​ដោយ​៖ សុវណ្ណ​កុម្ភៈ / ភ្នំពេញ​៖ ពិការភាព តែងតែ​ធ្វើ​ឲ្យ​មនុស្ស អស់សង្ឃឹម នៅក្នុង​ជីវិត​របស់ខ្លួន តែបើ​គេ​ចេះ​ច្នៃ ឬ​មាន​អ្នក​លើកទឹកចិត្ត ជួយ​ជំរុញ​នោះ ភាព​ពិការ វា​លែង​ជា​រឿង ដែល​សោកសៅ សម្រាប់​ជីវិត​ទៀតហើយ ។​

​ករណី​កីឡាករ​ជនពិការ យ៉យ កុសល មាន​សេចក្តីសង្ឃឹម ក្នុង​ជីវិត បន្ទាប់ពី​បាន​ចូល​ប្រ​​ឡូ​ក ក្នុង​អាជីព​កីឡាវាយកូនឃ្លីលើតុ និង​បាន​ចេញទៅ​ប្រកួត លើ​ឆាក​អន្តរជាតិ ជាច្រើនលើក​។​

​កីឡាករ​រូបនេះ បាន​លេង​កីឡាវាយកូនឃ្លីលើតុ នៅពេល​អាយុ​ប្រហែលជា ២០ ឆ្នាំ ដោយសារតែ​សេចក្តីស្រឡាញ់ និង​ចង់​ឲ្យ​ខ្លួន​រឹងមាំ​ទាំង​ផ្លូវកាយ និង​ផ្លូវចិត្ត​។​

​រយៈពេល​ប្រមាណ ៥ ឆ្នាំ​កន្លងទៅនេះ កីឡា បានផ្តល់​ឲ្យ​រូបគេ មាន​សុខ​ភាពល្អ រាងកាយ​រឹងមាំ និង​សប្បាយចិត្ត បើ​ប្រៀបធៀប​នឹង​ពេល ដែល​ខ្លួន​មិនទាន់បាន​ចូល​កីឡា​។

កីឡាករ​រូបនេះ បាន​និយាយថាៈ ” កីឡា​ផ្តល់​ឲ្យ​ជីវិត​ខ្ញុំ ល្អប្រសើរ​ច្រើន​។ ទី​១ រូបគេ​មាន សុខ​ភាពល្អ​រឹងមាំ ជាង​កាល​មិនទាន់​ចូល​កីឡា​។ ទី​២ ខ្ញុំ​អាច​ទទួលបាន​ប្រាក់ចំណូល​ខ្លះ សម្រាប់​ចិញ្ចឹមជីវិត ព្រោះ​យើង​ជា​ជនពិការ ពិបាក​រក​ការងារ​ណាស់​។ ទី​៣ កីឡា​បានធ្វើ ឲ្យ​ខ្ញុំ បាត់​ធុញថប់​។ ធ្វើ​ឲ្យ​ខ្ញុំ​មិនសូវ​ពិបាកចិត្ត​ច្រើន​ដូច​មុន ។ ពេល​ក្លាយជា​កីឡាករ ជម្រើសជាតិ មាន​ប្រយោជន៍​ដល់​សង្គម ធ្វើ​ឲ្យ​ខ្ញុំ​សប្បាយចិត្ត ហើយ​ក៏មាន​មោទនភាព ខ្លួនឯង​ជាខ្លាំង ” ។​

​ក្រោយពី​បានជា​ប់​ជា​កីឡាករ​ជម្រើសជាតិ យ៉យ កុសល ទទួលបាន​ឱកាស​ចេញទៅ​ប្រកួត នៅក្រៅ​ប្រទេស ក្នុង​ព្រឹត្តិការន៍​កីឡា​ធំៗ ជាច្រើន ដែល​មិន​នឹកស្មានថា ខ្លួន​មានឱកាស បែបនេះ​ឡើយ​។ គេ​ធ្លាប់បាន​ចេញទៅ​ប្រកួត​ក្នុង​កីឡា​យុវជន​ពិការ​អាស៊ី (Asian Youth Para Games) នៅ​ប្រទេស​កូរ៉េខាងត្បូង កាលពី​ឆ្នាំ​២០១៧​។ នៅពេលនោះ រូបគេ​ទទួលបាន​មេដាយ​សំរឹទ្ធ លើ​វិញ្ញាសា​ឯកត្តជន​។ ឆ្នាំ​២០១៧ ដដែល រូបគេ​បាន​ទៅ​ប្រកួត​អាស៊ាន​ប៉ា​រ៉ា​ហ្គេម (Asean Para Games) នៅ​ប្រទេស​ម៉ាឡេស៊ី និង ឆ្នាំ​២០១៨ បាន​ចូលរួម​ប្រកួត កីឡា​ជនពិការ​អាស៊ី (Asian Para Games) នៅ​ប្រទេស​ឥណ្ឌូណេស៊ី​។​

