​ដោយៈ គង់​ហេង / កំពង់ចាមៈ អនុគណៈកម្មការ​សុវត្ថិភាព​ចរាចរណ៍​ផ្លូវគោក ខេត្តកំពង់ចាម បានសម្រេច​ដាក់ចេញ​នូវ​សេចក្តីណែនាំ វិធានការ​ពង្រឹង​ការអនុវត្ត ច្បាប់​ចរាចរណ៍​ផ្លូវគោក នៅក្នុង​ភូមិសាស្ត្រ​ខេត្ត​មួយ​នេះ បន្ទាប់ពី​ពិនិត្យឃើញ ក្នុង​ត្រីមាស​ទី​១ ឆ្នាំ​២០២២ នេះ គ្រោះថ្នាក់​ចរាចរណ៍ មានការ​កើនឡើង គួរឱ្យ​បារម្ភ​។​

​ការដាក់ចេញ​នូវ​វិធានការ​ពង្រឹង ការអនុវត្ត​ច្បាប់​ចរាចរណ៍ ធ្វើឡើង​តាមរយៈ​សេចក្តីណែនាំ ដែល​ចុះហត្ថលេខា​ដោយ​លោក អ៊ុន ចាន់​ដា ជា​ប្រធាន​អនុគណៈកម្មការ​សុវត្ថិភាព​ចរាចរណ៍ ផ្លូវគោក​ខេត្ត និង​ជា​អភិបាលខេត្ត​កំពង់ចាម នៅ​ថ្ងៃទី ២២ កក្កដា នេះ ដោយយោង​លើ​មាត្រា ៤០ និង​មាត្រា ៨ ថ្មី នៃ​ច្បាប់​ស្តីពី​ចរាចរណ៍​ផ្លូវគោក និង​ប្រសាសន៍​របស់លោក​នាយ​ឧ​ត្ត​ម សេនីយ៍ ហ៊ឹម យ៉ាន អគ្គ​ស្នងការរង​នគរបាលជាតិ​។​

​សេចក្តីណែនាំ​នោះ បានបញ្ជាក់​ថាៈ ដើម្បី​ធានា​ដល់​ការកាត់បន្ថយ នូវ​គ្រោះថ្នាក់​ចរាចរណ៍ ឱ្យនៅ​កម្រិត​ទាប​បំផុត នៅក្នុង​ភូមិសាស្ត្រ​ខេត្តកំពង់ចាម ប្រធាន​អនុគណៈកម្មការ​សុវត្ថិភាព ចរាចរណ៍៍​ផ្លូវគោក​ខេត្ត​នេះ សូម​ដាក់ចេញ​នូវ​សេចក្តីណែនាំ​មួយចំនួន ដល់​គ្រប់​មន្ទីរ អង្គភាព ជុំវិញ​ខេត្ត រដ្ឋបាល​ក្រុង​-​ស្រុក ឃុំ​-​សង្កាត់ គ្រប់​ស្ថាប័ន​សាធារណៈ និង​ឯកជន គ្រឹះស្ថានសិក្សា រោងចក្រ សហគ្រាស រួមទាំង​គ្រប់​ក្រុមគ្រួសារ អាណាព្យាបាល សិស្សានុសិស្ស និង​បងប្អូន​ប្រជាពលរដ្ឋ​គ្រប់រូប​ថា ត្រូវមាន​បណ្ណ​បើកបរ ចំពោះ​រថយន្ត គ្រប់​ប្រភេទ ទោច​ក្រ​ក្រ​យានយន្ត សណ្តោង​រ៉ឺម៉ក និង​ត្រីចក្រយានយន្ត យានយន្ត ដែលមាន​ស៊ីឡាំង ចាប់ពី ១២៥ សង់ទីម៉ែត្រ ឡើងទៅ​។​

​សេចក្តីណែនាំ បានបញ្ជាក់​ទៀតថាៈ សម្រាប់​ការបើកបរ​យានយន្ត ដែលមាន​ទំហំ​ស៊ីឡាំង ចាប់ពី ១២៥ សង់ទីម៉ែត្រ ចុះក្រោម អ្នកបើកបរ មិន​តម្រូវឱ្យមាន​បណ្ណ​បើកបរ​ឡើយ ប៉ុន្តែ​ត្រូវមាន​អាយុ ១៥ ឆ្នាំ​ឡើង​។​

​ការប្រើប្រាស់​យានយន្ត ត្រូវ​បំពាក់​ឧបករណ៍ ឱ្យបាន​គ្រប់គ្រាន់ តាម​លក្ខណៈ​បច្ចេកទេស ដែល​ច្បាប់​បានកំណត់​។ ត្រូវ​ចូលរួម​ផ្សព្វផ្សាយ ដល់​មន្ត្រី បុគ្គលិក ជាពិសេស​បងប្អូន ប្រជាពលរដ្ឋ បន្ត​ផ្សព្វផ្សាយ​ដល់​កូនចៅ ក្នុងបន្ទុក​ឱ្យ​គោរព​បាន តាម​កំណ​ត់នៃ​ច្បាប់ និង​មន្ត្រី​អនុវត្ត​ច្បាប់ ត្រូវប្រកាន់យក​អាកប្ប​កិរិយា សីលធម៌​វិ​ជ្ជ​ជីវៈ និង​អនុវត្ត​ច្បាប់ ឱ្យបាន​ម៉ឺងម៉ាត់​បំផុត​៕/V​