ដោយៈ ប​.​ជ័យ / ព្រំដែន​កម្ពុជា ថៃៈ អាជ្ញាធរ​ដែនដី និង​សមត្ថកិច្ច​ពាក់ព័ន្ធ នៅ​ទូទាំង ខេត្តបន្ទាយមានជ័យ កាលពី​ល្ងាច​ថ្ងៃទី​២២ ខែកក្កដា ឆ្នាំ​២០២២ បាន​កំពុង​តាមដាន ស្រាវជ្រាវ​រកមុខ​សញ្ញា ជនជាតិ​នី​ហ្សេ​រី​យ៉ា មាន​ជំងឺ​អុត​ស្វា (Monkey pox) ម្នាក់ ដែល​អាច​រត់​ឆ្លងដែន​ខុសច្បាប់ ពី​ប្រទេស​ថៃ ចូលមក​កម្ពុជា តាម​ច្រករបៀង​ណាមួយ ជិត​ច្រកព្រំដែន​អន្តរជាតិ​ថ្មី បាន​ណង​អៀន​- ស្ទឹង​បត់ (​ស្រុក​អារញ្ញ​ប្រាថេត ខេត្ត​ស្រះកែវ -​ក្រុង​ប៉ោយប៉ែត ខេត្តបន្ទាយមានជ័យ​) ។​

​យោង​សារ​សម្លេង​មួយ លោក អ៊ុំ រាត្រី អភិបាលខេត្ត​បន្ទាយមានជ័យ បាន​អំពាវនាវ និង ណែនាំ​បន្ទាន់​មួយ ទៅគ្រប់​អាជ្ញា​ធរមាន​សមត្ថកិច្ច ក្នុងភូមិ​សាស្ត្រ​ខេត្ត និង​តាម​តំបន់​ព្រំដែន ឱ្យ​យកចិត្តទុកដាក់​តាមដាន ស្រាវជ្រាវ រកមុខ​សញ្ញា​ជនបរទេស​ម្នាក់ ដែល​កើត​ជំងឺ​អុត​ស្វា ហើយ​ដែល​អាច​រត់គេចខ្លួន ឆ្លងដែន​ខុសច្បាប់ ពី​ប្រទេស​ថៃ ចូលមក​កម្ពុជា តាម​ច្រកព្រំដែន​ណាមួយ ក្នុង​ខេត្តបន្ទាយមានជ័យ ពីថ្ងៃ​ទី​២២ ខែកក្កដា ឆ្នាំ​២០២២ ។​

​សារ​សម្លេង​មួយ​នេះ​របស់លោក អភិបាលខេត្ត​បន្ទាយមានជ័យ បានធ្វើ​ឡើង បន្ទាប់ពី​មន្ត្រី ការិយាល័យ​ទំនាក់ទំនង​ព្រំដែន​ថៃ កម្ពុជា​ម្នាក់ បាន​ផ្ញើ​ព័ត៌មាន និង​រូបថត​មុខសញ្ញា​ម្នាក់​នោះ ជូន​មន្ត្រី​អាជ្ញា​ធរមាន​សមត្ថកិច្ច​កម្ពុជា កាលពី​ល្ងាច​ថ្ងៃទី​២២ ខែកក្កដា ដែលថា ជនបរទេស ម្នាក់​នោះ អាច​គេច​ពី​ប្រទេស​ថៃ ចូលទៅ​កម្ពុជា តាម​ភូមិ​ណង​អៀន ថៃ ទល់មុខ​ភូមិ​ស្ទឹង​បត់ កម្ពុជា (​ភ្ជាប់​ប័ណ្ណ និង​រូបថត ដែល​ខាង​ប្រទេស​ថៃ ក៏​ប្រកា​សរក​នាំខ្លួន​ដែរ​)​។​

​យោង​ប័ណ្ណ​សម្គាល់ និង​រូបថត មុខសញ្ញា​ជនជាតិ​នី​ហ្សេ​រី​យ៉ា​នោះ មានឈ្មោះ ស៊ើ​រ៉ុ​ម អូ​ស្មូ​ណូ ជី​ហា​ហ្ស៊ី​រី​ម (NZEROM OSMONO CHIHAZIRIM ) ភេទ​ប្រុស កាន់​លិខិតឆ្លងដែន សហព័ន្ធ​នី​ហ្សេ​រី​យ៉ា បានធ្វើ​ដំណើរ​ចេញពី​ប្រទេស​ខ្លួន ចូលមក​ប្រទេស ថៃ ។ បុរស​ជនជាតិ​នី​ហ្សេ​រី​យ៉ា​នេះ ក៏​ធ្លាប់​បានធ្វើការ​នៅ​ប្រទេស​ឥណ្ឌា កន្លងមក​ដែរ ៕/V​