​ដោយៈ​ប​.​ខុន​/​ភ្នំពេញៈ​ទ្វារ​ទឹក​អាង​អន្លង់​ជ្រៃ ស្ថិតក្នុង​ភូមិសាស្ត្រ​ស្រុក​ថ្ពង​ខេត្តកំពង់ស្ពឺ​និង​ស្រុក​សាមគ្គី​មានជ័យ​ខេត្តកំពង់ឆ្នាំង​បាន​រលាស់​បើក​ជា​ស្វ័យប្រវត្តិ នៅពេល​កម្ពស់​ទឹកបាន​ឡើង​ខ្ពស់​ហួស​ពី​កម្រិត​រក្សាទុក​១៥០​លាន​ម៉ែត្រគូប​នាំឱ្យមាន​ជំនន់​លិច​ផ្លូវជាតិ​លេខ​៥​ម្តុំ​គីឡូម៉ែត្រ​លេខ​៤០​នា​ព្រឹក​ថ្ងៃទី​២២​ខែកក្កដា តែ ទ្វារ​ទឹក​អាង​បាន​បិទ​វិញ​ហើយ​នៅ​ព្រឹក​ថ្ងៃទី​២២​ខែកក្កដា​បន្ទាប់ពី​ទឹក​ក្នុង​អាង​បាន​ស្រក​ផុត​ការគំរាមកំហែង​ដល់​ទំនប់​របស់​អាង​រួចមក​។​

លោក ញ៉ា​ញ់ ជាប​ហ៊​ង ប្រធាន​មន្ទីរ​ធនធានទឹក​និង​ឧតុនិយម​ខេត្តកំពង់ស្ពឺ​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​២២​ខែកក្កដា​ឆ្នាំ​២០២២​ថា​ទឹកស្ទឹង​ព្រែក​ត្នោត​នៅក្នុង ភូមិសាស្ត្រ​ខេត្តកំពង់ស្ពឺ​នៅថ្ងៃនេះ​ឃើញ​មាន​ជន់​ឡើង​តិចតួច​តែ​អាច​នឹង​ច្រើន​បន្តិច​នៅ​ថ្ងៃស្អែក តែ​ឡើង​រយៈពេល​ខ្លី​រួច​ក៏​ស្រក​ទៅវិញ​ដោយសារ​មិនមាន​ភ្លៀង​ថ្មី​ថែម​មកទៀត​។ ឯ អាងទឹក​អន្លង់​ជ្រៃ​ដែល​បាន​ឡើង​ខ្ពស់​ធ្វើឱ្យមាន​ជំនន់​លិច​ផ្លូវជាតិ​លេខ​៥​បាន​បិទទ្វារ​ទឹក​វិញ​ហើយ​។​

លោក ញ៉ា​ញ់ ជាប​ហ៊​ង បាន​និយាយ​ឱ្យដឹងទៀតថា​អាងទឹក​អន្លង់​ជ្រៃ​ជា​អាងទឹក​ទំនប់​ដី​មាន​ប្រវែង​រហូតដល់​ជាង​៦​គីឡូម៉ែត្រ រក្សា​ទឹក​ទុក​បាន​ដល់​ជាង​១៥០​លាន​ម៉ែត្រ គូប​មួយផ្នែក​នៃ​អាង​ស្ថិតនៅក្នុង​ស្រុក​ថ្ពង​ខេត្តកំពង់ស្ពឺ​និង​មួយផ្នែក​ទៀត​ស្ថិតនៅ​ក្នុងស្រុក​សាមគ្គី​មានជ័យ​ខេត្តកំពង់ឆ្នាំង បន្ទាប់ពី​មាន​ភ្លៀង​ធ្លាក់​ច្រើន​ពីរ​បី​ថ្ងៃ​មុននេះ​ធ្វើឱ្យ​កម្ពស់ ទឹក​នៅក្នុង​អាង​ឡើង​លើសពី​កម្រិត​កម្ពស់​៣,៥​ម៉ែត្រ ទ្វារ​ទឹក​ទាំង​នៅក្នុង​ខេត្តកំពង់ស្ពឺ​និង​នៅក្នុង​ខេត្តកំពង់ឆ្នាំង​បាន​រលាស់​បើក​ជា​ស្វ័យប្រវត្តិ​។​

ក្រោយពី​ទ្វារ​ទឹក​ចំនួន​៥​របស់​អាង​បាន​បើកទឹក​នៅក្នុង​អាង​បាន​ស្រក​ផុត​ការគំរាមកំហែង​ដល់​ទំនប់ លោក​ញ៉ា​ញ់ ជាប​ហ៊​ង និយាយថា​នៅ​ព្រឹក​ថ្ងៃទី​២២​ខែ​ក្កដា​នេះ បាន​បិទទ្វារ​ទឹក​អាង​នេះ​វិញ​ហើយ ទឹក​ដែល​លិច​ផ្លូវជាតិ​លេខ​៥​នៅ​ម្តុំ​គីឡូម៉ែត្រ​លេខ​៤០​វា​នឹង​ស្រក​អស់​ទៅវិញ​នៅពេល​បន្ទាប់​៕​