​មុនពេល​មានជីវិត​រីករាយ និង​មោទនភាព​ចំពោះ​ខ្លួនឯង យ៉យ កុសល ក៏​ជួបនឹង​បញ្ហាលំបាក ជាច្រើន​ដែល​ធ្វើ​ឲ្យ​រូបគេ ស្ទើរតែ​បោះបង់ចោល​អាជីព​កីឡា ម្តងម្កាល​ទៅហើយ​។

​កីឡាករ​រូបនេះ បាន​និយាយថាៈ ” ពេល​ហាត់​ខ្លាំង​មែនទែន ពិបាក​ណាស់ ឈឺចាប់ ពេញ​ខ្លួន​។ យើង​ពិការ​អីចឹង ពេល​ហាត់​ខ្លាំង ឈឺចាប់​ខ្លាំង ហើយ​ត្រូវការ​សម្រាក​យូរ​។ ដល់ពេល​ចូល​ហាត់​វិញ ត្រូវការ​ពេល​យូរ​ទៀត​។ តស៊ូ​ណាស់ ពីមុន អត់​ទាន់​មាន​ប្រាក់ ចំណូល​ផង ធ្វើ​ឲ្យ​គេ​ទ្រាំ​លែង​ចង់បាន និង​បាក់​ទឹកចិត្ត​ម្ដងៗ ចង់​បោះបង់ចោល ” ។​

​ដោយមាន​ការជំរុញ និង​លើកទឹកចិត្ត​ពី​ឪពុកម្តាយ ព្រមទាំង​ថ្នាក់ដឹកនាំ គណៈកម្មាធិការ​ជាតិ ប៉ា​រ៉ា​ឡាំ​ពិ​ក​កម្ពុជា បានធ្វើ​ឲ្យ​រូបគេ តស៊ូ​ជម្នះ​រាល់​ការលំបាក​គ្រប់បែបយ៉ាង ដើម្បី​បន្ត​អាជីព កីឡា រហូតដល់​សព្វថ្ងៃ ដែល​ផ្តល់​ឲ្យ​ខ្លួន កាន់តែ​ពេញចិត្ត​ខ្លាំង​ឡើង​។​

​ឥឡូវនេះ ដល់ពេល​កីឡាករ យ៉យ កុសល តំណាង​ជម្រើសជាតិ​ចេញទៅ​ប្រកួត​កីឡា​អាស៊ាន​ប៉ា​រ៉ា​ហ្គេម លើក​ទី​១១ នៅ​ប្រទេស​ឥណ្ឌូណេស៊ី​។ រូបគេ​ត្រូវ​ប្រកួត​ពីរ វិញ្ញាសា គឺ​ឯកត្តជន និង​វាយ​គូ​បុរស​។​

​សម្រាប់​ព្រឹត្តិការណ៍​អាស៊ាន​ប៉ា​រ៉ា​ហ្គេម ឆ្នាំ ២០២២​នេះ យ៉យ កុសល បាន​ប្រាប់ថា ក្រុម​ម្ចាស់ផ្ទះ​ឥណ្ឌូណេស៊ី និង ថៃ មាន​កម្រិត​សមត្ថភាព​ខ្ពស់​ជាងគេ សម្រាប់​កីឡា​វាយ កូនឃ្លី​លើ​តុ ពីព្រោះ​ប្រទេស​ទាំងពីរ​នេះ តែងតែ​ទទួលបាន​មេដាយមាស​ច្រើន​។ ចំណែក​ប្រទេស​ផ្សេង មិន​លើសខ្វះ​គ្នា​ប៉ុន្មាន​ឡើយ​។ តាម​កម្រិត​សមត្ថភាព​របស់​យើង សព្វថ្ងៃនេះ គឺ​មិន​ចាញ់​គេ​ប៉ុន្មាន​ទេ​។ យើង​អាច​ទទួលបាន​ចំណាត់ថ្នាក់​លេខ​៣ (​មេដាយ​សំរឹទ្ធ​)​។ វិញ្ញាសា​ដែល​សង្ឃឹម​ច្រើន គឺ​វាយ​គូ​បុរស ពីព្រោះ​យើង​ហ្វឹក ហាត់ សហការគ្នា​បានល្អ​៕/V​