​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កីឡាករ អូ​ឡេកសាន់​ដ្រ៍ ហ្ស៊ី​ន​ឆេន​កូ (Oleksandr Zinchenko) បាន​ក្លាយជា​កីឡា​ករទី​ពីរ ដែល​បាន​ចាកចេញ​ពី Manchester City​ទៅ​ចូលរួម​​ជាមួយ Arsenal ក្នុង​រដូវ​កាល​នេះ បន្ទាប់ពី​បាន​ចុះហត្ថលេខា​លើ​កុងត្រា​តម្លៃ ៣០ លាន​ផោន (៣៦ លាន​ដុល្លារ​) កាលពី​ថ្ងៃ​សុក្រ​ទី​២២​កក្កដា​។​

​អ្នក​ចាត់ការ​ទូទៅ​របស់ Arsenal លោក មី​គែល អាតិតា (Mikel Arteta)​ជា​អតីត​ជំនួយការ​គ្រូបង្វឹក​នៅ City ពី​ឆ្នាំ ២០១៦-១៩ បាន​ចុះហត្ថលេខា​ទិញ​យក​ខ្សែប្រយុទ្ធ ហ្គា​ព្រីល យ៉េ​ស៊ូស (Gabriel Jesus) ពី​អតីត​ក្លឹប​របស់​គាត់​រួចហើយ​។​

​ហ្ស៊ី​ន​ឆេន​កូ ជា​ខ្សែបម្រើ​កណ្តាល​ដែល​ភាគច្រើន​លេង​នៅ​ខ្សែការពារ​ឆ្វេង​សម្រាប់ Man City បានបញ្ចប់​អាជីព​រយៈពេល​ប្រាំមួយ​ឆ្នាំ​របស់​ខ្លួន​នៅ​កីឡដ្ឋាន Etihad Stadium​ជា​កន្លែង​ដែល​​រូបគេ​មិន​ដែល​ជាប់​ជម្រើស​ដំបូង​ឡើយ ទោះបីជា​ខ្លួន​គេ​ជា​ប្រធាន​ក្រុម​ជម្រើសជាតិ​អ៊ុយ​ក្រែន​ក៏ដោយ​។​

Arsenal មិន​បាន​បង្ហាញ​ពី​រយៈពេល​នៃ​កុងត្រា​របស់​ហ្ស៊ី​ន​ឆេន​កូ​ទេ​។​

​លោក​អាតិតា​បាន​និយាយថា “​គាត់​ជា​កីឡាករ​ដែល​ខ្ញុំ​ស្គាល់​យ៉ាង​ច្បាស់ ហើយ​បន្ត​តាម​មើល​គាត់​បន្ទាប់ពី​ខ្ញុំ​ចាកចេញ​ពី Manchester City​។​អា​ឡិច​គឺជា​អ្នកលេង​ដែល​មាន​គុណភាព​ខ្ពស់​ដែល​នឹង​​ផ្តល់​ឱ្យ​យើង​នូវ​ជម្រើស​និង​ភាពបត់បែន​”​។​

“​វា​មិន​ត្រឹមតែ​ទីតាំង​ជាច្រើន​ដែល​គាត់​អាច​លេង​បាន​ប៉ុណ្ណោះ​ទេ ប៉ុន្តែ​ភាពប៉ិនប្រសព្វ​ស្វាហាប់​របស់​គាត់​នឹង​ផ្តល់​ឱ្យ​យើង​ក្នុង​តំបន់​ប្រយុទ្ធ​និង​ការពារ​ផងដែរ​។ អា​ឡិច​គឺជា​មនុស្ស​ដែល​មាន​គុណសម្បត្តិ​និង​ចរិត​ដ៏​អស្ចារ្យ ហើយ​ខ្ញុំ​រីករាយ​ដែល​គ្រប់​គ្នា​បាន​ខិតខំ​ប្រឹងប្រែង​យ៉ាង​ខ្លាំង​ដើម្បី​នាំ​អា​ឡិច​មក​ក្លិប​”៕

ហ្ស៊ី​ន​ឆេ​នកូចូលរួម​ជាមួយ Arsenal