនជាតិខ្មែរ​, ទី​៤-​ឈ្មោះ តឿន សា​រុំ ភេទ​ប្រុស អាយុ ៤១​ឆ្នាំ ជនជាតិខ្មែរ​, ទី​៥-​ឈ្មោះ ម៉ុ​ត សុ​ផុន ភេទ​ប្រុស អាយុ ៣២​ឆ្នាំ ជនជាតិខ្មែរ​, ទី​៦-​ឈ្មោះ WEERAPHAT HUN GRATHANAPONGSORN ភេទ​ប្រុស អាយុ ៣៨​ឆ្នាំ ជនជាតិ​ថៃ​, ទី​៧-​ឈ្មោះ សេង ឡា​ទី ភេទ​ប្រុស អាយុ ៣៥​ឆ្នាំ ជនជាតិខ្មែរ​, ទី​៨-​ឈ្មោះ សិត វិសាល ភេទ​ប្រុស អាយុ ២៦​ឆ្នាំ ជនជាតិខ្មែរ​, ទី​៩-​ឈ្មោះ ឆេង ឡាយ ភេទ​ប្រុស អាយុ ២៦​ឆ្នាំ ជនជាតិខ្មែរ​, ទី​១០-​ឈ្មោះ SONGWAT BAU-SRI ភេទ​ប្រុស អាយុ ៣០​ឆ្នាំ ជនជាតិ​ថៃ និង​ទី ១១-​ឈ្មោះ LAM HONG PHUNG ភេទ​ប្រុស អាយុ ២៨​ឆ្នាំ ជនជាតិ​វៀតណាម ។

​ចំណែក​វត្ថុតាង​ដែល​រឹបអូស​ទាំង ៥ គោលដៅ រួមមាន​: កេ​តា​មីន (KETAMIN) ទម្ងន់​សុទ្ធ ១​គីឡូ និង ៩៥២​ក្រាម​, មេ​តំ​ហ្វេ​តា​មីន (ICE) ទម្ងន់​សុទ្ធ ៤២​គីឡូ និង ៨៥៨​ក្រាម​, អ៊ិ​ច​ស្តា​ស៊ី (MDMA) ទម្ងន់​សុទ្ធ ១០៦​ក្រាម​, សរុប ៤៤​គីឡូ និង ៩១៦​ក្រាម​, រថយន្ត ២​គ្រឿង​, ម៉ូតូ ២​គ្រឿង​, អាវុធខ្លី ១​ដើម​, គ្រាប់បែក ១​គ្រាប់​, ជញ្ជីង​ថ្លឹង ៣​គ្រឿង និង​ទូរស័ព្ទដៃ ៧​គ្រឿង ៕/V​-PC