ប្រែ​សម្រួលៈ​បំណង​(​ដេល្លី​ម៉េល​)៖ អ្នកនយោបាយ​ជើងចាស់ រ៉ានី​ល វិក​ក្រេមេ​ស៊ីង (Ranil Wickremesinghe)​បាន​ស្បថ​ចូលកាន់​តំណែង​ជា​ប្រធានាធិបតី​ស្រីលង្កា​ថ្មី​កាលពី​ថ្ងៃ​ព្រហស្បតិ៍​ទី​២១​កក្កដា ដើម្បី​បន្ត​ដឹកនាំ​ប្រទេស​ចេញពី​វិបត្តិ​សេដ្ឋកិច្ច​និង​កំហឹង​របស់​ប្រជាជន​។​

រ៉ានី​ល វិក​ក្រេមេ​ស៊ីង ​បាន​ស្បថ​ចូលកាន់​តំណែង​ជា​ប្រធានាធិបតី​ស្រីលង្កា​ថ្មី​កាលពី​ថ្ងៃ​ព្រហស្បតិ៍​ទី​២១​កក្កដា

អតីតនាយករដ្ឋមន្រ្តីពីររូបក៏បានចូលរួមពិធីស្បថចូលកាន់តំណែងប្រធានាធិបតីថ្មីកាលពីថ្ងៃ២១កក្កដាផងដែរ

សូមបញ្ជាក់ថា ​ប្រជាជន​ស្រីលង្កា​បាននាំគ្នា​ចេញ​មក​តាម​ដងផ្លូវ​អស់​ពេល​រាប់​ខែ​ដើម្បី​ទាមទារ​អោយ​មេដឹកនាំ​កំពូលៗ​របស់​គេ​ចុះចេញ​ពី​តំណែង​ដោយសារតែពួកគេ​ដឹកនាំ​ប្រទេស​នាំ​ដល់​ចលាចល​សេដ្ឋកិច្ច​ដែល​ធ្វើអោយ​ប្រ​​ជា​ជន​២២​លាន​នាក់​ជួប​ការខ្វះខាត​យ៉ាង​អត្តខាត់ សូម្បី​តែ​ស្បៀង​អារ​ហារ ប្រេងឥន្ធនៈ​និង​ថ្នាំពេទ្យ​។​​ការតវ៉ា​ប្រឆាំង​រស់​គេ​បាន​នាំ​អោយ​ប្រធានាធិបតី​និង​នាយករដ្ឋមន្ត្រី​ត្រកូល​រ៉ា​ចាប៉ា​ក់សា ធ្លាក់​ចេញពី​តំណែង​ហើយ​លោក​លោកវិ​ក្រេមេ​ស៊ីង​ដែល​ក្លាយជា​នាយករដ្ឋមន្ត្រី​តាមរយៈ​ចលនា​មហាជន​បាន​ជា​ប្រធានាធិបតី​ប្រតិបត្តិ ជំនួស​លោក​ហ្គោ​តាបា​យ៉ា រ៉ា​ចា​ប៉ាក់​សា ដែល​បាន​ភៀសខ្លួន​ចេញពី​ប្រទេស​។​

​លោក​បាន​ឈ្នះ​ការបោះឆ្នោត​ក្នុង​សភា​ដោយ​ងាយ​កាលពី​ថ្ងៃ​ពុធ តែ​ការជ្រើសតាំង​រូប​លោក​នាំមក​ប្រតិកម្ម​ចំរុះ​ដោយ​អ្នកគាំទ្រ​នាំគ្នា​ដុត​ផាវ​អបអរ​តែ​អ្នកប្រឆាំង​តវ៉ា​ខ្លះ​នៅ​បន្ត​ទាមទារ​អោយ​លោក​​ចុះចេញ​ពី​តំណែង​​។​

