​ប្រែ​សម្រួលៈ​បំណង​(​ដេល្លី​ម៉េល​)៖ សហរដ្ឋ​អាម៉េរិក​បាន​និយាយ​កាលពី​ថ្ងៃ​សុក្រ​ថា ខ្លួន​នឹង​ចាប់​អោយ​រុស្ស៊ី​ទទួលខុសត្រូវ​ចំពោះ​ការអនុវត្ត​កិច្ចព្រមព្រៀង​ដែល​សម្របសម្រួល​ដោយ​អង្គការសហប្រជាជាតិ​​មួយ​ស្តីពី​ការ​បន្ត​នាំ​ចេញ​គ្រាប់​ធញ្ញជាតិ​ចេញពី​បណ្តា​កំពង់ផែ​នៅ​សមុទ្រ​ខ្មៅ​របស់​អ៊ុ​យក្រែន និង​ក៏​បាន​អំពាវនាវ​អោយ​ចិន​បញ្ចេញស្តុក​គ្រាប់​ធញ្ញជាតិ​សំរាប់​តំរូវការ​មនុស្សធម៌​សកល​។​

រុស្ស៊ី​និង​អ៊ុយ​ក្រែនជា​អ្នកផ្គត់ផ្គង់​ស្រូវ​សាឡីដ៏​ធំ​លើលោក ហើយ​ប្រតិបត្តិការ​យោធា​របស់​រុស្ស៊ី​ចាប់តាំងពី​ថ្ងៃ​២៤​កុម្ភៈ​ចូល​ក្នុងប្រទេស​ក្បែរ​ខាង​ខ្លួន​បាន​រុញ​តំលៃ​ស្បៀង​អោយ​ឡើង​ទូទៅ បង្ក​ជា​​វិបត្តិ​ស្បៀង​សកល​មួយដល់​ថ្នាក់​អង្គការ​កម្មវិធី​ស្បៀងអាហារ​ពិភពលោក​និយាយថា វា​បាន​រុញច្រាន​មនុស្ស​៤៧​លាន​នាក់​ចូល​ក្នុង​ការ​អត់​ឃ្លាត់​យ៉ាង​អត្ត​ខាត់​។​

​សូមបញ្ជាក់​ថា ​រុស្ស៊ី​និង​អ៊ុយ​ក្រែន​បាន​ចុះហត្ថលេខា​លើ​កិច្ច​ព្រមព្រៀង​សំខាន់​ជា​ប្រវត្តិសាស្ត្រ​មួយ​កាលពី​ថ្ងៃ​សុក្រ​ទី​២២​កក្កដា ដើម្បី​បើក​បណ្តា​កំពង់ផែ​សមុទ្រ​ខ្មៅ​របស់​អ៊ុយ​ក្រែន​ឡើងវិញ​សំរាប់​នាំ​ចេញគ្រាប់​ធញ្ញជាតិទាំងរបស់អ៊ុយក្រែននិងរុស្ស៊ី​ទៅ​​កាន់​ទីផ្សារ​ពិភពលោក​។​

​សង្គ្រាម​បាន​បញ្ឈប់​ការនាំចេញ​របស់​អ៊ុ​យក្រែន ដោយ​នាវា​រាប់សិប​ជាប់​នៅ​កំពង់ផែ​ជាមួយនឹង​គ្រាប់​ធញ្ញជាតិ​ប្រមាណ​២០​លាន​តោន​កកស្ទះ​នៅក្នុង​ឃ្លាំង​។​គ្រាប់ធញ្ញជាតិនិងជីរគីមីរបស់រុស្ស៊ីក៏ជួបបញ្ហានាំចេញ ដោយសារតែទណ្ឌកម្មលោកខាងលិច។

​ឯកអគ្គរដ្ឋទូត​អាម៉េរិក ប្រចាំ​នៅ​អង្គការសហប្រជាជាតិ​លោកស្រី លីន​ដា ថូ​ម៉ាស​-​ហ្គ្រី​ន​ហ្វៀ​ល​(Linda Thomas-Greenfield)​បាន​និយាយថា​រដ្ឋាភិបាល​ទីក្រុង​វ៉ាស៊ីនតោន​សង្ឃឹមថា​«​កិច្ច​ព្រម​​ព្រៀង​នេះ​នឹង​ជួយ​សម្រាល​វិបត្តិ​ដែល​រុស្ស៊ី​បង្កឡើង​» និង​ថា​«​យើង​នឹង​តាមដាន​មើល​យ៉ាង​ដិតដល់​ដើម្បី​ធានា​ថា រុស្ស៊ី​អនុវត្ត​វា​យ៉ាង​ពិតប្រាកដ​»​។​

