​ដោយ​៖ សុវណ្ណ​កុម្ភៈ / ភ្នំពេញ​៖ សហព័ន្ធ​កីឡា​រាំ​កម្ពុជា បាន​បើក​វគ្គ​បណ្ដុះបណ្ដាល​អាជ្ញា​កណ្តាល ចៅក្រម និង​មន្ត្រី​បច្ចេកទេស​របស់ខ្លួន ដែល​ចាប់ផ្ដើម​ពីថ្ងៃ​ទី​២៣ ដល់ ២៧ កក្កដា ២០២២ ។​

​លោកស្រី ញ៉ែម មរកត ប្រធាន​សហព័ន្ធ​កីឡា​រាំ​កម្ពុជា និង​លោកស្រី ម៉ក់ វណ្ណ​ស៊ីថា អនុប្រធាន​សហព័ន្ធ​កីឡា​រាំ​កម្ពុជា បានប្រកាស​ពិធី​បើក​វគ្គ​នេះ ក្រោម​ការឧបត្ថម្ភ​ពី​ក្រ​សួង​អប់រំ យុវជន និង​កីឡា ។ ​វគ្គ​នេះ​បើក​ឡើង ដើម្បី​បង្កើន​គុណភាព​ដល់​មន្ត្រី​របស់ខ្លួន ត្រៀម​រៀបចំ​មុន​ព្រឹត្តិការណ៍ ការប្រកួត​កីឡា SEA GAMES 2023 លើក​ទី​៣២ នៅ​ប្រទេស​កម្ពុជា មកដល់ ដោយមាន​សិក្ខាកាម ចំនួន ៣០ នាក់ មកពី​បណ្តា​ក្លិប​រាំ​នានា ដែលជា​សមាជិក​សហព័ន្ធ​។​

​លោកស្រី ញ៉ែម​មរកត ដែលជា​ប្រធាន​សហព័ន្ធ បាន​មានប្រសាសន៍ថាៈ វគ្គ​បណ្តុះបណ្តាល មន្ត្រី​បច្ចេកទេស​កីឡា​រាំ​នេះ ត្រូវបាន​ធ្វើឡើង ក្នុង​គោលបំណង​អភិវឌ្ឍន៍​ធនធាន​មន្ត្រី ឲ្យ​កាន់តែ​ប្រសើរ ត្រៀម​ការប្រកួត​ជើងឯក​ថ្នាក់ជាតិ នា​ខែ​ក្រោយនេះ ជាពិសេស សម្រួច​គោលដៅ ឆ្ពោះទៅ​រៀបចំ​ធ្វើជា​ម្ចាស់ផ្ទះ ការប្រកួត​កីឡា SEA GAMES 2023 លើក​ទី​៣២ ឆ្នាំ​២០២៣​។​

​លោកស្រី ប្រធាន​សហព័ន្ធ បាន​លើកទឹកចិត្ត​ដល់​សិក្ខាកាម​ទាំងអស់ ឲ្យ​ខិតខំ​ប្រឹងប្រែង ក្រេបជញ្ជក់​ចំណេះដឹង ពី​គ្រូឧទ្ទេស​ប្រចាំ​វគ្គ ដើម្បី​បង្កើន​កម្រិត​សមត្ថភាព​ឲ្យ​បានល្អ​ប្រសើរ ដើម្បី​បង្កើន​កម្រិត​សក្តានុពល វិស័យ​កី​ឡាំ​រាំ​កម្ពុជា ទាំង​ក្របខណ្ឌ​ជាតិ និង​អន្តរជាតិ​។

​ជាមួយគ្នា​នោះ លោកស្រី ញ៉ែម មរកត ក៏​ស្នើ​ឲ្យ​មន្ត្រី​កីឡា​រាំ​ទាំងអស់ បន្ត​កិច្ចសហការ សាមគ្គីភាព រួម​ធ្វើ និង​រួម​ទទួលខុសត្រូវ ក្នុង​ដំណើរ​អភិវឌ្ឍ​វិស័យ​កីឡា​រាំ​កម្ពុជា ឲ្យ​កាន់តែ​រីក​ម្រើន​បន្ថែមទៀត​៕/V​