​វិក​ក្រេមេ​ស៊ីង វ័យ​៧៣​ឆ្នាំ មាន​បទពិសោធន៍​ការទូត​និង​កិច្ចការ​អន្តរជាតិ​ទូលំទូលាយ ហើយលោក​បាន​ដឹកនាំ​កិច្ចពិភាក្សា​សុំ​កំចី​សង្គ្រោះ​សេដ្ឋកិច្ច​រវាង​ក្រុមមន្ត្រី​ស្រីលង្កា​និង​អង្គការ​មូលនិធិ​រូបិយវត្ថុ​អន្តរជាតិ​IMF​។ ​ក្រោយ​ត្រូវសភា​ជ្រើសតាំង​ជា​ប្រធានាធិបតី​ថ្មី លោកវិ​ក្រេមេ​ស៊ីង បាន​អំពាវនាវ​អោយ​ពួក​អ្នក​នយោបាយ​រួមគ្នា​ធ្វើការ​និង​សុំ​អង្វរ​ទុក​ឳ​កាស​អោយ​ប្រទេស​បោះជំហាន​ទៅមុខ​។​តែ​ពួក​អ្នក​ប្រឆាំង​តវ៉ា​បាន​​សំរុកចូល​វិមាន​ប្រធានាធិបតី​ទៅវិញ ដោយ​ស្រែកថា​« រ៉ានី​ល ទៅ​ផ្ទះ​ទៅ​!»​។​

​ពួក​មេដឹកនាំ​តវ៉ា​ប្រឆាំង​បាន​ប្រាប់​អ្នកយក​ព័ត៌មាន​ថា ពួកគេ​មិន​ទទួលយក​ការតែងតាំង​លោកវិ​កក្រេមេ​ស៊ីង​ជាមេ​ដឹកនាំ​ប្រទេ​សទេ និង​បាន​ទាមទារ​អោយ​លោក​ចុះចេញ​ពី​តំណែង​ភ្លាម​។​

​ត្រឹម​យប់​ថ្ងៃ​ព្រហស្បតិ៍ ប៉ូលិស​និង​ទាហាន​ស្រីលង្កា​បាន​ចុញទៅ​រុះរើ​ចោល​សំណង់​រខេករខាក​នៅក្បែ​រ​កន្លែង​តវ៉ា​ប្រឆាំង​របស់​បាតុករ​រាប់រយ​នាក់​ដែល​បាន​បោះជំរុំ​នៅ​ទីនោះ​អស់​១០៤​ថ្ងៃ​កន្លងទៅ​។​អ្នក​​តវ៉ា​ប្រឆាំង​មួយចំនួន​ត្រូវបាន​ចាប់ខ្លួន និង​កងកម្លាំង​សន្តិសុខ​វាយ​ទាំងបាតុករនិងអ្នកកាសែត​ថែម​ទៀត​។​

​ប៉ូលីស​និង​ទាហាន​រាប់ឡាន​បាន​ទៅ​ដល់​ជំរំ​បាតុកម្ម​ទាំង​កណ្តាល​យប់​ថ្ងៃ​ព្រហស្បតិ៍​ហើយ​ចាប់ផ្តើម​រុះរើ​សំណង់​តង់​រខេករខាក​ចោល​និង​ចាប់ខ្លួន​បាតុករ​មួយចំនួន​

​សូម​រំលឹក​ថា កាលពី​ថ្ងៃ​ចន្ទ​ក្នុងនាម​ជា​ប្រធានាធិបតី​ស្តីទី លោក​វិក​ក្រេមេ​ស៊ីង បាន​ប្រកាស​ដាក់​ប្រទេស​ក្នុងស្ថានភាព​គ្រាអាសន្ន ដោយ​អនុញ្ញាត​អោយ​លោក​នូវ​សិទ្ធិ​អំណាច​ធំ​ទូលាយ​ដើម្បី​ស្តារ​សណ្តាប់​​ធ្នាប់​និង​សន្តិសុខ​សាធារណៈ​៕