​ប្រែ​សម្រួល : កញ្ញា​ដា​លី​ស (VNExpress) ៖ បុរស​អាយុ ៩០ ឆ្នាំ​ម្នាក់​នៅក្នុង​ខេត្ត​ឡុង​អាន (Long An) នៃ​តំបន់​ដីសណ្ត​ទន្លេមេគង្គ​បាន​ទទួល​ទោស​ជាប់​ពន្ធនាគារ​រយៈពេល​ប្រាំ​ឆ្នាំ​កាលពី​ថ្ងៃ​​ព្រហស្បតិ៍​ទី​២២​កក្កដា​ពីបទ​ធ្វើអោយ​ប៉ះពាល់​អវិជ្ជមាន​ដល់​កេរ្តិ៍ឈ្មោះ​របស់​បុគ្គល​និង​អង្គការ​ជា​ច្រើន​។​

​តុលាការ​ប្រជាជន​ស្រុកឌឹ​ក​ហ័​រ​(Duc Hoa) បាន​កាត់ទោស​ឱ្យ​លោក ឡេ ទុង វ៉ាន់ (Le Tung Van) ជាប់​ពន្ធនាគារ​រយៈពេល​ប្រាំ​ឆ្នាំ​ពីបទ “​រំលោភ​លើ​សេរីភាព​ប្រជាធិបតេយ្យ​ដើម្បី​បំពាន​លើ​​ផលប្រយោជន៍​រដ្ឋ សិទ្ធិ​ស្រប​ច្បាប់​និង ផលប្រយោជន៍​របស់​អង្គការ​និង​/​ឬ​ប្រជាពលរដ្ឋ​”​។​

​បក្ខពួក​ប្រាំ​នាក់​ផ្សេង​ទៀត​ក៏​ត្រូវបាន​កាត់ទោស​ដាក់​ពន្ធនាគារ​ផងដែរ គឺ​ឈ្មោះ ឡេ ថាញ់ ញ៉ាត ង្វៀន (Le Thanh Nhat Nguyen) អាយុ ៣០ ឆ្នាំ​, ឡេ ថាញ់ ហ័ន ង្វៀន (Le Thanh Hoan Nguyen) អាយុ ៣១ ឆ្នាំ និង ឡេ ថាញ់ យឿ​ង (Le Thanh Duong) អាយុ ២៧ ឆ្នាំ ទាំងអស់គ្នា​ត្រូវ​ជាប់​ពន្ធនាគារ​រយៈពេល​បួន​ឆ្នាំ​, ឈ្មោះ ឡេ ថាញ់ ញី ង្វៀន (Le Thanh Nhi Nguyen) ជាប់គុក​បី​ឆ្នាំ​កន្លះ និង កាវ ធី គុក (Cao Thi Cuc) ជាប់គុក​បី​ឆ្នាំ​។​

​បើ​តាម​ឯកសារ​តុលាការ ចាប់ពី​ឆ្នាំ ២០១៩ ដល់​ឆ្នាំ ២០២១ លោក​វ៉ាន់​បាន​ណែនាំ​ឈ្មោះ ហ័ន ង្វៀន និង ញ៉ាត ង្វៀន ឱ្យ​បង្កើត​គណនី YouTube ដែល​ពួកគេ​បាន​បង្ហោះ​វីដេអូ​មាន​ខ្លឹមសារ​មិន​ពិត ដែល​ប៉ះពាល់​អវិជ្ជមាន​ដល់​សាធារណជន ប្រមាថ​ដល់​កេរ្តិ៍ឈ្មោះ​របស់​អង្គការ និង​បុគ្គល​ដូច​ជា​ប៉ូលិស​ស្រុកឌឹ​ក​ហ័​រ ព្រះសង្ឃ​វៀតណាម​ក្នុង​ខេត្ត​ឡុង​អាន និង​ព្រះសង្ឃ​វៀតណាម​ព្រះនាម ថិ​ច ញ៉ាត ទូ (Thich Nhat Tu) ជា​សាកលវិទ្យាធិការ​រង​នៃ​សកល​វិទ្យាល័យ​ពុទ្ធសាសនា​វៀតណាម និង​ជា​អនុប្រធាននាយកដ្ឋាន​កិច្ចការ​ព្រះពុទ្ធសាសនា​អន្តរជាតិ​នៃ​សមាគម​ព្រះពុទ្ធសាសនា​វៀតណាម​។​

​រដ្ឋ​អាជ្ញា​បាន​និយាយថា អាកប្បកិរិយា​របស់លោក​វ៉ាន់​បាន​បំពាន​យ៉ាងធ្ងន់ធ្ងរ​ដល់​សណ្តាប់ធ្នាប់​ក្នុង​មូលដ្ឋាន​និង​ត្រូវបាន​ធ្វើឡើង​ដដែល​ជា​ច្រើន​ដង​៕

​លោក ឡេ ទុង វ៉ាន់ អាយុ​៩០​ឆ្នាំ​ត្រូវ​តុលាការ​កាត់ទោស​អោយ​ជាប់គុក ៥ ឆ្នាំ​ពី​បទ​រំលោភ​សិទ្ធិ​ប្រជាធិបតេយ្យ