ដោយៈ​សុផល​/ភ្នំពេញ​៖ លោក គិត ចន្ទ​ដា​រា​រិ​ទ្ធ អគ្គនាយករង​នៃ​អគ្គនាយកដ្ឋាន​ភស្តុភា​រកម្មបាន​អញ្ជើញ​ដឹកនាំ​គណៈប្រតិភូ​កម្ពុជាអញ្ជើញចូលរួម​សន្និសីទ​ឧ​ត្ត​ម​មន្ត្រី​ដឹកជញ្ជូន អាស៊ាន​-​ជប៉ុន លើក​ទី​២០ កាលពីថ្ងៃទី២០ខែកក្កដាកន្លងទៅនេះតាម​ប្រព័ន្ធ​វីដេអូ​ពី​ចម្ងាយ​ពី​សំណាក់​ថ្នាក់ដឹកនាំ​ឧ​ត្ត​ម​មន្ត្រី​ដឹកជញ្ជូន​(STOM Leaders) របស់​បណ្តា​ប្រទេស​អាស៊ាន​ទាំងអស់ ថ្នាក់ដឹកនាំ​ឧ​ត្ត​ម​មន្ត្រី​ដឹកជញ្ជូន​របស់​ជប៉ុន លេខាធិការដ្ឋាន​អាស៊ាន គណៈប្រតិភូ​ពី​ភាគី​កម្ពុជា​រួមមាន​អង្គភាព​ពាក់ព័ន្ធ​ទាំងអស់​ក្រោម​ឱវាទ​ក្រសួង និង​រដ្ឋលេខាធិការដ្ឋាន​អាកាសចរ​ស៊ីវិល​កម្ពុជា​។

ប្រភពក្រសួងសាធារណការនិងដឹកជញ្ជូននៅថ្ងៃទី២២ខែកក្កដាបានឱ្យដឹង​ថា សន្និសីទ​នេះ​ស្នើឡើង​ដោយ​ភាគី​ជប៉ុន​ក្នុង​គោលបំណង​ដើម្បី (១) ពិនិត្យមើល​វឌ្ឍនភាពនៃ​ការអនុវត្ត​ផែនការ​សកម្មភាព នៃ​ភាពជា​ដៃគូ​ក្នុង​វិស័យ​ដឹកជញ្ជូន​រវាង​អាស៊ាន​-​ជប៉ុន AJTP (ASEAN-Japan Transport Partnership) និង(២) ការពិចារណា​លើ​ការ​សមិទ្ធិ​លទ្ធភាព និង​គំនិត​ផ្តួចផ្តើម​ថ្មី​សម្រាប់​ដាក់​ឆ្លង​សុំ​ការអនុម័ត​ជា​ផ្លូវការ​ពី​កិច្ចប្រជុំ​ថ្នាក់​រដ្ឋមន្ត្រី​ដឹកជញ្ជូន​អាស៊ាន​លើក​ទី​២០ (20th ATM-Japan) នៅ​ខែតុលា ឆ្នាំ​២០២២ ខាងមុខនេះ​។

​ឧ​ត្ត​ម​មន្ត្រី​ដឹកជញ្ជូន​អាស៊ាន និង​ជប៉ុន បាន​ពិនិត្យ​ទៅលើ​ការងារ​សំខាន់ៗ​ចំនួន​៣​ដែល​បាន​ស្នើឡើង​ដោយ​ប្រទេស​ជប៉ុន​រួមមាន​៖ (១) សៀវភៅ​ណែនាំ​អំពី​ការអនុវត្ត​ល្អ​បំផុត​នៅក្នុង​វិធានការ​សន្តិសុខ​កំពង់​ផែ​សម្រាប់​ការបណ្តុះបណ្តាល​គ្រូ​បង្គោល សៀវភៅ​ណែនាំ និង​ការបណ្តុះបណ្តាល​សវនកម្ម​គំរូ (២) របាយការណ៍​ចុងក្រោយ​ស្តីពី​ការស្រាវជ្រាវ​រួម​លើ​ការថែទាំ​ស្ពាន​សម្រាប់​ច្រករបៀង​ឆ្លង​ព្រំដែន​អាស៊ាន និង (៣) ផែនការ​ការងារ​គម្រោង​សន្តិសុខ​អាកាសចរណ៍​អាស៊ាន​-​ជប៉ុន (២០២៣-២០២៧)​។

ប្រផាពដដែលបន្តថា ​ក្រោយពី​បាន​ពិនិត្យ​ពិភាក្សាគ្នា​យ៉ាង​លម្អិត​ក្នុងន័យ​ស្ថាបនា និង​ប្រកបដោយ​ស្មារតី​ទទួលខុសត្រូវ​ខ្ពស់ និង​ដោយ​យល់ឃើញថា ការងារ​សំខាន់ៗ​ទាំង​៣​ខាងលើនេះ នឹង​រួមចំណែក​ក្នុងការ​ធ្វើឱ្យ​ប្រសើរឡើង និង​បង្កើន​ប្រសិទ្ធភាព​ក្នុង​វិស័យ​ដឹកជញ្ជូន និង​ភស្តុភា​រកម្ម សន្និសីទ​ឧ​ត្ត​ម​មន្ត្រី​ដឹកជញ្ជូន អាស៊ាន​-​ជប៉ុន លើក​ទី​២០ បាន​ឯកភាពគ្នា​ជាគោលការណ៍ ឱ្យមាន​ការសិក្សា​គ្រប់​ជ្រុងជ្រោយ​បន្ថែមទៀត​ទៅលើ​ការងារ​ធំៗ​ទាំង​៣​ខាងលើ ហើយ​លទ្ធផល​នៃ​ការសិក្សា​នេះ នឹងត្រូវ​ដាក់​ឆ្លង​កិច្ចប្រជុំ​ថ្នាក់​រដ្ឋមន្ត្រី​ដឹកជញ្ជូន​អាស៊ាន​លើក​ទី​២០(20th ATM + Japan Meeting) នៅ​ពាក់កណ្ដាល​ខែតុលាខាងមុខនេះ​៕​សរន