​ដោយៈ មេសា / ភ្នំពេញៈ ការហាមឃាត់​មិនឱ្យ​គ្រឹះស្ថានសិក្សា សហការ​ជាមួយ​ក្រុមហ៊ុន ថ្នាំជក់ គឺ​ការឆ្លើយតប និង​ជា​កាតព្វកិច្ច​របស់​ជាតិ ចំពោះ​អនុសញ្ញា​អន្តរជាតិ ស្តីពី​ការត្រួត ពិនិត្យ​ថ្នាំជក់ មាត្រា ៥.៣ ។ នេះ​ជាការ​លើកឡើង​របស់​បេក្ខជន​ឆ្នើម ក្នុង​កម្មវិធី​ប្រកួត និយាយ​សាធារណៈ​វគ្គ​ផ្ដាច់ព្រ័ត្រ ស្តីពី​ផលប៉ះពាល់ នៃ​ការប្រើប្រាស់​ថ្នាំជក់ ដែល​ប្រារព្ធ​ទៅ នៅ​ថ្ងៃទី​២១ ខែកក្កដា ឆ្នាំ​២០២១​។​

​ការលើកឡើង​នេះ ស្របទៅនឹង​មាត្រា ៥.៣ ជា​មាត្រា​សំខាន់​មួយ នៃ​អនុសញ្ញា ស្តីពី​ការត្រួតពិនិត្យ​ថ្នាំជក់ ដែល​កម្ពុជា​បានផ្ដល់​សច្ចាប័ន ចូល​ជា​សមាជិក តាំងពី​ឆ្នាំ​២០០៥ មកម្ល៉េះ​។ ការអនុវត្ត​មាត្រា​នេះ ឆ្លុះបញ្ចាំង​ពី​ឆន្ទៈ​របស់​កម្ពុជា ក្នុងការ​ការពារ​គោល​ន​យោ បាយ ត្រួតពិនិត្យ​ថ្នាំជក់ ពី​ការជ្រៀតជ្រែក​របស់​ឧស្សាហកម្ម​ថ្នាំជក់​។​

ទិដ្ឋភាព​នៃ​ការប្រកួត​និយាយ​សាធារណៈ វគ្គ​ផ្ដាច់ព្រ័ត្រ ស្តីពី​ផលប៉ះពាល់ នៃ​ការប្រើប្រាស់​ថ្នាំជក់ (​រូប​ថ​តៈ CMH)​

​អង្គការ​សុខភាព​ពិភពលោក បានបញ្ជាក់​យ៉ាងច្បាស់​ថា ឧស្សាហកម្ម​ថ្នាំជក់ ប្រតិបត្តិ​ជាច្រើន ឆ្នាំ​មកហើយ ក្នុង​ចេតនា​ធ្វើឱ្យ​ទន់​ខ្យោ​យ នូវ​តួនាទី​រដ្ឋាភិបាល និង​អង្គការ​សុខភាព​ពិភព លោក ក្នុងការ​អនុវត្ត​គោលនយោបាយ​សុខភាព​សាធារណៈ ប្រយុទ្ធប្រឆាំង​ទៅនឹង​ការរីក រាលដាល នៃ​ការប្រើប្រាស់​ថ្នាំជក់​។ ជាការ​កត់សម្គាល់ កន្លងមក ក្រសួង​អប់រំ យុវជន និង​កីឡា បានប្រកាស និង​ប្រកាន់យក ជានិច្ច នូវ​គោលជំហរ មិន​សហការ​ជាមួយ​ស្ថាប័ន ថ្នាំជក់ ។​

​ប៉ុន្តែ​ក្រុមយុវជន​ឆ្នើម នៅក្នុង​ការប្រកួត ខាងលើនេះ បាន​អះអាងថា ការចូលរួម​របស់ ក្រសួង​អប់រំ យុវជន និង​កីឡា តែមួយ មិនទាន់​គ្រប់គ្រាន់​នៅឡើយ​ទេ ហើយ​ពួកគេ​ទទូច​សុំ ឱ្យ​ក្រសួង​ស្ថាប័ន​ផ្សេងៗ​ទៀត ដាក់ចេញ​នូវ​គោលនយោបាយ ហាមឃាត់​កិច្ចសហការ ជាមួយ​ឧស្សាហកម្ម​ថ្នាំជក់​ដែរ ពីព្រោះ​បើ​យោងតាម Global Tobacco Industry Interference Index ការជ្រៀតជ្រែក​របស់​ឧស្សាហកម្ម​ថ្នាំជក់ មិនមែន​កើតមានឡើង តែ​ក្នុង​គ្រឹះស្ថានសិក្សា​ប៉ុណ្ណោះ​ទេ គឺ​ស្ថាប័ន​ផ្សេងទៀត ដូចជា ស្ថាប័ន​សុខាភិបាល សេដ្ឋកិច្ច និង​ហិរញ្ញវត្ថុ ពាណិជ្ជកម្ម និង​សភា ជាដើម ក៏​ជា​គោលដៅ នៃ​ការជ្រៀតជ្រែក​របស់ ឧស្សាហកម្ម​ថ្នាំជក់​ដែរ​។​

