​ប្រែ​សម្រួលៈ​បំណង​(XINHUA, NYTIMES)៖ ប្រធានាធិបតី​ចិន​លោក​ស៊ី ជីន​ភីង​កាលពី​ថ្ងៃ​សុក្រ​ទី​២២​កក្កដា​បាន​ផ្ញើ​សារ​សម្តែង​សមានចិត្ត​ដល់​ប្រធានាធិបតី​អាម៉េរិក​លោក ចូ បៃ​ដិន អំពី​ការ​ដែល​​មេដឹកនាំ​អាម៉េរិក​រូបនេះ​កើតកូ​វីដ​១៩​។​

​ក្នុង​សារ​របស់​លោក លោក​ស៊ី​បាន​និយាយថា​ក្រោយ​ពី​ដឹង​ថា​លោកបៃ​ដិន​ឆ្លង​វីរុស​កូរ៉ូណា លោក​មាន​បំណង​សម្តែង​សមានចិត្ត​ដោយស្មោះ​របស់លោក​ចំពោះ​ប្រធានាធិបតី​អាម៉េរិក​និង​ជូនពរ​អោយ​លោក​​ឆាប់​ជា​ពី​ជំងឺ​។​

​លោកបៃ​ដិន ដែល​បាន​តេស្តិ៍​វិជ្ជមាន​កូវី​ដ​១៩ បាន​ចេញ​រោគសញ្ញា​ស្រាល​ហើយ​បន្ត​ធ្វើការ​ពី​កន្លែង​ដាក់​ខ្លួន​នៅ​ដាច់​ពី​គេ នេះ​បើ​តាម​សេត​វិមាន​ប្រកាស​កាលពី​ថ្ងៃ​ព្រហស្បតិ៍​។​លោកបៃ​ដិន​ធ្វើ​ការចេញ​​ពី​និវាសដ្ឋាន​សេត​វិមាន​កាលពី​ថ្ងៃ​ព្រហស្បតិ៍ ដោយ​ថែម​ទាំង​បញ្ចេញ​វីដេអូ​មួយ​ផង​ដើម្បី​រម្ងាប់​ការព្រួយបារម្ភ​អំពី​ស្ថានភាព​ជំងឺ​របស់​លោក​។​

​ដោយ​ឈរ​នៅ​យ៉​មុខ​នៃ​និវាសដ្ឋាន លោក​បាន​និយាយ​ក្នុង​វីដេអូ​ថា « ខ្ញុំ​មិន​អី​ទេ បង្ហើយ​ការងារ​បាន​ច្រើន​។​ខ្ញុំ​ជឿថា​ខ្ញុំ​មិន​អី​ទេ​»​។​

​ផល​ចេញពី​ការឆ្លង​កូ​វីដ​លើ​មេដឹកនាំ​អាម៉េរិក​រូបនេះ​នៅ​មិនទាន់​ដឹង​នៅឡើយ ដោយ​អនុ​ប្រធានាធិបតី​លោកស្រី កា​ម៉ា​ឡា ហារី​ស និង​នាយសេនាធិការ រ៉ុន ក្លេន​(Ron Klain)​បាន​មាន​ទំនាក់ទំនង​​ជិតដិត​ជាមួយ​លោក​ប្រធានាធិបតី ៕

​ប្រធានាធិបតី​អាម៉េរិក ចូ បៃ​ដិន បាន​និយាយ​ទៅកាន់​សម​ភាគី​ចិន​ក្នុងអំឡុង​ជំនួប​តាម​វីដេអូ​បន្ត​ផ្ទាល់​មួយ​កាលពី​ខែវិច្ឆិកា ឆ្នាំ​២០២១