​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ ស្ត្រី​ជនជាតិ​ឥណ្ឌា​ម្នាក់ ដែល​លេង​ពុកមាត់ បាន​ទទួល​ទាំង​ការកោតសរសើរ​និង​ការ​ចម្អក​ពី​មនុស្ស​តាម​អ៊ីនធឺណិត​។ ប៉ុន្តែ​នាង​និយាយថា នាង​មិន​ខ្វល់​នឹង​ការចាប់អារម្មណ៍​ចំពោះ​ពុកមាត់​របស់​នាង​ឡើយ​។​

​នាង​ស៊ីយ៉ា (Shyja) អាយុ ៣៥ ឆ្នាំ​បាន​ប្រកាស​នៅក្នុង WhatsApp នៅ​ខាងក្រោម​រូបថត​របស់​នាង​ថា “​ខ្ញុំ​ស្រលាញ់​ពុកមាត់​របស់ខ្ញុំ​”​។​

​នាង​ត្រូវបាន​សួរ​ជា​ញឹកញាប់​ដោយ​អ្នក​ដែល​ឃើញ​រូបថត​របស់​នាង​នៅលើ​ហ្វេ​ស​ប៊ុកឬ​ជួបនាង​ផ្ទាល់ថា​ហេតុអ្វី​បាន​ជា​នាងលេង​ពុកមាត់​។​

​នាង​និយាយថា “​អ្វី​ដែល​ខ្ញុំ​អាច​និយាយ​បាន​គឺ​ខ្ញុំ​ចូល​ចិត្ត​វា​ណាស់​”​។​

​នាង​ស៊ីយ៉ា​គឺរ​ស់​នៅ​ក្នុង​ស្រុកកាន់​នួ (Kannur)​ក្នុង​រដ្ឋ​កេ​រ៉ា​ឡា (Kerala)​ភាគខាងត្បូង​។​

​នាង​មាន​ពុកមាត់​នៅ​ពីលើ​បបូរមាត់​អស់​ជាច្រើន​ឆ្នាំ​ហើយ និង​នាង​តែង​តម្រឹម​រោមចិញ្ចើម​ជា​ទៀងទាត់​ដោយ​មិន​ដែល​មាន​អារម្មណ៍​ចង់​កោរពុកមាត់​នោះទេ​។​

​ប្រហែល​ប្រាំ​ឆ្នាំមុន ពុកមាត់​ចាប់ផ្តើម​ក្រាស់​មើលឃើញ​ច្បាស់ ហើយ​នាង​ស៊ី​យ៉ាង​រីករាយ​នឹង​រក្សា​វា​ទុក​។​

​នាង​និយាយថា “​ឥឡូវ​ខ្ញុំ​មិន​អាច​ស្រមៃរ​ស់​ដោយ​គ្មាន​វា​នោះទេ​។ នៅពេល​ដែល​ជំងឺ​រាតត្បាត​កូវី​ដ​បានចាប់ផ្តើម ខ្ញុំ​មិន​ចូលចិត្ត​ពាក់​ម៉ាស​គ្រប់ពេល​ទេ​ព្រោះ​វា​បិទបាំង​មុខ​របស់​ខ្ញុំ​”​។​

​មនុស្ស​ជាច្រើន ដែល​បាន​ឃើញ​នាង បាន​ជំរុញ​ឱ្យ​នាង​កោរពុកមាត់​ចេញ ប៉ុន្តែ​ស៊ីយ៉ា​បាន​បដិសេធ​។​

​នាង​និយាយថា “​ខ្ញុំ​មិន​ដែល​មាន​អារម្មណ៍​ថា​ខ្ញុំ​មិន​ស្អាត ព្រោះ​តែ​ខ្ញុំ​មានរ​បស់​នេះ​ឬ​របស់​អ្វី​ដែល​ខ្ញុំ​មិន​គួរ​មាន​នោះ​ទេ​”៕

​នាង​ស៊ីយ៉ា​ថា​មិន​ខ្វល់​នឹង​អ្នក​ដែល​ចម្អក​ពុកមាត់​របស់​នាង​ទេ