ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លោក វីន ស្មិ​កមែន (Vince McMahon)​អ្នក​ផ្គូរ​ផ្គង​កីឡាករ​កីឡាកាស​ដ៏​ល្បីល្បាញ​មួយរូប ដែល​បាន​កសាង​កម្មវិធី​កីឡាកាស​ដ៏​ពេញនិយម​ទៅ​ជា​អា​​ណា​ចក្រ​កម្សាន្ត​លើ​ពិភពលោក បាន​ប្រកាស​កាលពី​ថ្ងៃ​សុក្រ​ទី​២២​កក្កដា​ថា គាត់​នឹង​ចូលនិវត្តន៍​ពី​តំណែង​ប្រធាន​ស្ថាប័ន​កីឡាកាស​ពិភពលោក (WWE)​ក្រោយ​មាន​ការចោទប្រកាន់​ជាច្រើន​​ពី​បទ​ប្រព្រឹត្តិ​ខុស​ខាង​ផ្លូវភេទ​ធ្ងន់ធ្ងរ​។​

​លោកស្មិ​កមែ​ន​ដែល​មិត្តភក្តិ​យូរអង្វែង​របស់​គាត់​រួមមាន​លោក ដូ​ណា​ល់ ត្រាំ បាន​ក្លាយជា​តួអង្គ​នៅក្នុង​ការផ្សព្វផ្សាយ​និង​ផ្គូរ​ផ្គង​កីឡាកាស​របស់គាត់​ផ្ទាល់​នៅ​ដំណាក់កាល​មួយ​ហើយ​ថែមទាំង​​បាន​បើក​ក្របខ័ណ្ឌ​បាល់​ឱប XFL ដើម្បី​ប្រជែង​នឹង​ក្របខ័ណ្ឌ​បាល់​ឱប NFL ទៀតផង​។​

​លោក​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ខណៈ​នេះ​ខ្ញុំ​ឈាន​ចូលដល់​អាយុ​៧៧ ឆ្នាំ ខ្ញុំ​មាន​អារម្មណ៍​ថា​វា​ដល់ពេល​ដែល​ខ្ញុំ​ត្រូវ​ចូល​និវត្តន៍​ក្នុងនាម​ជា​ប្រធាន​និង​ជា​នាយក​ប្រតិបត្តិ​នៃ WWE​។ ឆ្លងកាត់​ច្រើន​ឆ្នាំ​មកនេះ វា​ជា​ឯកសិទ្ធិ​មួយ​ក្នុង​ការជួយ WWE នាំ​មក​ជូន​លោកអ្នក​នូវ​សេចក្តី​អំណរ បំផុសគំនិត​លោកអ្នក ធ្វើឱ្យ​លោក​អ្នក​រំភើប ធ្វើឱ្យ​លោក​អ្នក​ភ្ញាក់ផ្អើល​និង​តែងតែ​ផ្តល់​ការកម្សាន្ត​​ដល់​លោកអ្នក​”​។​

​លោកស្មិ​កមែ​ន​បាន​លាលែង​ពី​តួនាទី​របស់​គាត់​ជាមួយ WWE កាលពី​ខែ​មុន​ដោយ​រង់ចាំ​លទ្ធផល​នៃ​ការស៊ើបអង្កេត​ផ្ទៃក្នុង​បន្ទាប់​ពី​មាន​ការចោទប្រកាន់​ថា​គាត់​មាន​ទំនាក់ទំនង​ស្នេហា​លួចលាក់​​ជាមួយ​បុគ្គលិក​ម្នាក់ ហើយ​បាន​បង់ប្រាក់​ឱ្យ​នាង​ចំនួន ៣ លាន​ដុល្លារ​ដើម្បី​រក្សា​រឿងនេះ​ជាសម្ងាត់​។​

​កូនស្រី​របស់​គាត់​ឈ្មោះ ស្តេ​ហ្វា​នី (Stephanie) ត្រូវបានតែងតាំង​ជា​នាយក​ប្រតិបត្តិ​និង​ជា​ប្រធាន​បណ្តោះអាសន្ន ខណៈ​ការស៊ើបអង្កេត​កំពុង​បន្ត​ចំពេល​មាន​ការចោទប្រកាន់​កាន់​តែ​ទូលំ​ទូ​​លាយ​អំពី​អំពើ​ខុសឆ្គង​។​

​កាសែត Wall Street Journal បាន​រាយការណ៍​កាលពី​ពីរ​សប្តាហ៍​មុន​ថា លោកស្មិ​កមែ​ន​បាន​បង់ប្រាក់​ជា​ង ១២ លាន​ដុល្លារ​ដល់​ស្ត្រី​បួន​នាក់​ដែល​ធ្លាប់​ជាប់​ពាក់ព័ន្ធ​ជាមួយ WWE ក្នុង​រយៈពេល ១៦ ឆ្នាំ​ចុងក្រោយ​នេះ​ដើម្បី​រក្សា​ភាព​ស្ងៀមស្ងាត់​អំពី​ស្នេហា​លួចលាក់​និង​ការចោទប្រកាន់​អំពី​ការប្រព្រឹត្ត​ខុស​នានា​រួមទាំង​អតីត​កីឡាកាស​ស្រី​ម្នាក់​ដែល​អះអាង​ថា​គាត់​បាន​បង្ខិតបង្ខំ​នាង​ឱ្យ​បៀម​​ប្រដាប់​ភេទ​របស់គាត់​ទៀតផង​៕

​លោក វីន ស្មិ​កមែន ចូលនិវត្តន៍​ពី WWE​ក្រោយ​សាង​អោយ​ស្ថាប័ន​នេះ​មាន​ភាព​ល្បី​រន្ទឺរ​រាប់​ទសវត្សរ៍​