ទិដ្ឋភាព​នៃ​ការប្រកួត​និយាយ​សាធារណៈ វគ្គ​ផ្ដាច់ព្រ័ត្រ ស្តីពី​ផលប៉ះពាល់ នៃ​ការប្រើប្រាស់​ថ្នាំជក់ (​រូប​ថ​តៈ CMH)​

​ភស្តុតាង​វិទ្យាសាស្ត្រ បាន​បង្ហាញថា ល្បិចកល​ពីក្រោយ​សកម្ម​ភាព​ឧបត្ថម្ភ​នានា​របស់ ក្រុមហ៊ុន​ថ្នាំជក់ គឺ​ដើម្បី​ពង្រីក​ការផ្សព្វផ្សាយ​ពាណិជ្ជកម្ម និង​បង្ហាញ​កេរ្តិ៍ឈ្មោះ របស់​ក្រុមហ៊ុន នៅក្នុង​សង្គម ដើម្បី​អូសទាញ​ការគាំទ្រ បិទបាំង​ផលប៉ះពាល់ នៃ​ការប្រើប្រាស់​ផលិតផល របស់ខ្លួន និង​បង្កើត​ឱកាស​ប្រឈម​តតាំង ទៅនឹង​គោលនយោបាយ​ជាតិ ស្តីពី​ការត្រួតពិនិត្យ ផលិតផល​ថ្នាំជក់​។​

​ខ្លឹមសារ​សំខាន់ នៃ​មាត្រា ៥.៣ របស់​អនុសញ្ញា​គឺៈ ១.​ឧស្សាហករ​ថ្នាំជក់ និង​សុខភាព សាធារណៈ មានទំនាស់​ផលប្រយោជន៍ ជា​មូលដ្ឋាន និង​មិនអាច​ផ្សះផ្សារ​គ្នា​បាន , ២. ឧស្សាហកម្ម​ថ្នាំជក់​មិនគួរ​បាន​នូវ​ការលើកទឹកចិត្ត​ដើម្បី​បង្កើត ឬ​ប្រតិបត្តិ​ជំនួញ​របស់​ពួកគេ ឡើយ ដោយសារ​ថ្នាំជក់ ជា​ផលិតផល​ដែល​បណ្ដាលឱ្យ​អ្នកប្រើប្រាស់ បាត់បង់​ជីវិត ។​

ទិដ្ឋភាព​នៃ​ការប្រកួត​និយាយ​សាធារណៈ វគ្គ​ផ្ដាច់ព្រ័ត្រ ស្តីពី​ផលប៉ះពាល់ នៃ​ការប្រើប្រាស់​ថ្នាំជក់ (​រូប​ថ​តៈ CMH)​

​គួរបញ្ជាក់​ផងដែរ​ថា ថ្នាំជក់​មិនមែនជា​ផលិតផល​ចាំបាច់​ទេ ប៉ុន្តែ​វា​ផ្ដល់​ផលប៉ះពាល់ ដែលជា​បន្ទុក​មួយ សម្រាប់​រដ្ឋាភិបាល ត្រូវ​ដោះស្រាយ​។ សម្រាប់​កម្ពុជា ប្រជាពលរដ្ឋ ប្រមាណ ១៥.០០០ នាក់ បាន​ស្លាប់​មុន​អាយុ ដោយសារ​ជំងឺ​ដែល​បង្ករ​ពី​ការប្រើប្រាស់​ថ្នាំជក់ ហើយ​ថវិកា​ប្រមាណ ៦៤៩ លាន​ដុល្លារ​អាមេរិក ត្រូវបាន​ខាតបង់​។ ការប្រើប្រាស់​ថ្នាំជក់ បណ្ដាលឱ្យ​អ្នកប្រើប្រាស់ ស្លាប់​មុន​អាយុ ប្រាកដ​ណាស់ ក្រុមហ៊ុន​ថ្នាំជក់ ត្រូវការ​អ្នក​ជក់ ថ្មីៗ​ទៀត ដើម្បី​រក្សា​ផលចំណេញ​៕/V

ទិដ្ឋភាព​នៃ​ការប្រកួត​និយាយ​សាធារណៈ វគ្គ​ផ្ដាច់ព្រ័ត្រ ស្តីពី​ផលប៉ះពាល់ នៃ​ការប្រើប្រាស់​ថ្នាំជក់ (​រូប​ថ​តៈ CMH)​

​ទិដ្ឋភាព​នៃ​ការប្រកួត​និយាយ​សាធារណៈ វគ្គ​ផ្ដាច់ព្រ័ត្រ ស្តីពី​ផលប៉ះពាល់ នៃ​ការប្រើប្រាស់​ថ្នាំជក់ (​រូប​ថ​តៈ CMH)​