​ក្នុងពេល​ជាមួយគ្នា លោក​ជេ​មស៍ អូ​ប្រៀន​(James O’Brien) ប្រធានការិយាល័យ​សម្រប​សម្រួល​ការដាក់ទណ្ឌកម្ម​នៅ​ក្រសួងការបរទេស​អាម៉េរិក​បាន​និយាយថា អាម៉េរិក​ក៏​ចង់​ឃើញ​ចិន​ជួយ​ប្រ​​យុទ្ធ​ប្រឆាំងនឹង​វិបត្តិ​ស្បៀង​ពិភពលោក​នេះ​ដែរ​។​

​លោក​បាន​និយាយថា «​យើង​ចង់​ឃើញ​ចិន​ធ្វើ​សកម្មភាព​អោយ​សមជា​មហាអំណាច​និង​ផ្គត់ផ្គង់​គ្រាប់​ធញ្ញជាតិ​ច្រើនឡើង​ដល់​ប្រជាជន​នៅ​ជុំវិញ​ពិភពលោក​។​ចិន​ជា​អ្នកទិញ​គ្រាប់​ធញ្ញជាតិ​យ៉ាងសកម្ម​​ណាស់​មួយ​និង​ក៏​កំពុង​ស្តុក​ទុក​គ្រាប់​ធញ្ញជាតិច្រើនបំផុត​ផងដែរ​…​នៅ​ពេល​មួយ​ដែល​មនុស្ស​រាប់រយ​លាន​នាក់​ធ្លាក់​ក្នុងដំណាក់កាល​មហន្តរាយ​នៃ​អសន្តិសុខ​ស្បៀង​»​។​

​បើ​យោង​តាម​ក្រុមប្រឹក្សា​ធញ្ញជាតិ​អន្តរជាតិ​(International Grains Council) ស្តុក​គ្រាប់​ធញ្ញជាតិ​ចិន​នៅត្រឹម​ចុង​រដូវ​ប្រមូល​ផល​ឆ្នាំ​២០២១-២០២២ មាន​ប្រមាណ​៣២៣,៤​លាន​តោន គឺ​​លើ​ពាក់កណ្តាល​នៃ​ស្តុក​គ្រាប់​ធញ្ញជាតិ​សរុប​៦០៧,៤​លាន​តោ​នា​នៅ​ទូទាំង​ពិភពលោក​។​វា​ហួស​ឆ្ងាយ​ពី​ស្តុក​គ្រាប់​ធញ្ញជាតិ​អាម៉េរិក​ដែលជា​អ្នក​នាំ​ចេញ​គ្រាប់​ធញ្ញជាតិ​កំពូល ដែល​មាន​ប្រមាណ​៥៧,៨​លាន​​តោន​ប៉ុណ្ណោះ​។​

​ស្ថានទូត​ចិន​នៅ​ក្រុង​វ៉ាស៊ីនតោន បាន​និយាយថា​ចិន​ត្រូវ​ការរក្សា​គ្រាប់​ធញ្ញជាតិ​បំរុង​ក្នុង​ចំនួន​កំណត់​មួយ ដោយសារតែ​ខ្លួន​មាន​ដី​កសិកម្ម​ត្រឹមតែ​៩​ភាគរយ​នៃ​ដី​កសិកម្ម​លើ​ពិភពលោក តែ​ប្រជាជន​​ស្មើនឹង​២០​ភាគរយ​នៃ​ប្រជាជន​លើ​លោក​៕

​ប្រធានាធិបតី​តួ​ក​គី និង​អគ្គលេខា​អង្គការសហប្រជាជាតិ(រូបអង្គុយ) ធ្វើ​ជា​សាក្សី​នៃ​ការចុះហត្ថលេខា​លើកិច្ចព្រមព្រៀង​បញ្ឈប់​ការរារាំង​ការដឹកជញ្ជូន​ធញ្ញជាតិ​និង​ជីរ​គីមី​ចេញពី​អ៊ុយ​ក្រែ​ន​និង​រុស្ស៊ី កាលពី​ថ្ងៃ​២២​កក្កដា នៅ​ទីក្រុង​អ៊ី​ស្តា​ន់​ប៊ុលប្រទេសតួកគី