​ដោយៈ​ប​.​ខុន​/​ភ្នំពេញៈ​​ទឹក​បឹង​ទន្លេសាប​នៅ​ស្ថានីយ​ជល​សាស្ត្រ​ក្រគរ កំពង់​លួង ឡើង​បាន​ដល់​កម្រិត​២,៩៣​ម៉ែត្រ បន្ទាប់ពី​ទឹកទន្លេ​មេគង្គ​នៅ​ស្ថានីយ​ជល​សាស្ត្រ​ទន្លេបាសាក់ ចតុមុខ បាន​ឡើងដល់ កម្រិត​កម្ពស់​៥,០១​ម៉ែត្រ​នៅ​ថ្ងៃទី​២៣​ខែកក្កដា​ហើយ​វា​អាច​នឹង​ងើប​ឡើងដល់​កម្រិត​កម្ពស់​៥,៣០​ម៉ែត្រ​នៅ​ថ្ងៃទី​២៧​ខែកក្កដា​ខាងមុខ​។​

​លោក ចាន់ យុ​ត្ថា អ្នកនាំពាក្យ​និង​ជា​រដ្ឋលេខាធិការ​ក្រសួង​ធនធានទឹក​និង​ឧតុនិយម​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​២៣​ខែកក្កដា​ឆ្នាំ​២០២២​ថា​ទឹកទន្លេ​នៅ​គ្រប់​ស្ថានីយ​ជលសា​ស្ត្រ​បាន​ងើបឡើង​មកវិញ​និង​បន្ត​ឡើង​ច្រើន​ថ្ងៃ​ទៀត​តែ​ឡើង​មិន​គំហុក​នោះទេ​។ នៅក្នុង​ប្រទេស​កម្ពុជា​ស្ថានភាព​ភ្លៀង​ធ្លាក់​អាច​ចុះខ្សោយ​បន្តិច ក្នុង​រយៈពេល​ប៉ុន្មាន​ថ្ងៃ​ខាងមុខ តែ​នៅ​តំបន់​អាង​ទន្លេមេគង្គ​លើ​នៅ​បន្ត​មាន​ភ្លៀង​ច្រើន​ដោយ​វិ​សម្ពាធ​ឬ​សម្ពាធ​ទាប​សកម្ម​នៅក្នុង​សមុទ្រ​ខាងត្បូង​នឹង​ដើរ​ទៅដល់​នោះ​នៅពេល​ខាងមុខ​។​

​ព្រឹត្តិប័ត្រ​ព័​ត៍​មាន​និង​ព្យាករណ៍​កម្ពស់​ទឹកទន្លេ​របស់​ក្រសួង​ធនធានទឹក​និង​ឧតុនិយម​នៅ​ថ្ងៃទី​២៣​ខែកក្កដា​បង្ហាញឱ្យឃើញ​ថា នៅ​ខេត្តស្ទឹងត្រែង​ទឹក​មាន​កម្ពស់ ៦,៣១​ម៉ែត្រ​ខ្ពស់ជាង​ថ្ងៃទី​២២​ខែកក្កដា​០,៣៤​ម៉ែត្រ នៅ​ខេត្តក្រចេះ​ទឹក​មាន​កម្ពស់​១៤,៥៤​ម៉ែត្រ​ខ្ពស់ជាង​ថ្ងៃទី​២២​កក្កដា​០,៣១​ម៉ែត្រ នៅ​ខេត្តកំពង់ចាម​ទឹក​មាន​កម្ពស់​៨,៤៤​ម៉ែត្រ ខ្ពស់ជាង​ថ្ងៃទី​២២​កក្កដា​០,០៨​ម៉ែត្រ នៅ​ទន្លេ​បា​សា​សក់ ចតុមុខ ទឹក​មាន​កម្ពស់​៥,០១​ម៉ែត្រ ខ្ពស់ជាង​ថ្ងៃទី​២២​កក្កដា​០,០១​ម៉ែត្រ​។ នៅ​អ្នក​លឿង​ទឹក​មាន​កម្ពស់​៣,៥៦​ម៉ែត្រ ទាប​ជាង​ថ្ងៃទី​២២​កក្កដា​០,០២​ម៉ែត្រ នៅ​ទន្លេបាសាក់ កោះ​ខែល ទឹក​មាន​កម្ពស់​៤,៦៧​ម៉ែត្រ ទាប​ជាង​ថ្ងៃទី​២២​កក្កដា​០,០១​ម៉ែត្រ នៅ​ទន្លេសាប​ព្រែក​ក្តាម​ទឹក​មាន​កម្ពស់​៤,០៨​ម៉ែត្រ ខ្ពស់ជាង​ថ្ងៃទី​២២​កក្កដា​០,០១​ម៉ែត្រ ទឹក​បឹង​ទន្លេសាប​នៅ​ក្រគរ កំពង់​លួង ទឹក​មាន​កម្ពស់​២,៩៣​ម៉ែត្រ​ខ្ពស់ជាង​ថ្ងៃទី​២២​ខែកក្កដា​០,១០​ម៉ែត្រ​។​

​នៅ​ថ្ងៃទី​១៧ ខែកក្កដា ទឹកទន្លេ​មេគង្គ​នៅ​ខេត្តស្ទឹងត្រែង អាច​ឡើងដល់​កម្ពស់​៦,៤៥​ម៉ែត្រ នៅ​ក្រចេះ​ទឹក​អាច​ឡើងដល់​កម្ពស់​១៥,១០​ម៉ែត្រ នៅ​ខេត្តកំពង់ចាម​ទឹក អាច​ឡើងដល់​កម្ពស់​៨,៩៣​ម៉ែត្រ នៅ​ចតុ​មុខទឹក​អាច​ឡើងដល់​កម្ពស់​៥,៣០​ម៉ែត្រ នៅ​អ្នក​លឿង​ទឹក​អាច​ឡើងដល់​កម្ពស់​៣,៧៧​ម៉ែត្រ នៅ​ទន្លេបាសាក់ កោះ​ខែល​ទឹក​អាច​ឡើង ដល់​កម្ពស់​៤,៨៣​ម៉ែត្រ និង​នៅ​ព្រែក​ក្តាម​ទឹក​អាច​ឡើងដល់​កម្ពស់​៤,៣២​ម៉ែត្រ​។​
​ក្រសួង​ធនធានទឹក​និង​ឧតុនិយម​បាន​ព្យាករណ៍​ថា​ទឹកទន្លេ​មេគង្គ​នៅ​ស្ថានីយ​ជល​សាស្ត្រ​បាសាក់ ចតុមុខ​ក្នុង​រដូវវស្សា​ឆ្នាំ​២០២២​អាច​ឡើ​ឡង​ដល់​កម្រិត​កម្ពស់​៩,៦៥​ម៉ែត្រ ដែល​ចាត់ទុកថា​ជា​ប្រភេទ​ជំនន់​មធ្យម​៕​